5. Mose 28:20 - O Debleskro Drom 2021 (Sinte)

²⁰ Te mukenn tumer o baro Debles un djan ap tumaro tchilatcho drom, bitchrell lo mank tumende bibacht un daar an halauter, hoi tumer krenna, jaake te djinenn buder gar, hoi te krenn. Jaake merenn tumer un djan sik tele.

O Debleskro Lab 2024 (Sinte-Manouche)

²⁰ Te moukenn t'mer o baro Debles oun djan ap t'maro čilačo drom, bičrell lo mank t'mende bibarht oun daar an halauter, hoy t'mer krenna, yaake te djinenn bouder gar, hoy te krenn. Yaake merenn t'mer oun djan sik tele.

5. Mose 28:20 ပူးပေါင်းရင်းမြစ်များ

Hiob 24:18

O tchilatcho well sik krik hidjedo har i patri ap o pani. Ap leskro kotar phub hi i praassepen tchiddo. Pash peskre drakengre ruka djal lo buder gar.

Debleskri gili 7:11

O Dewel rikrell peskro wast pral mande. Job lell kolen dran i bibacht win, kai shunenn ap leste pengro tselo djijeha.

Jesaja 28:19

Hako kopo, kai wenn le, taprenn le tumendar un anenn tumen krik, nai well ap o diwes un ninna an i rat. Te haiwans tumer, hoi shunenn, palle atchals tumenge o rakepen krik i trashatar.

Jesaja 30:17

I sero mursha tumendar nashenn penge glan jekeste, kai peskro mui pre krell un penell ‘Kanna lenn tumare dawa.’ Awa, glan pantch sawendar nashenn tumer lauter krik. Tumare tsele lurdendar atchell tchi pral har koi plachta ap i kasht, hoi pre tardo tchiwan pral ap i berga, te dikenn le lat fun dural.

Jesaja 51:20

Tire tchawe peran khetne, un his tchiddo ap hake dromma. Jon hi har i tserfo, hoi an i netsa djas. Jaake tapras len koi choli o baro Deblestar, un leskro tchingepen.

Jesaja 66:15

Dik, o baro Dewel well an i jag, un leskre wurdja hi har i sorelo phurdepen. Job dell len lengro tchilatchepen pale i bari choljah, un leskro tchingepen hi har jag, kai chatchrell.

Jeremia 1:16

Un me dau i menshen an Juda i phagi lengro tchilatchepaske, hoi jon kran. Jon djan krik mandar un anan viechen wawar deblenge un mangan kol figuren an, hoi le pengre wastentsa kran.

Jeremia 19:4

Mire menshe mukan man un kran kau kotar them pale-tchiddo, har chatchran le sungepaskro koowa wawar deblenge, kolen prindjrenn jon gar un witar gar lengre phure. Ninna kol bare raja pral o them Juda prindjran len gar. An kau foro maran le menshen, kai kek tchilatchepen kran.

3. Mose 26:38

An kol themma kol wawar menshendar merenn tumer. Ko them, kai wenn pandles anlo, chal tumen pre.

Johanni 3:36

Koon ap o tchaweste patsella, koles hi ko djipen, hoi gar pre-herella. Koon ap o tchaweste gar patsella, koles well ko tchatcho djipen gar. O Debleskri choli atchell pral leste.”

5. Mose 28:8

Tumaro baro Dewel bitchrell tumenge peskri bacht ap tumaro djob, te well tumen bud kolestar an tumare djobengre khera, un ap halauter, hoi tumer krenna. Un job dell tumen peskri bacht an ko them, hoi lo tumende dell.

5. Mose 4:26

Kau diwes dau man sowel glan o bolepen un i phub, te krenn tumer sawo koowa, djiwenn gar rah an o them, hoi tumer dren lenna wergel o pani Jordan. Kokres i tikno tsiro atchenn tumer koi. Palle wenn tumer lauter krik tradedo.

1. Tessalonikarja 2:16

Jon mukenn men gar, te penas mer o latcho lab i wawarenge, kai kek bibolde hi, te nai wenn kolla ninna ap o Debleskro drom. Jaake was i biboldengri doosh jaake baro, bareder djal gar. Un o Debleskri choli was soreles pral lende.

Čačepangre 2:15

Un kai le ninna djan, te kurenn le pen, his o baro Dewel gar lentsa un das len kek bacht. Jaake was kowa, hoi o baro Dewel lenge penas un leskro wast pre das. Un jon wan an phare tsirja.

1. Samuel 14:20

Un o Saul un i tsele lurde, kai pash leste hi, wan khetne, un djan ap i kurepaskri platsa. Un har le koi wan, dikan le, te maran pen i Filistarja kokres. Jek djas ap o wawareste. Lauter his har dineles.