3. Mose 4:3 - O Debleskro Drom 2021 (Sinte)

³ Te hi kowa o pralstuno rashai, kai rikras pes gar ap o Debleskro lab, un anas jaake doosh ap i tsele Israelitarjen, palle lell lo i terno gurum, hoi gar nasselo hi, un anell les o baro Debleske, te well leskri doosh, hoi lo ap peste anas, krik lino.

O Debleskro Lab 2024 (Sinte-Manouche)

³ Te hi kova o pralstouno rashay, kay rikras pes gar ap o Debleskro lab, oun anas yaake doosh ap i tsele Israelitaryen, palle lell lo i terno gouroum, hoy gar nasselo hi, oun anell les o baro Debleske, te vell leskri doosh, hoy lo ap peste anas, krik lino.

3. Mose 4:3 ပူးပေါင်းရင်းမြစ်များ

2. Familjakro liil 29:21

Un jon anan efta terne gurma, un efta mursh bakre un efta terne bakre un efta mursh busja, te marenn un chatchrenn le len o baro Debleske, te nai well i doosh krik lino o rajeskro kherestar, un o Debleskro kherestar un i tsele menshendar an o them Juda. Un o Hiskija penas ap i rashajende dran o kheer Aron, te chatchrenn le i viechen ap i chatchepaskri o baro Debleske.

Esra 8:35

Un kol menshe, kai wan pale dran o pandepen, anan viechen o Israeleskro Debleske, un maran len leske: 12 (deesh-te-dui) terne gurma i tsele menshenge an Israel, 96 (enja-deesh-te-shob) mursh bakre, 77 (efta-deesh-te-efta) terne bakre. Ninna anan le 12 (deesh-te-dui) mursh busja, kai wan maredo, te well i doosh i menshendar krik lino. Un kol tsele vieche wan pre chatchedo o baro Debleske.

2. Mose 29:14

O mass, i hauta un ko chapen, hoi an i buke hi, chatchress tu win glan koi platsa, kai tumer djiwenna. Kowa lauter well jaake kerdo, te well i rashajengri doosh krik lino.

2. Mose 29:21

Le ko ratestar, hoi ap o Debleskri chatchepaskri hi, un tchip les an o makepaskro djet un witse les ap o Aron un leskre koola un ap leskre tchawende un lengre koola, te well job un leskre koola o Debleske, ninna leskre tchawe un lengre koola, te wenn le o Debleske.

2. Mose 29:7

Le o makepaskro djet un tchore les pral leskro shero, mak les o Debleske!

2. Mose 30:10

Jek kopo an o bersh lell o Aron o rat o bakrestar, hoi maredo was, te lell lo i doosh krik, un djal pash o Debleskro sonakaskro bob un makell ko rat ap i shinga, hoi pral ap o bob hi. Kowa krell lo, te well i doosh krik lino, hoi ap o bob hi. Ninna pash tumare tchawende un kolende, kai pal lende wenna, well kowa hako bersh jek kopo jaake kerdo. O sonakaskro bob hi o baro Debleske kokres.

Ezekiel 40:39

Un an i wudareskri halla fun kau wudar his star chapangre tardo, dui ap haki rig. Un ap lende wenn kol vieche maredo, hoi o Debleste dino wenn, kolla kai wenn tseles chatchedo, un kolla kai wenn maredo, te well i doosh krik lino, ninna kolla kai wenn maredo, te well lauter pale mishto.

Ezekiel 43:19

Kokres i rashaja dran o kheer Levi, kolengro phuro dad o Zadok hi, nai wenn glan mande, te budrenn le mange. Kawa penell o baro Dewel, maro rai. Kal rashajenge dess tu i terno gurum, te marenn le les, te well i doosh i menshendar krik lino.

Ezekiel 44:27

Ap ko diwes, kai djal lo pale ap koi tikni glanstuni platsa, te krell lo peskri budi an miro kheer, hunte marell lo mange i vieches, te well o pale-tchiddo koowa lestar krik lino. Kawa penau me, o baro Dewel, tumaro rai.

3. Mose 1:10

Te kamell jek i bakro oder i busni o baro Debleske te anell, te well ko viecho tseles leske chatchedo, palle anell lo i murshkano viecho, hoi gar nasselo hi.

3. Mose 1:3

Te kamell lo leske i grumni te anell, te well li leske tseles chatchedo, palle hunte lell lo i murshkani grumni, hoi gar nasselo hi. Un job anell lat glan o wudar o Debleskro plachteno kherestar, te dikell o baro Dewel latches ap leste.

3. Mose 16:11

O Aron marell ko gurum, te well i doosh un o pale-tchiddo koowa lestar un leskri familjatar krik lino, un jon tchatcho un erligo tardo hi glan o baro Debleste.

3. Mose 16:3

Te djal lo koi dren, hunte anas lo glan kowa i terno gurum, hoi well maredo, te well i doosh un o pale-tchiddo koowa krik lino, ninna hunte anas lo i bakro, koleskro tselo mass chatchedo well o Debleske.

