3. Mose 26:36 - O Debleskro Drom 2021 (Sinte)

^36-37 Kolla, kai tumendar pral atchenn an kol wawar themma, kai le pandle hi, kolen krau jaake dareno, te well len daar glan i patri, hoi krik phurdedo well. Lestar nashenn le, har te lals jek len o chareha palla. Un jon perenn, un jek perell pral o wawareste, ninna te hi kek koi, kai len palla las. Un tumen hi kek soor, te kurenn tumen kolentsa, kai ap tumende djan.

O Debleskro Lab 2024 (Sinte-Manouche)

^36-37 Kolla, kay t'mendar pral ačenn an kol vavar themma, kay le pandle hi, kolen krau yaake dareno, te vell len daar glan i patri, hoy krik phourdedo vell. Lestar nashenn le, har te lals yek len o rhareha palla. Oun yon perenn, oun yek perell pral o vavareste, ninna te hi kek koy, kay len palla las. Oun t'men hi kek zoor, te kourenn t'men kolentsa, kay ap t'mende djan.

3. Mose 26:36 ပူးပေါင်းရင်းမြစ်များ

1. Mose 35:5

Un jon kran pen ap o drom. Un o Dewel tchiwas i daar ap kol menshende, kai djiwan an i forja trul lende. Un kolla lan len gar palla.

1. Mose 4:12

Te kreh tiri budi ap i hachetikri phub, well kote tchi tuke baro. Tu hunte djas trujel ap i phub. Tut wella kek them, kai khere hal.”

2. Familjakro liil 14:14

Ninna djan le ap i plachtene khera pre, kai kolla djiwan, kai dan garda ap pengre vieche, un lan bud bakre un khamele pentsa. Pal kowa djan le pale an o foro Jerusalem.

Hiob 13:25

Hoi hom me? – I patri, hoi o rukestar tele phurdedo was, un i kotar phuss, hoi i ducho krik hidjrell. Hoske kreh mange daar un leh man palla?

Debleskri gili 53:5

“Kolla, kai o tchilatcho koowa krenna, haiwenn tchi”, penell o Dewel, – “kolla, kai mire menshen chana har i kotar maro. Man denn le gar an-gole.”

Debleskri gili 53:6

Ap jek kopo taprenn le i traash, ninna te hi tchi koi, hoi len nai traash krella. O Dewel marell kolen, kai ap peskre menshende pre djan. Un lengre kokale atchenn tchiddo un wenn gar paskedo. O Dewel tchiwas len pale.

Debleskri gili 89:43

Kolla, kai ap leste djan, mukal, te hadenn le pen. Un kral kolen bachtelo, kai leske tchilatchepen kamenn.

Gosewe laba 28:1

O tchilatcho hi ap o naashepen, ninna te lell les kek palla. Kowa, kai an o tchatchepen tardo hi, hi har i terno lewo un darell tchi.

Jesaja 30:17

I sero mursha tumendar nashenn penge glan jekeste, kai peskro mui pre krell un penell ‘Kanna lenn tumare dawa.’ Awa, glan pantch sawendar nashenn tumer lauter krik. Tumare tsele lurdendar atchell tchi pral har koi plachta ap i kasht, hoi pre tardo tchiwan pral ap i berga, te dikenn le lat fun dural.

Jesaja 7:2

Un har o baro rajeske pral Juda penlo was, kai tchiwan i Syrarja pengre plachtene khera pre an o Efrajimeskro them, kote trissas lo i trashatar. Un ninna i tsele menshe an Juda trissan jaake har i ruka an i wesha trissenn, te phurdell i sorelo ducho.

Jesaja 7:4

Un pen ap leste: “De jak! Atch pokones! Ab sorelo un ma traash glan kol dujende, o Rezin, ko Syrari, un o Pekach, koleskro dad o Remalja hi. Ninna te hi le chojedo, hi le tchi wawar har tele chatchedo kasht, kai gomme jagakro ducho pre djal.

