3. Mose 26:31 - O Debleskro Drom 2021 (Sinte)

³¹ Me mukau tumare forja an kotja te dell, un dau kol platse paash, kai tumare chochene deblen an-mangan. Un kowa, hoi tumer mange chatchrenn, un ko latcho sungepen, hoi well win, kowa kamau buder gar te sungell.

O Debleskro Lab 2024 (Sinte-Manouche)

³¹ Me moukau t'mare forya an kotya te dell, oun dau kol platse paash, kay t'mare rhorhene deblen an-mangan. Oun kova, hoy t'mer mange rhačrenn, oun ko lačo soungepen, hoy vell vin, kova kamau bouder gar te soungell.

3. Mose 26:31 ပူးပေါင်းရင်းမြစ်များ

1. Mose 8:21

Un o baro Dewel sungas ko latcho sungepen un penas ap peste: “Me dau man sowel, te anau buder gar hawi bari bibacht pral i phub doleske, hoi i menshe krenna. Djinau, o mensheskro dji hi tchilatcho fun tiknes pre. Me kamau buder gar o tselo djipen ap i phub te marell, jaake har krom.

2. Rajengro liil 22:19

Un kral tiro dji lenge pre. Un kral tut tiknes glan o baro Debleste, har tu shunal, hoi me penom pral kau foro un kol menshende, kai kate djiwenna, te djal lenge jaake djungeles, te atchell wawar menshenge o rakepen krik i trashatar. Un kowa, kai kamell te well i bibacht pral i wawareste, penella: ‘Tuke te djal, har djas o foreske Jerusalem!’ Har tu kowa shunal, kral tire koola paash, kai ap tute his, un rowal glan mande. Doleske shunom me tut ninna”, penell o baro Dewel.

2. Familjakro liil 36:19

Kol lurde dran o them Babilonia chatchran o baro Debleskro kheer un phagan o foreskre massurja tele. Un i tsele turme chatchran le i jagatar win. Un jaake was lengro tselo kutch koowa chatchedo an i jag un buder tchi moldo.

Nehemia 1:3

Un jon penan mange: “Kol menshe an o them Juda, kai wan gar pandles krik anlo, djiwenn an bari bibacht un ladj. Un i massuri trul Jerusalem hi tele phagedo, un i bare wudja hi pre-chatchedo.”

Nehemia 2:17

Kanna penom ap lende: “Tumer dikenn kai bibacht, an kalate mer ham: o tselo foro Jerusalem hi paash dino koi tchiddo. Un leskre wudja hi tele chatchedo. Awenn, te tchiwas mer i massurja trul o foro Jerusalem pale pre, jaake te nai praassenn le men gar buder.”

Nehemia 2:3

Un me penom ap o rajeste: “Baro rai, te djiwess hako tsireske! Har nai well mange gar ropaske? Ko foro, kai mire phure paskedo hi, hi paash kerdo. Un leskre bare wudja hi pre chatchedo.”

Jesaja 1:7

Tumaro them hi i mulo them, tumare forja wan tele chatchedo. Glan tumare jaka chan i wi-themarja kowa, hoi ap tumari phub bares was. Lauter hi mulo un paash, har te perans i diwje koi pral.

Jesaja 6:11

Un me putchom: “Har rah, rai?” Un job penas: “Bis te buder kek menshe an i forja djiwenn, witar kek mensho an i khera, un ko hachetikri phub har i mulo them was.”

Jesaja 63:18

I tikno tsiro tradan menshe dran wawar themma men, tire menshen, dran maro them. Kolla, kai kuran pen mentsa, stakran tiro kheer khetne, kai tu khere hals.

Jesaja 64:9

Tire forja wan har i mulo them. O foro Jerusalem hi paash dino un i berga Zion muklo.

Jesaja 66:3

Kowa, kai mange i gurum marell, marell ninna i menshes i chocheno debleske. Kowa, kai mange i terno bakro temerl dell, marell ninna i djukles i chocheno debleske. Kowa, kai mange chapen glan anell, anell ninna balengro rat i chocheno debleske. Kowa, kai mange sungepaskro koowa chatchrell, parkrell pes ninna pash i chocheno debleste. Jon djan pengre dromma jaake har jon les kamenna. Un shukar hi an lengre jaka, hoi an mire jaka djungeles hi.

Jeremia 22:5

Te shunenn tumer gar ap kal laba, well kau kheer paash dino. Kowa dom man sowel pash mande kokres, penell o baro Dewel.

Jeremia 26:6

palle krau kau khereha har ko khereha an Shilo. Un me krau, te penenn i wawar menshe, te kamenn le jekes te praassell: Mu djal tuke har o foreske Jerusalem!

