5. Mose 21:23 - O Debleskro Drom 2021 (Sinte)

²³ palle atchell ko mulo gar pral i rat ap ko kashteste. Na-a, job hunte well paskedo ap ko emligo diwes, te well ko them gar pale-tchiddo, hoi tumaro baro Dewel tumen dell. Pash leste hi kowa praassedo, kai hi pre-pandlo ap i kasht.

O Debleskro Lab 2024 (Sinte-Manouche)

²³ palle ačell ko moulo gar pral i rat ap ko kashteste. Na-a, yob hounte vell paskedo ap ko emligo dives, te vell ko them gar pale-čiddo, hoy t'maro baro Devel t'men dell. Pash leste hi kova praasedo, kay hi pre-pandlo ap i kasht.

5. Mose 21:23 ပူးပေါင်းရင်းမြစ်များ

2. Samuel 21:10

Koi las i Rizpa, kolakro dad o Aja his, i gono un tchiwas kowa ap i baro bar, un beshas pes koi pre un atchas kote jaake rah har jon o djob tele tchinan, bis te peras o brishino dran o bolepen ap kol mulende, kai koi bladedo his. Un ap o diwes mukas li gar kol tchirklen ap lende te well, witar gar rati i wesheskre viechen.

2. Samuel 21:6

dran leskro kheer denn men efta murshen, te bladas len pre glan o baro Debleste an o foro Gibea, hoi o foro o Saulestar hi, koles o baro Dewel win rodas.” Penas o David: “Me dau len tumende.”

2. Rajengro liil 10:8

Har ko bitchepaskro pash leste was un leske penas “jon anan i sherja o baro rajeskre tchawendar”, penas job: “Tchiwenn len khetne ap dui platse glan o foreskro wudar, un atchenn len kote bis taissar.”

Ezekiel 39:12

Un i Israelitarja paskrenn len, te atchell o them buder gar pale-tchiddo. Len hunte well efta tchonna, te paskrenn le len halauter.

3. Mose 18:25

O tselo them was koleha pale-tchiddo kerdo. Me anau lengri doosh ap lende pale, un krau, te wenn kol menshe win tradedo dran ko them, kai le djiwenn.

4. Mose 25:4

Un job penas ap o Moseste: “Le kol tsele pralstunen pral i Israelitarja un pande len glan mande pre, mashkral o diwes, te dikell len hakeno. Palle lau miri bari choli i menshendar Israel krik!”

Johanni 19:31

His o diwes glan o Debleskro diwes. Ko Debleskro diwes his i baro diwes. Doleske kaman i pralstune bibolde gar, te atchenn i mule ap ko Debleskro diwes ap o trushel. Un jon mangan o Pilatestar, te wenn i herja kolendar phagedo, kai ap o trushel dino wan, te merenn le sikeder. I bibolde kaman, te lenn le len sik tele.

1. Korintarja 16:22

Koon o Jesuses, maro rajes, gar kamella, ap koleste well i bibacht! Maranatha!

2. Korintarja 5:21

O Dewel tchiwas mari tseli doosh ap maro rajeste, o Jesus Kristeste, kai job kek tchilatchepen kras, te was mer tchatcho un erligo glan o Debleskre jaka.

Galatarja 3:13

Mer nashte rikram kowa lauter gar. Un dran kowa wam tel o Debleskro praassepen. Un o Jesus Kristo las ko praassepen mendar krik, har job ap o trushel dino was, un jaake menge praassedo was. O Debleskro lab penella: Hakeno, koon ap o trushel dino wella, hi praassedo.

5. Mose 25:19

Ap ko tsiro, kai lan tumer ko them dren, hoi tumaro baro Dewel tumen dell, un tumer buder gar an o kurepen han kolentsa, kai trul tumende djiwenn, palle denn kol tsele Amalekarjen mulo, jaake te atchell tchi lendar pral, hoi sikrell, te his i tsiro, kai djiwan le. Un kowa bistrenn gar!

5. Mose 4:21

Un dran kowa, hoi tumer kran, was o baro Dewel ninna chojedo ap mande, un das pes sowel, te djap me gar wergel o lengsto pani Jordan, un te wap gar an ko latcho them, hoi dell tumen tumaro baro Dewel, te well les tumenge.

5. Mose 7:26

Tumer hunte anenn kek sawi figura an tumare khera, te wenn tumer gar lentsa khetne mulo dino. Tchatchepah, dikenn ap lende har ap i djungelo koowa, un denn len paash.

Josua 7:12

Doleske nai wenn i Israelitarja buder gar sorele pral kolende, kai kurenn pen lentsa. Un jon hunte nashenn lendar. Kanna hi jon kolla, kai hunte darenn lengro djipaske. Me hom buder gar tumentsa jaake rah, har anenn tumer gar ko koowa dran tumende krik, hoi mandar tchoran.

Josua 8:29

Un o baro rajes o forestar Ai mukas lo ap i ruk pre te bladell. Bis ap i rat atchas job ap i ruk. Un har o kham tele djas, penas o Josua, te lenn le ko mules o rukestar tele. Un jon lan les tele un witsran les glan o foreskro baro wudar, un tchiwan bud barra ap leste pre, hoi gomme kau diwes koi hi.