4. Mose 18:9 - O Debleskro Drom 2021 (Sinte)

⁹ Tuke hi kol tsele kotja, hoi wenn gar pre-chatchedo kol tsele viechendar, hoi denn le mande, te well lengri doosh krik lino un te well lauter pale mishto, ninna ko tselo chapen, hoi denn le pashel. Kowa halauter hi mange kutch, un me dau les tute un tire tchawende.

O Debleskro Lab 2024 (Sinte-Manouche)

⁹ Touke hi kol tsele kotya, hoy venn gar pre-rhačedo kol tsele firhendar, hoy denn le mande, te vell lengri doosh krik lino oun te vell lauter pale mishto, ninna ko tselo rhapen, hoy denn le pashel. Kova halauter hi mange kouč, oun me dau les toute oun tire čavende.

4. Mose 18:9 ပူးပေါင်းရင်းမြစ်များ

2. Rajengro liil 12:17

Kol wawar lowe, hoi i menshe pashel dan, har anan le viechen o Debleske, te well lengri doosh krik lino, un te well lauter pale mishto, kol lowe was gar o baro Debleskro khereske lino. Kol lowe his i rashajenge kokres.

Nehemia 10:36

Ninna hako bersh dah o feteder halauterestar, hoi was baro ap mari phub un ap mare ruka, un anah kowa an o baro Debleskro kheer.

Ezekiel 42:13

O mursh penas ap mande: Kal isema, kolla ap i nordetikri rig, un kolla ap koi rig, kai o kham pralstunes tardo hi, hoi pash koi platsa tchiddo hi, hoi pal o Debleskro kheer hi, kolla hi kolenge, kai budrenn o Debleske. I rashaja, kai glan o baro Debleste pengri budi krenn, nai chan kote pengro kotar kolestar, hoi o Debleske anlo was, un hoi kokres i rashaja nai chan. An kal iseme tchiwenn le kowa, hoi o Debleske anlo was: ko djob, un ko mass kol viechendar, hoi i doshake maredo wan un doleske, te well lauter pale mishto. Kal iseme hi koleske, hoi o Debleske hi.

Ezekiel 44:29

Lengro chapen lenn le kolestar, hoi glan mande anlo well, ko djobestar un kol viechendar, hoi maredo wenn, te well i doosh un o pale-tchiddo koowa krik lino, un kol viechendar, hoi wenn maredo, te well lauter pale mishto. Ninna lenn le halauter, hoi i menshe mange ap i rig tchiwan.

3. Mose 10:17

“Hoske chan tumer ko mass gar ap i Debleskri platsa? Kau mass was i viechestar, hoi o baro Debleske anlo was, un his i rashajenge kokres, te chan le les. O baro Dewel das les tumende, te hidjrenn i doosh i Israelendar krik, te well lauter pale mishto mank lende un o baro Debleste.

3. Mose 14:13

Pal kowa marell lo ko terno bakres kote, kai wenn ninna vieche maredo, te well i doosh un o pale-tchiddo koowa krik lino, un kol wawar, kolengro tselo mass chatchedo well. Kai platsa hi i Debleskri platsa. Jaake har hi o rashajeske ko mass i viechestar, hoi well maredo, te well i doosh un o pale-tchiddo koowa krik lino, jaake hi ninna o rashajeske ko mass i viechestar, hoi well maredo, te well ko mensho pale erligo kerdo glan o Debleste. O mass sau viechestar, hoi o Debleske anlo was, nai chan kokres i rashaja un kek wawar.

3. Mose 2:10

Kowa, hoi pral atchell, hi o Aroneske un leskre tchawenge. Kowa hi i Debleskro chapen, un hi i rashajenge kokres.

3. Mose 22:11

I budepaskro, koles o rashai peskre lowentsa ginas, kowa nai chal kolestar. Ninna i budepaskres, kai an leskro kheer boldo was, kowa nai chal fun ko chapen.

3. Mose 22:7

Te djas o kham tele, palle hi lo pale erligo, un nai chal fun ko chapen, hoi o Debleske anlo was. Kowa hi kowa, kolestar job djiwell.

3. Mose 4:22

Te kras i pralstuno tchomone, hoi hunte krals lo gar, anas lo doosh ap peste, ninna te djinas job gar, te penas o baro Dewel: Ma kre kowa!

3. Mose 4:27

Te kras jek i Israelendar tchomone, hoi hunte krals lo gar, anas lo doosh ap peste, ninna te djinas job gar, te penas o baro Dewel: Ma kre kowa!

3. Mose 5:1

Te well jek glan i tchatchepangre anlo, te penell lo, hoi lo dikas un shunas, un job rikrell kowa peske, un penell tchi, ninna te dikas oder shunas lo, hoi koi his. Palle anas lo i doosh ap peste un hunte hidjrell lat.

3. Mose 5:6

Koi doshake hunte anell lo o baro Debleske i bakri oder i busni, un marell lat, te well leskri doosh krik lino. Un o rashai lell ko viecho un chatchrell leskro thulepen, un jaake krell lo, te well lauter pale mishto mank ko mensheste un o baro Debleste.

3. Mose 6:17

Un o baro Dewel penas ap o Moseste:

3. Mose 6:19

Ko rashai, kai leskre feteder kotja o Debleske chatchrell, chal o mass ap i glanstuni platsa glan o Debleskro plachteno kheer. Kaja hi i Debleskri platsa.

3. Mose 7:1

Jaake hunte well kerdo ko viecheha, hoi i menshe anenn, te well lengri doosh pale mishto kerdo. O mass sau viechestar nai chan kokres i rashaja un kek wawar.

3. Mose 7:6

I mursha un i mursh tchawe dran i rashajengre familje nai chan o mass ap i Debleskri platsa. Ko mass well i viechestar, hoi o baro Debleske anlo was. Doleske nai chal les kek wawar.

3. Mose 7:7

Jaake har pash ko viecho, hoi i doshake maredo well, jaake hi ninna pash ko viecho, hoi maredo well, te well o mensheskri doosh pale mishto kerdo. O viecheskro mass hi ko rashajeske, kai o viecheskro thulepen chatchrell, te well pale lauter mishto mank ko mensheste un o Debleste.

4. Mose 18:10

Ko chapen hi i Debleskro chapen. Doleske chan kowa ap i Debleskri platsa! Un kokres i mursha un mursh tchawe nai chan les.

5. Mose 18:1

I rashaja – jon hi lauter dran o kheer Levi, – kolla lenn kek them an Israel. Jon chan kolestar, hoi i wawar Israelitarja o baro Debleske anenn, te well kowa leske chatchedo.