Jeremia 37:10

Te nai marans tumer ninna i tsele lurden dran o them Babilonia khetne, kolla kai kurenn pen tumentsa, un te atchans lendar kokres i wast pherdo pral, kai dukedo hi, palle stakrans le dran pengre plachtene khera pre, un chatchrans kau fores tele.

Jeremia 46:16

Job krella, kai bud lendar perenna, un jek ap o wawareste ap i phub tchiddo hi. Kote penenn i lurde: Awenn, mer djas pale pash mare menshende, an kol themma, kai khere ham! Awenn, nashas glan kal marepaskre chare!

Ropaskre gilja 1:3

I menshe dran Juda hi pandle budepangre, hunte budrenn tel dawa, un djiwenn an wawar themma. Ninna kote hunte well len daar. Halauter, kai len palla lenn, wenna un rikrenn pengro wast ap lengri meen.

Ropaskre gilja 1:6

O foro Zion nashras peskro tselo shukapen! Leskre pralstune hi har tserfe, kai hatsenn kek senlepen. Un wi-bokedo hi len kek soor, te nashenn le penge glan kolende, kai len palla lenn.

Ropaskre gilja 4:19

Kolla, kai men palla lan, his sikeder har i adlarja tel o bolepen. Ap o pralstuno them lan le men palla, un an o mulo them luran le menge pre.

Ezekiel 21:12

Un te putchenn le tutar: Hoske le tu jaake phares ducho? Palle peness: Shunom djungelo rakepen, hoi gomme well. Koon kowa shunell, koles taprell i bari daar. An leskre wasta hi buder kek soor. Leskro dji dell sik. I darjatar nai rikrell lo peskro pani gar. O tsiro hi kai, kowa well sik! Tchatchepah, kowa well, penell o baro Dewel, maro rai.

Ezekiel 21:15

Mishto tchinell lo. te marell lo bud menshen. Un djudjo kerdo hi lo, jaake djudjo har i blendari. Ma penenn: “Mer nai wah bachteles. Maro rai sal pral i tsele wawar rajende.”

Ezekiel 21:7

Tu, mensho, dik kote, kai o foro Jerusalem hi! Rake kolestar, hoi djal o khereske, kai well o Dewel an-mangedo! Un pen i menshenge an o them Israel, hoi pral lende wella!

Hosea 8:3

witsrenn le ap i rig, hoi latcho hi. Doleske lenn len i lurde dran wawar themma palla.

3. Mose 26:17

Me dikau buder gar latches ap tumende, un tumer wenn dino kolendar, kai kurenn pen tumentsa. Kolla, kai kamenn tumaro merepen, wenn rai pral tumende. Tumer han ap o naashepen, ninna te lell tumen kek palla.

5. Mose 1:44

Un i Amorarja, kai kote djiwan, wan win un djan ap tumende pre, un tradan tumen an o them Seir, har biene jekes palla lenn. Un dan tumen pash o foro Horma.

Josua 5:1

Un i tsele bare raja pral i Amorarja, kai ap koi rig o panjestar Jordan djiwan, kai o kham tele djal, ninna i tsele bare raja pral i Kanaanitarja, kai pash o Baro Pani djiwan, kolla halauter shunan, har las o baro Dewel o pani dran o Jordan krik glan i Israelitarja, bis te jon halauter ap i wawar rig his. Un har jon kowa shunan, was bari traash ap lende, un an kekeste atchas i soor te djal lo pre ap i Israelitarja.

Josua 7:5

Un kolla lan len palla pash o foreskro baro wudar, un tradan len kote, kai i berga pral tele djal. Kote dan le 36 (trijanda-te-shob) murshen lendar mulo. Koi wan i djia i tsele menshendar har pani darjatar.

1. Samuel 17:24

Har i mursha dran Israel ko murshes dikan, djan le i bari darjatar pale.