3. Mose 4:31 - O Debleskro Drom 2021 (Sinte)

³¹ Un o tselo thulepen tchinell lo tele, jaake har tchinell lo o thulepen tele ko viechestar, hoi jek o Debleske anell, te chan le les khetne glan leste. Un ko rashai chatchrell kal thulle kotja ap o Debleskri chatchepaskri, te well i latcho sungepen win, hoi baro Debleske mishto sungella. Jaake krell o rashai, te well lauter pale mishto mank ko mensheste un o baro Debleste. Un o baro Dewel bistrell leskri doosh.

O Debleskro Lab 2024 (Sinte-Manouche)

³¹ Oun o tselo thulepen činell lo tele, yaake har činell lo o thulepen tele ko firhestar, hoy yek o Debleske anell, te rhan le les khetne glan leste. Oun ko rashay rhačrell kal thoulle kotya ap o Debleskri rhačepaskri, te vell i lačo soungepen vin, hoy baro Debleske mishto soungella. Yaake krell o rashay, te vell lauter pale mishto mank ko mensheste oun o baro Debleste. Oun o baro Devel bistrell leskri doosh.

3. Mose 4:31 ပူးပေါင်းရင်းမြစ်များ

1. Mose 8:21

Un o baro Dewel sungas ko latcho sungepen un penas ap peste: “Me dau man sowel, te anau buder gar hawi bari bibacht pral i phub doleske, hoi i menshe krenna. Djinau, o mensheskro dji hi tchilatcho fun tiknes pre. Me kamau buder gar o tselo djipen ap i phub te marell, jaake har krom.

Esra 6:10

Palle nai chatchrenn le kol viechen jaake o bolepaskro Debleske, te dikell lo latches ap lende, un jon nai mangenn lestar latchepen mange, miro djipen un koleske mire tchawendar.

Hiob 42:8

Kanna lenn efta terne gurma un efta bakre un djan pash o Hiob, un marenn kol viechen kote, un chatchrenn len mange! Un o Hiob, koles miro tchatcho wast hi, hunte mangell man tumenge. Ap koleste shunau un krau tumentsa gar, har hunte kroms. Tumer rakran gar o tchatchepen pral mande har job kras.”

2. Mose 29:18

Un chatche o tselo bakro ap i chatchepaskri, jaake te djal lauter pre an i jagakro ducho. Ko bakro hi mange, o baro Debleske, un well tseles chatchedo. Un o latcho sungepen, hoi well win, sungell mange mishto.

Jesaja 42:21

O baro Dewel hi o tchatchepaskro. Doleske his leske shukar, te sikrell lo, har baro un railo leskre tchatchepaskre laba hi.

Jesaja 53:10

O baro Dewel kamas kowa jaake, te was lo phagedo. Job mukas ap leste duka te well. Pal kowa, kai das lo peskro djipen i doshake i menshendar, dikell lo tchawen, kai lestar wenna, un djiwell i lengsto djipen. Un kowa, hoi o baro Dewel peske glan las, well lestar kerdo.

3. Mose 1:17

Palle taprell o rashai o tchirkleskre mussja un tserdell o tchirkles pre, un chatchrell les ap i kasht pral i jag, hoi ap i chatchepaskri hi. Jaake hunte well i tchirklo anlo glan o Debleste, hoi well leske tseles chatchedo. Un o latcho sungepen, hoi well win, sungell mishto o baro Debleske.

3. Mose 1:9

I buke un i herja hunte wan thodo. Kowa krell ko mursh, kai anas ko vieches. Un o rashai mukell halauter ap i chatchepaskri pre te chatchrell. Jaake hunte well i viecho anlo glan o Debleste, hoi well leske tseles chatchedo. Un o latcho sungepen, hoi well win, sungell mishto o baro Debleske.

3. Mose 14:18

Ko djet, hoi gomme an leskro wast hi, makell lo ap o shero kolestar, kai sasto was. Jaake krell lo les pale erligo glan o baro Debleste.

3. Mose 15:15

Ko rashai marell koi jek, te well ko pale-tchiddo koowa krik lino, un koi wawar, te well li tseles chatchedo o baro Debleske. Jaake krell o rashai, te well ko mursh, kai dran peskro nasslepen pale-tchiddo his, pale erligo glan o baro Debleste.

3. Mose 19:22

Ko rashai marell ko bakro glan o baro Debleste, te well ko mursheskri doosh pale mishto. Un o baro Dewel bistrell leskri doosh, hoi lo ap peste anas.

3. Mose 2:2

Un job anell kowa pash i rashajende dran o kheer Aron. Jek lendar lell i wast pherdo jarro o djeteha un ko tselo sungepaskro koowa, un mukell kowa ap i chatchepaskri te chatchrell. Kowa sikrell, kai ko tselo chapen, hoi anlo was, o Debleske hi. Un o latcho sungepen, hoi well win, sungell mishto o baro Debleske.