3. Mose 16:5

I Israelitarja anenn leske dui mursh busja un jek bakro. I busja wenn maredo, te well i doosh un o pale-tchiddo koowa krik lino. Un o bakro well maredo, te well leskro tselo mass chatchedo o Debleske.

3. Mose 16:6

O Aron anell peske un peskri familjake i gurum, te well lo maredo, te well lengri doosh un lengro pale-tchiddo koowa krik lino, un lauter pale mishto mank o baro Debleste un lende.

3. Mose 4:14

Te haiwenn le pal i tsiro, kai kowa, hoi jon kran, gar tchatcho his glan o Debleskre jaka, palle hunte anenn le i terno gurum o baro Debleske, te well lengri doosh krik lino. Jon hunte anenn les glan o wudar o Debleskro plachteno kherestar.

3. Mose 4:23

Te haiwell lo pal i tsiro, kai kowa, hoi lo kras, gar tchatcho hi glan o Debleskre jaka, palle hunte anell lo leske i mursh busni, hoi gar nasselo hi.

3. Mose 4:28

Te haiwell lo pal i tsiro, kai kowa hoi lo kras, gar tchatcho hi glan o Debleskre jaka, palle hunte anell lo leske i busni, hoi gar nasselo hi. Kowa hunte krell lo, te well leskri doosh krik lino.

3. Mose 4:5

Un o pralstuno rashai lell o ratestar un hidjrell les an o plachteno kheer.

3. Mose 5:6

Koi doshake hunte anell lo o baro Debleske i bakri oder i busni, un marell lat, te well leskri doosh krik lino. Un o rashai lell ko viecho un chatchrell leskro thulepen, un jaake krell lo, te well lauter pale mishto mank ko mensheste un o baro Debleste.

3. Mose 6:18

Pen o Aroneske un leskre mursh tchawenge, har i viecheha kerdo well, hoi i menshe o baro Debleske anenn, te well lengri doosh krik lino. Glan o baro Debleskro kheer, ap koi platsa, kai well ninna ko viecho maredo, koleskro tselo mass chatchedo well, ap kai platsa maress tu ninna ko vieches, hoi hunte merell, te well i doosh krik lino. O mass sau viechestar, hoi o Debleske anlo was, nai chan kokres i rashaja un kek wawar.

3. Mose 8:12

Palle las o Mose ko djet, un tchoras kolestar ap o Aroneskro shero, un kras jaake, te well job o baro Debleskro rashai.

3. Mose 9:2

un penas ap o Aron: “Le tuke i terno gurum un i mursh bakro, ko gurum, te well lo maredo, te well i doosh krik lino, un ko bakro, te well lo maredo, un leskro tselo mass o baro Debleske chatchedo. Kal dui hunte wenn sasto. Kolla an glan o baro Debleste:

3. Mose 9:3

Un rake i Israelentsa un pen lenge: Anenn jek mursh busni, hoi well maredo, te well i doosh krik lino, ninna i terno gurum un i terno bakro, hoi jek bersh phuro hi, te well lengro mass tseles chatchedo o Debleske. Kol dui hunte wenn sasto.

4. Mose 16:22

Kol dui mukan pen ap pengro mui te perell, un penan: “Ach Dewel, tu hal o Dewel, kai das hakenes o djipen! Te kras jek mursh i tchilatcho koowa, kameh tu doleske tiri choli pral i tsele menshende te tchiwell?”

4. Mose 8:8

Tu less i terno gurum, un koi pashel chapen o Debleske: jarro, kai djet mashkral hi. Un i wawar terno gurum less tu chatchepaske o Debleske, te well i doosh krik lino.

Remarja 8:3

O Moseskre laba nai dan ko djipen gar. I menshe nai kran kowa gar, hoi an o Moseskre lila tchinlo hi. Ko tchilatchepen, hoi an lende his, mukas len gar te krell, hoi o Dewel lendar kamas. Doleske penas o Dewel: “O tchilatchepen hunte merell.” Un job bitchras peskro tchawes, te well lo i mensho har mer, kai tchilatcho ham. Job las maro tchilatchepen ap peste un meras. Un jaake meras o tchilatchepen leha un nashras peskri soor pral mende.

2. Korintarja 5:21

O Dewel tchiwas mari tseli doosh ap maro rajeste, o Jesus Kristeste, kai job kek tchilatchepen kras, te was mer tchatcho un erligo glan o Debleskre jaka.

Hebrearja 5:3

Doleske hunte marell lo ninna peske i vieches, un anell les glan o Debleste, te well leskri doosh krik lino, jaake har job i wawar menshenge viechen marella, un glan o Debleste anella.

Hebrearja 9:12

Har o Jesus an o Debleskro kheer an o bolepen djas, anas lo gar i bakrengro rat peha, witar gar i grumjengro rat. Na-a. Peskro rat anas lo glan o Debleste. Kowa kras lo jek kopo un gar bud kope. Un jaake las lo mari doosh hako tsireske mendar.