5. Mose 32:29 - O Debleskro Drom 2021 (Sinte)

²⁹ Har kamaus, te wans le gosewo! Palle haiwans le, hoi ap lende wella.

O Debleskro Lab 2024 (Sinte-Manouche)

²⁹ Har kamaus, te vans le gosevo! Palle hayvans le, hoy ap lende vella.

5. Mose 32:29 ပူးပေါင်းရင်းမြစ်များ

Debleskri gili 107:15

Jon hunte parkrenn pen pash o baro Debleste, te was lo jaake latches ap lende, un kras baro shukar koowa ap i menshende,

Debleskri gili 107:43

Koon gosewo hi, bistrell kowa gar, un haiwell, har latcho o baro Dewel hi.

Debleskri gili 81:13

Jaake mukom len kowa te krell, hoi jon kaman, un mukom len pal pengro shero te djal.

Debleskri gili 90:12

Sike men, har sik maro djipen trujel hi, te was mer gosewo.

Jesaja 10:3

Hoi kamenn tumer te krell ap ko diwes, kai well tumari phagi pral tumende? Ap ko diwes, kai well i bibacht fun dural pral tumende? Pash koneste kamenn tumer palle te nashell? Un kai mukenn tumer palle tumaro brawlepen?

Jesaja 42:23

Koon tumendar kamell kawa peskre kandentsa te shunell? Koon kamell koi pre jak te dell an ko tsiro, hoi wella?

Jesaja 47:7

Un tu penal: Me atchau rajetsa hako tsiro. Un mukal gar an tiro dji te djal, te nai perals kau koowa ap tute pale. Har kowa win djals, his tuke tchi moldo.

Jeremia 17:11

Har i diwji kachni, kai beshell pes ap i jare, kai gar lakre hi, jaake djal koleske, kai lell peske brawlepen khetne chochepah. An o feteder tsiro nashrell lo peskro brawlepen, un hi koi tardo har i narwelo.

Jeremia 5:31

O Debleskre rakepangre rakrenn chochepen, un kol rashaja rodenn penge ko feteder win, un mire menshe kamenn kowa jaake. Hoi kamenn tumer te krell, te hi tumaro tsiro trujel?

Ropaskre gilja 1:9

Lakro ripen hi pherdo tchik. Un joi patsas gar kai lake jaake djala. Dur tele peras li, un kek hi lake koi, kai penell lake i kamlo lab. “Dik, baro Dewel, har djungeles mange djala, un kolla, kai man khetne dan, krenn pen bares.”

Hosea 14:9

Palle penell o Efrajim ap mande: Hoi te krap kanna i mule deblentsa? Me shunau un dikau ap tute. Me hom har i baro senelo ruk. Kowa, hoi ap mande bares well, well tutar.

Haggai 2:18

Kau diwes hi o 24. (biish-te-starto) diwes an o enjato tchon. Kau diwes tchiwan tumer i telstune barra miro khereske jek ap o wawar. Kanna denn garda, har tumenge kau diwesseha djala!

Louka 12:20

O Dewel penell ap leste: Tu dinelo! Kai rat hunte meress tu. Koon lell tiro tselo brawlepen, hoi tu tuke khetne anal?”

5. Mose 31:29

Me djinau, pal miro merepen dukrenn tumer o baro Debles, un djan ko dromestar tele, hoi tumende sikrom. Tumer krenn, hoi tchilatcho hi glan o baro Debleskre jaka, un mangenn wawar deblen an, un choirenn les koleha. Doleske well bari bibacht pral tumende.”

5. Mose 5:29

Har kamoms, te atchans lengre djia hako tsiro jaake, te rikrenn le man glan pengre jaka, un te denn le jak ap mire tsele laba! Palle djals lenge un lengre tchawenge mishto o tselo tsireske.