4. Mose 4:15 - O Debleskro Drom 2021 (Sinte)

¹⁵ Ap ko tsiro, kai djan i Israelitarja dureder, hunte krenn o Aron un leskre tchawe kawa halauter un hunte tchakrenn kol tsele kotja o Debleskro plachteno khereske un halauter, hoi koi pashel hi. Pal kowa wenn kol Kohatarja un hidjrenn kowa. Kaja hi lengre budi. Jon taprenn kokres kol plachte an, hoi trul ko tselo koowa tchiddo hi, un gar ko Debleskro koowa, te merenn jon gar.

O Debleskro Lab 2024 (Sinte-Manouche)

¹⁵ Ap ko tsiro, kay djan i Israelitarya doureder, hounte krenn o Aron oun leskre čave kava halauter oun hounte čakrenn kol tsele kotya o Debleskro plarhteno khereske oun halauter, hoy koy pashel hi. Pal kova venn kol Kohatarya oun hidjrenn kova. Kaya hi lengre boudi. Yon taprenn kokres kol plarhte an, hoy troul ko tselo koova čiddo hi, oun gar ko Debleskro koova, te merenn yon gar.

4. Mose 4:15 ပူးပေါင်းရင်းမြစ်များ

2. Samuel 15:24

Un ninna o rashai, o Zadok, his koi pashel, khetne kol tsele Levitarja. Un jon hidjran o mochton, kai o Debleskre deesh laba dren hi. Un pal o pani Kidron tchiwan le ko mochton tele ap i phub un hadan les pale pre har i tsele lurde dran o foro wergel o pani wan. Un o rashai Abjatar his ninna koi.

2. Samuel 6:13

Har kol hidjepangre, kai hidjran o Debleskro mochton, shob kope jek heri glan i wawar tchiwan, chatchran jon i gurum un i thulli terni grumni o Debleske.

1. Rajengro liil 8:3

Un har i tsele phureder dran Israel khetne his, hadan i rashaja o mochton kol deesh labentsa o baro Deblestar pre,

1. Familjakro liil 15:15

Un i Levitarja hidjran o mochton ap pengre phika i hidjepaskre kashtentsa, jaake har o baro Dewel penas kowa o Moseske, un kowa les i Israelenge penas.

1. Familjakro liil 15:2

An ko tsiro penas o David: “Kek hunte hidjrell o mochton o Debleskre deesh labentsa, har kokres i Levitarja, kolen rodas o baro Dewel win, te hidjrenn jon ko mochton, un te budrenn jon leske hako tsiro.”

1. Familjakro liil 23:26

Jaake hunte hidjran i Levitarja buder gar o Debleskro plachteno kheer un halauter, hoi koi dren his, har glan kowa kerdo was.

2. Mose 19:12

Pen lenge, har dur nai djan le, te denn le jak, te djal kek lendar ap koi berga. Kek tchiwell peskri heri ap i berga! Hakeno, koon kowa krella, hunte merell.

2. Mose 19:21

O baro Dewel penas ap o Mose: “Dja tele un pen lenge, te wenn le gar dureder pre, te dikenn le man. Te wenn le pre, hunte merenn bud lendar.

3. Mose 16:13

Kote tchiwell lo ko sungepaskro koowa ap i jag, te djal i jagakro ducho win un tchakrell ko pralstuno kotar ap ko mochton, kai o Debleskre deesh laba dren hi. Kowa hunte krell lo doleske, te merell lo gar.

4. Mose 1:50

Tu dess len gole, te budrenn jon an o Debleskro plachteno kheer, kai o Debleskre deesh laba dren hi, un ap halauter, hoi an kau kheer hi. Jon hunte hidjrenn o Debleskro kheer un halauter, hoi koi dren hi, un denn garda ap halauter, un tchiwenn pengre plachtene khera trul o Debleskro kheer.

4. Mose 1:51

Un te djan tumer dureder, tchiwenn kol Levitarja o Debleskro plachteno kheer khetne. Un te tchiwenn tumer tumare plachtene khera pre, palle tchiwenn i Levitarja o Debleskro kheer pale pre. Hako wawar, kai well pash o kheer, hunte merella.

4. Mose 10:21

Pal lende djan kol Kohatarja, un hidjran ko koowa o Debleskro plachteno khereske. Kau kheer hunte was pale pre-tchiddo, bis te kol Kohatarja pal wan.

4. Mose 18:3

Un kol wawar Levitarja hunte budrenn tuke, un krenn koi budi ap o tselo Debleskro kheer. O Debleskri chatchepaskri un ko tselo Debleskro koowa, koleha budreh tu an o Debleskro kheer, kowa taprenn le gar an, te merenn jon gar, un tumer lentsa.

4. Mose 3:38

Glan o Debleskro kheer, ap koi rig, kai o kham pre djala, hunte well koi platsa o Moseske un o Aroneske peskre tchawentsa, te denn jon garda, te well o Debleskri budi mishto kerdo i tsele Israelenge. Un te well i wawar pash o Debleskro kheer, te krell lo kai budi, hunte merell lo.

4. Mose 4:14

Un ko tselo koowa, kai budrenn jon peha, tchiwenn le koi pral pre: jagakre tchare, massengre forshette, bare roja, kolentsa lenn le i jagakri tchik krik, tchare, kai o rat dren wella, un ko tselo koowa, hoi koi pashel hi. Pral halauter tchiwenn le i latchi ledertikri plachta. Palle tchiwenn le kol hidjepaskre kashta an i gustria ap o bob.

4. Mose 4:19

un merenna gar ap ko tsiro, kai djan jon pash o Debleskro koowa! Doleske krenn jaake: O Aron un leskre tchawe djan glan lende an o Debleskro kheer dren un sikrenn hakeneste, hoi job hunte hidjrella.

4. Mose 4:20

I Kohatarja hunte djan gar kokres koi dren, witar gar dikenn jon o Debleskro koowa, te merenn jon gar.”

4. Mose 7:9

Kolen, kai wan pal o Kohat, das job tchi. Lengri budi his, te hidjrenn le o Debleskro koowa, hoi an leskro kheer his. Kowa hunte hidjrenn le ap pengre phika.

5. Mose 31:9

O Mose tchinas kal tchatchepaskre laba an i liil, un das les kol phureden pral Israel un kol rashajende dran o kheer Levi, kai o Debleskro mochton hidjran, kai o Debleskre deesh laba dren hi.

Josua 4:10

Un kol rashaja, kai ko mochton hidjrenn, atchan mashkral an o pani Jordan tardo, bis te halauter kerdo his, hoi o baro Dewel ap o Josua penas, te penell lo kowa i tsele menshenge, jaake har o Mose kowa ap o Josua penas. Un i tsele menshe djan sik wergel.

1. Samuel 6:19

An o foro Bet-Shemesh his menshe, kai dikan an o mochton, kai o Debleskre deesh laba dren hi. Un o baro Dewel maras lendar efta-deesh (70) murshen. Un i tsele menshe rowan, te das len o baro Dewel jaake phares.