5. Mose 33:8 - O Debleskro Drom 2021 (Sinte)

⁸ Un pral o kheer Levi penas lo: Baro Dewel, de i Levitarjen kol barra, hoi sikrenn, hoi tu kameh, te well kerdo! Jon rikran ap tute pash i panja Massa un Meriba, har kamal te djinell: Shunenn le ap tute, ninna te well kowa lenge phares?

O Debleskro Lab 2024 (Sinte-Manouche)

⁸ Oun pral o kheer Levi penas lo: Baro Devel, de i Levitaryen kol barra, hoy sikrenn, hoy tou kameh, te vell kerdo! Yon rikran ap toute pash i panya Massa oun Meriba, har kamal te djinell: Shounenn le ap toute, ninna te vell kova lenge phares?

5. Mose 33:8 ပူးပေါင်းရင်းမြစ်များ

2. Familjakro liil 23:6

Kek te djal an o baro Debleskro kheer dren! Kokres i rashaja un kol Levitarja, kai ap ko diwes hunte budrenn, kolla nai djan dren. Jon hi o Debleske koi. Un i tsele wawar menshe hunte krenn, hoi o Dewel penas.

Esra 2:63

Un ko moskro penas lenge, te nai chan le gar o chapen, hoi kokres i rashajenge his, jaake rah bis te i rashai was un win hatsas, hoi i barra Momeli un Tchatchepen pral kau koowa penan.

Esra 8:28

Un me penom ap lende: “Tumer han o Debleske wi-rodedo, un kol tsele kotja hi o Debleske ap i rig tchiddo: Un ko rup un ko sonakai was o Debleske dino dran o menshengro kamlepen. Jon dan kowa pendar o baro Debleske, koles ninna pengre phure an-mangan.

Nehemia 7:65

Un ko moskro penas lenge, te nai chan le gar o chapen, hoi kokres i rashajenge his, jaake rah bis te i rashai was un win hatsas, hoi i barra Momeli un Tchatchepen pral kau koowa penan.

Debleskri gili 106:16

Ap lengri platsa hadan le pen pral o Moseste, un pral o Aroneste, koles o baro Dewel peske win rodas.

Debleskri gili 16:10

Tu mukeh man gar an o merepen, un kameh gar, te merell miro mass tele an i phub.

Debleskri gili 81:7

Me lom tumendar ko pharo koowa tele, hoi ap tumare phika his, un tumare wasta hunte hidjrenn buder gar kol phare barra.

2. Mose 17:7

Koi platsa, kai i menshe tchingran ap leste un kai jon gar patsan, te hi o baro Dewel pash lende un dell len kowa, hoi len hunte well, koi platsa das o Mose i laba ‘Massa’ un ‘Meriba’.

2. Mose 28:30

An ko betcheskri possita tchip kol dui tikne koola, hoi kharenna ‘momeli’ un ‘tchatchepen’, te wenn le ap o dji o Aronestar, te djal o Aron dren pash mande. Kol dui tikne koola, kolentsa tumer win hatsenn, hoi me, o baro Dewel, i Israelendar kamau, kolen hidjrell lo ap peskro dji, te well lo glan mande.

2. Mose 28:36

An i tikno kotar latcho sonakai tchin kol laba: “Kowa hi o baro Debleske”, un pande ko kotar sonakai ap i dori dran blaueto kutch bakrengro bal glan ap o shereskro pandepen.

3. Mose 21:7

I rashai hunte well peskro Debleske koi. Doleske hunte romedinerell lo kek lubni, witar gar i tchai, kai i murshestar an-tapedo was, witar gar i djuwel, kai peskro romestar muklo was.

3. Mose 8:8

Palle tchiwas lo o betcheskri possita ap leste. Un an koi possita tchiwas lo kol dui tikne koola, hoi kharenna ‘momeli’ un ‘tchatchepen’.

Maleachi 2:6

Jon anan i menshenge kowa pashel, hoi tchatcho hi. Un kek tchilatcho lab his an lengre muja. Jon djiwan glan mande an o latchepen un an o tchatchepen, un rikran bud menshen o tchilatchepastar pale.

4. Mose 16:5

un penas ap o Korach un ap kolende, kai pash leste his: “Taissar penell o baro Dewel, koon leskre menshe hi, kones job peske wi-rodas, un koon nai well pash leste. Un kones job win rodella, kowa nai well pash leste.

4. Mose 20:13

Kau pani kharan le ‘Meriba’. Kate tchingran i Israelitarja ap o baro Debleste. Un kate sikras lo lende, kai job tchatchepah o baro un sorelo Dewel hi.

4. Mose 20:24

“O Aroneskro tsiro nashas tele, un job well gar an ko them, kai dom i Israelitarjen. Tumer shunan gar ap kowa, hoi penom pash o pani ‘Meriba’.

4. Mose 27:21

Un an tsirja, kai djinell lo gar, hoi te krell, hunte well lo glan o rashajeste Eleasar. Kowa hunte putchell mandar un hunte witsrell kol Debleskre barra, te hatsell lo win, hoi me, o baro Dewel, an kau koowa kamau. Jaake te sikrell o Eleasar o Josueske un i tsele Israelenge, hoi te krenn le.”

4. Mose 35:8

Hakeni kol deesh-te-dui bare familjendar an Israel hunte dell lenge peskre forjendar. Kolen, kai bud them un forja hi, kolla hunte denn i Levitarjen budeder forja har kolla, kai len gar bud hi.

5. Mose 6:16

Ma krenn jaake, har te wals o baro Dewel gar pash tumende un dals tumen gar kowa, hoi tumen hunte well djipaske, jaake har kowa kran, har hans an o foro Massa!

5. Mose 8:16

un das tumen Manna te chal an o mulo tato them, ko maro, hoi tumare phure gar prindjran. Kote sikras lo tumen: Te hi lo gar tumentsa, nai krenn tchi. Ninna kamas lo win te hatsell, hoi an tumare djia hi, te nai krell lo les tumenge pal kowa mishto.

5. Mose 9:22

Ninna kran tumer tumaro baro Debles chojedo, har hans an Tabera un Massa un Kibrot-Taawa.

Hebrearja 7:26

O Jesus hi o baro rashai, kai hunte well men. Job hi latcho glan o Debleskre jaka. Kek tchilatchepen, witar kek doosh hi ap leste. Na-a, job hi gar jaake har mer tchilatche menshe ham, kai ham pale-tchiddo glan o Debleste. Un o Dewel kras les bareder har hako wawar an o bolepen.

Debleskro tsiro 3:7

“Tchin kau liil ap o Debleskro budepaskro, kai dell jak ap i patslende an o foro Filadelfia: Kawa penell o Debleskro tchatchepaskro. Koles hi o Davideskro klidepaskro an o wast. Job te krell o wudar pre, palle nai krell les kek pale pandlo. Job te krell o wudar pandlo, palle nai krell les kek pre.

1. Samuel 28:6

Un o Saul putchas o baro Debles, hoi te krell lo. Un kowa penas leske tchi, das les kek suni, rakras gar leha kol tikne barrentsa, hoi witsedo wan, te sikrenn le, hoi kerdo hunte wella. Witar gar nai penas leske i Debleskro rakepaskro, hoi te krell lo.