3. Mose 2:9

Un o rashai lell tchomone lestar un chatchrell les ap i chatchepaskri. Kowa sikrell, kai ko tselo chapen, hoi anlo was, o Debleske hi. Un o latcho sungepen, hoi well win, sungell mishto o baro Debleske.

3. Mose 4:19

Palle tchinell lo o tselo thulepen dran ko viecho win un chatchrell les ap o Debleskri chatchepaskri.

3. Mose 4:26

Un o tselo thulepen chatchrell lo ap i chatchepaskri jaake, har chatchrell lo o thulepen ko viechestar, hoi jek o Debleske anell, te chan le les khetne glan leste. Jaake krell o rashai, te well lauter pale mishto mank o pralstuneste un o baro Debleste. Un o baro Dewel bistrell leskri doosh.

3. Mose 4:35

Un o tselo thulepen tchinell lo tele jaake har tchinell lo o thulepen tele ko bakrestar, hoi jek o Debleske anell, te chan le les khetne glan leste. Un ko rashai chatchrell kal thulle kotja ap o Debleskri chatchepaskri khetne ko wawar masseha, hoi o baro Debleske chatchedo well. Jaake krell o rashai, te well lauter pale mishto mank o baro Debleste un ko mensheste, kai doosh ap peste anas. Un o baro Dewel bistrell leskri doosh.

3. Mose 5:10

Un koi wawar tauba chatchrell lo jaake, har o baro Dewel penas, te well kerdo i viecheha, hoi tseles chatchedo well. Jaake krell o rashai, te well lauter pale mishto mank ko mensheste un o baro Debleste. Un o baro Dewel bistrell koi doosh, hoi ko mensho ap peste anas.

3. Mose 5:6

Koi doshake hunte anell lo o baro Debleske i bakri oder i busni, un marell lat, te well leskri doosh krik lino. Un o rashai lell ko viecho un chatchrell leskro thulepen, un jaake krell lo, te well lauter pale mishto mank ko mensheste un o baro Debleste.

3. Mose 8:21

Un job thowas leskre buke un leskre herja o panjeha, un tchiwas len ninna ap i chatchepaskri, un mukas ko tselo vieches pre te chatchrell ap o Debleskri chatchepaskri. Jaake har o baro Dewel penas, was ko tselo bakro leske chatchedo. Un o latcho sungepen, hoi was win, sungas mishto o baro Debleske.

4. Mose 15:25

Un jaake krell o rashai i tsele menshenge Israel, te well lauter pale mishto mank lende un o Debleste. Un koi doosh well lendar krik lino, – koi doosh, kolatar jon gar djinan, kai kaja i doosh hi, un kolake jon viechen anan un chapen chatchepaske o baro Debleske.

Mateo 3:17

Un i rakepen dran o bolepen penas: “Kawa hi miro tchawo, koles me kamau. Pral leste hom me bachtelo.”

Efesarja 5:2

un djiwenn an o kamlepen, jaake har o Jesus Kristo peskro kamlepen mende sikras, har job menge meras. Un jaake das lo peskro djipen o Debleske. Un o Dewel dikas latches ap leste.

Hebrearja 1:3

O Debleskro tchawo hi railo un baro har o Dewel. Un kowa, hoi hi o Debles an o dji, hi ninna o tchawes an o dji. Dran leskro sorelo lab rikrell lo lauter khetne, hoi job kras. O Debleskro tchawo las mari doosh un maro tchilatchepen mendar, un job beshas pes ap i tchatchi rig o baro Deblestar an o bolepen.

Hebrearja 10:12

O Jesus Kristo das pes jek kopo an o merepen, te lell lo i doosh i menshendar krik, un beshas pes hako tsireske ap o Debleskri tchatchi rig. Kote dikell lo ap ko diwes, kai wenn kolla tel leskre pire tchiddo, kai kaman les gar.

Hebrearja 10:14

Jek kopo meras o Jesus Kristo kolenge, kai wenna pash o Debleste, un kras len hako tsiro tchatcho un erligo glan leste.

Hebrearja 9:12

Har o Jesus an o Debleskro kheer an o bolepen djas, anas lo gar i bakrengro rat peha, witar gar i grumjengro rat. Na-a. Peskro rat anas lo glan o Debleste. Kowa kras lo jek kopo un gar bud kope. Un jaake las lo mari doosh hako tsireske mendar.

1. Johanni 1:7

Mer te djiwah khetne o Debleha an o tchatchepen, jaake har o Dewel an o tchatchepen tardo hi, palle nai ham mer ninna lauter khetne an o tchatchepen. Un o rat leskro tchawestar thowell mari tseli doosh mendar tele.

Debleskro tsiro 5:9

Un jon giwenn i newi gili, un penenn: Tu hal moldo, te less ko liil, un te kress ko liil pre. Tu wal maredo, un plaissral tiro rateha, te giness menshen tiro Debleske. Kolla wenna dran hako them, haki natsjona, haki harmenatsjona un hako rakepen.