3. Mose 6:13 - O Debleskro Drom 2021 (Sinte)

¹³ Ap ko diwes, kai well jek dran o kheer Aron an peskri budi dren tchiddo, te well lo miro rashai, hunte anell lo mange i khoro latcho jarro – jaake bud har ko chapaske lino well, hoi hako diwes o baro Debleske anlo well. Ko jek paash anell lo leske taissarlakro un ko wawar paash rati.

O Debleskro Lab 2024 (Sinte-Manouche)

¹³ Ap ko dives, kay vell yek dran o kheer Aron an peskri boudi dren čiddo, te vell lo miro rashay, hounte anell lo mange i khoro lačo yarro – yaake boud har ko rhapaske lino vell, hoy hako dives o baro Debleske anlo vell. Ko yek paash anell lo leske taysarlakro oun ko vavar paash rati.

3. Mose 6:13 ပူးပေါင်းရင်းမြစ်များ

2. Mose 29:1

Un kowa kre, te well o Aron un leskre tchawe rashaja mange. Le i terno gurum un dui mursh bakre, hoi sasto hi.

2. Mose 29:2

Le ninna latcho jarro, tchip kek shutlo jarro dren, un kre pesse un sane mare, ninna merklia. An i merklia tchip djet dren, un ap i sane mare mak djet pre.

2. Mose 29:40

Le ninna i khoro latcho jarro un jek litari olivtikro djet, un tchore o djet an o jarro, un kre les khetne, un tchip kowa pash ko bakro pashel! Un le jek litari mool un tchore les win glan o Debleste!

Jesaja 31:9

Un lengre sorele kurepangre hi har mulo i trashatar, un lengre pralstune mukenn koi pre-tchiddi plachta, hoi lengro sikepen his. Kowa penell o baro Dewel, kai ap i berga Zion khere hi, kai leskri jag chatchell. Un leskro bob hi an o foro Jerusalem.

Ezekiel 40:46

Un koi isema, kolakri glanstuni rig kote sikrell, kai norden hi, hi kol rashajenge, kolla pengri budi ap i chatchepaskri krenn. Kolla hi kol mursha, kolengro dad o Zadok his. I tsele murshendar, kai wenn dran o kheer Levi, hi jon kokres kolla, kai nai wenn glan o baro Debleste, te budrenn le leske.

3. Mose 6:12

Un o baro Dewel penas ap o Mose:

3. Mose 6:14

An o sasterno tcharo well o jarro khetne kerdo o djeteha, palle peklo, an kotja phagedo un o baro Debleske chatchedo. Un ko latcho sungepen, hoi well win, sungell mishto o baro Debleske.

3. Mose 6:9

Ko jarro un ko djet, hoi pral atchell, kowa hi o Aroneske un leskre mursh tchawenge. Te krenn le pengro maro kolestar, hunte tchiwenn le kek shutlo jarro dren. Ap koi platsa glan o Debleskro plachteno kheer hunte chan le les. Kaja hi i Debleskri platsa. Kau chapen dell o baro Dewel lenge kolestar, hoi i menshe leske anan. Kowa hi i Debleskro chapen. Doleske nai chan les kokres i rashaja, jaake har ninna ko mass kol viechendar, hoi wenn maredo, te well i doosh un o pale-tchiddo koowa krik lino, un o mass kol viechendar, hoi wenn maredo, te well i doosh pale mishto.

3. Mose 9:24

I jag djas win o baro Deblestar, un chatchras ko mass pre kol viechendar, koleskro tselo mass chatchedo well, ninna kol thulle kotja, hoi ap o Debleskri chatchepaskri tchiddo his. Har kowa i tsele menshe dikan, dan le i bachtjatar gole, un tchiwan pen tele glan o baro Debleste ap i phub.