5. Mose 12:30 - O Debleskro Drom 2021 (Sinte)

³⁰ Ap ko tsiro, kai jon buder gar koi hi, denn tumen jak, te mukenn tumen gar ap lengre dromma te anell! Ma putchenn: ‘Har mangan kolla pengre deblen an? Jaake kamah mer les ninna te krell.’

O Debleskro Lab 2024 (Sinte-Manouche)

³⁰ Ap ko tsiro, kay yon bouder gar koy hi, denn t'men yak, te moukenn t'men gar ap lengre dromma te anell! Ma poučenn: Har mangan kolla pengre deblen an? Yaake kamah mer les ninna te krell.

5. Mose 12:30 ပူးပေါင်းရင်းမြစ်များ

2. Rajengro liil 16:10

Un o baro rai Ahas djas an o foro Damaskus, te dikell lo kote o baro rajes dran o them Assur, o Tiglat-Pileser. Un har lo koi sasterni chatchepaskri dikas, kai an o foro Damaskus tardo hi, kote bitchras o baro rai Ahas peskre bitchepangre pash o rashai Urija un mukas leske te sikrell, har koi chatchepaskri win dikell un har baro koja hi un har li kerdo was.

2. Rajengro liil 17:15

Un jon rikran gar leskre laba. Un ko lab, hoi das lo lengre phurende, kai lo penas, te hi lo lengro Dewel un jon leskre menshe, ko lab his lenge tchi moldo. Jon mukan pen gar lestar trad te dell, un nashan kol deblen palla, hoi tchi molenna. Un jaake djiwan le tchitcheske. Jon kran sawo koowa har kol menshe an i themma trul lende, kolendar o baro Dewel lenge penas, te krenn le gar har jon krenna.

2. Mose 23:24

Ma mangenn lengre deblen an! Ma anenn viechen, te chatchrenn len lenge! Ma krenn jaake har kolla, kai an ko them djiwenna! Denn lengre tsele deblen paash, un phagenn kol bare barra, hoi jon lenge pre-tchiwan!

Jeremia 10:2

Kowa penell o baro Dewel: Ma djan i dromma, hoi i menshe an wawar themma djana! Jon darenn glan o sikepen, hoi krenn i momlia ap o bolepen. Tumer hunte darenn kowa gar.

Ezekiel 11:12

Un tumer dikenn un haiwenn, te hom me o baro Dewel. Tumer kran gar kowa, hoi tumendar kamom. Un rikran gar ap mire tchatchepaskre laba. Na-a, tumer djiwan pal i tchatchepangre laba kol menshendar, kai an i themma trul tumende djiwenna.

Ezekiel 20:28

Har me len an o them anom, kolestar man sowel dom, te dap les lende, mangan le wawar deblen an. Hako kopo, kai dikan le i tikni berga oder i baro ruk bud patjentsa, chatchran le viechen i chochene deblenge, un kran man chojedo koleha, hoi le lenge anan. Jon chatchran sungepaskro koowa lenge, un tchoran mool win lenge.

Ezekiel 20:32

Hoi was tumenge an o shero? Tumer penenn: “Mer kamah har i menshe an wawar themma te well! Mer kamah deblen dran kasht un bar an te mangell.” Me o baro Dewel, tumaro rai, penau: Sawo koowa te well kek tsireske! Me dau man sowel pash miro djipen, te atchap i sorelo rai pral tumende – i rai i sorelo wasteha, un i pre-hadedi mussjah, un i baro choljah.

3. Mose 18:3

Ma djiwenn jaake har i Egiptarja, an kolengro them djiwan, witar gar har kolla an o them Kanaan, kote kai tumen anau. Ma djiwenn pal lengro koowa.

3. Mose 18:30

Doleske, djiwenn jaake har me tumenge penom! Ma krenn ko pale-tchiddo koowa, hoi kolla kran, kai glan tumende kate his! Ma krenn tumen sawo koweha pale-tchiddo! Me, o baro Dewel, hom tumaro Dewel.

4. Mose 33:52

hunte tradenn kol tsele menshen, kai djiwenn kote, glan tumende krik. Un lengre tsele barrengre un sasterne deblen, hoi kran jon penge, krenn paash, ninna kol pre-tchidde barra.

Remarja 12:2

I menshe ap kai phub djiwenn pal pengro shero. Ma djiwenn jaake har jon! Mukenn tumen o Deblestar newes te krell, te haiwenn tumer, hoi job kamella: kowa, hoi hi latcho un mishto un tchatcho.

Efesarja 4:17

Me penau tumenge soreles, hoi mange o rai Jesus penas: Ma djiwenn buder har kol menshe, kai prindjrenn o Debles gar! Kowa, hoi an lengro shero trujel djala, hi tchi moldo.

5. Mose 11:16

Denn tumen jak, te mukenn tumen gar krik te anell o baro Debleskro dromestar, un perenn lestar tele un mangenn wawar deblen an, un witsrenn tumen glan lende tele.

5. Mose 12:29

Tumaro baro Dewel tradell i wawar menshen glan tumende win dran o them, kai tumer wenna. Un tumer lenn lengro them tumenge dren un djiwenn kote.

5. Mose 12:31

Ma krenn sau kowa tumaro baro Debleha! Kowa lauter, hoi jon pengre deblenge kran, hi djungelo un tchilatcho glan o baro Debleskre jaka. Ninna pengre mursh tchawen un pengre tchen chatchran le lenge an i jag.

5. Mose 18:9

Te wenn tumer an o them, hoi tumaro baro Dewel tumen dell, palle krenn gar ko djungelo pale-tchiddo koowa, hoi krenn i menshe, kai kote djiwenn.

5. Mose 20:18

Te krenn tumer kowa gar, anenn le tumenge pashel, har te krenn ko tselo djungelo koowa, hoi jon pengre deblenge kran. Un jaake anens tumer doosh ap tumende glan tumaro baro Debleste.

5. Mose 7:16

Tumer hunte marenn i tsele natsjone, hoi tumaro baro Dewel an tumare wasta dell. Jon hunte khaitenn tumen gar, un lengre deblen hunte mangenn gar an. Jon anans tumen an i bibacht.