Jeremia 26:9

Hoske peneh tu glan-wi an o baro Debleskro lab: Kau khereske djal har koleske an Shilo? Hoske peneh, kai kau foro well jaake paash dino, te djiwell buder kek koi dren?” Un i tsele menshe wan trul leste an o baro Debleskro kheer.

Jeremia 4:26

Me dikom pal ko latcho them. Kowa was i mulo them. Un i tsele forja his paash tchiddo glan o baro Debleste un leskri soreli choli.

Jeremia 4:27

O baro Dewel penas: Ninna te well kai tseli phub har i mulo them, kamau gar lauter paash te krell.

Jeremia 4:7

I marepaskro, hoi marell i menshen an bud themma, stas pre. Har i lewo, hoi well dran o weesh, kras lo pes ap o drom, te dell job tumaro them paash un chatchrell tumare forja jaake, kai nai djiwell kek koi dren.

Jeremia 44:2

Kawa penell o baro Dewel, ko rai pral o bolepen un i phub, kai o Israeleskro Dewel hi: Tumer dikan koi tseli bibacht, kai me mukom pral o foro Jerusalem te well, un pral kol tsele forja an o them Juda; kau diwes hi lendar tchi har barra pral, un kek djiwell buder an kol forja.

Jeremia 44:6

Doleske was miri choli jaake baro, un chatchas har i jag an i forja an o them Juda un ap i dromma an o foro Jerusalem, te atchas lendar tchi har barra pral. Un kek nai djiwell kote, jaake har ap kau diwes hi.

Jeremia 52:13

Un job chatchras o baro Debleskro kheer tele, ninna ko kheer o baro rajestar un kol wawar khera an o foro Jerusalem; awa, hako baro kheer chatchras lo tele.

Jeremia 9:11

Me putchom: Baro Dewel, hoske chatchell ko them un well mulo, jaake kai nai djal kek buder koi trujel? Koon hi gosewo un haiwell kowa? Ap koneste penal tu kowa, jaake te penell job kowa i wawarenge?

Ropaskre gilja 1:1

Jerusalem, har muklo hal koi tchiddo, tu, kai hals pherde menshe! An-diklo hals pash i tsele themma. Kanna hal kokres har i romni, kolakro rom meras. I rajetsa hals pral wawar themma. Kanna hunte budress i wawarenge.

Ropaskre gilja 1:10

Un jon tchiwan pengre wasta ap lakro tselo kutch koowa. Joi hunte dikas peske jakentsa, har i wawar menshe an lakro Debleskro kheer dren djan. Un tu, baro Dewel, penal, te hunte djan jon gar kote dren.

Ropaskre gilja 2:6

Job phagas peskro kheer tele, har te wals lo i kashteno kheer an i baar, un kras koi platsa paash, kai wam khetne glan leste. Job kras, te well buder kek an o foro Zion ap i bare diwessa un ap o Debleskro diwes. An peskri soreli choli tchiwas lo o baro rajes un i rashajen pale.

Ropaskre gilja 2:7

Fun peskro altaro kamell lo buder tchi te djinell. Peskro khereske sikrell lo o dumo. Leskre massurja das lo kolenge an o wast kai maro foro paash kran, un koi pashel i bari gole dan an o baro Debleskro kheer, har an kol bare diwessa, kai kote bud menshe khetne wan.

Ezekiel 12:20

An kol forja djiwell buder kek. Un o hachetikro them well i mulo them. Palle dikenn un haiwenn tumer, te hom me o baro Dewel.

Ezekiel 21:15

Mishto tchinell lo. te marell lo bud menshen. Un djudjo kerdo hi lo, jaake djudjo har i blendari. Ma penenn: “Mer nai wah bachteles. Maro rai sal pral i tsele wawar rajende.”

Ezekiel 21:7

Tu, mensho, dik kote, kai o foro Jerusalem hi! Rake kolestar, hoi djal o khereske, kai well o Dewel an-mangedo! Un pen i menshenge an o them Israel, hoi pral lende wella!

Ezekiel 24:21

Kawa penell o baro Dewel, maro rai: Djinau, tumenge hi miro kheer o kamleder koowa. Un tumaro dji nashell pal leste. Tumer han pre-phurdo un patsenn, kolenge, kai kote hi, nai djal kek tchilatchepen. Tchatchepah, me dau miro kheer kolenge an o wast, kai krenn les pale-tchiddo. Un tumare mursh tchawe un tcha, kolen tumer kote an Jerusalem pale mukan, kolla wenn o chareha mulo dino.

Ezekiel 6:6

An o tselo them atchell tumare forjendar tchi har barra pral. Tumare mulne platse wenn paash kerdo, un i chatchepangre tele phagedo, te atchell lendar tchi har barra pral. Tumare chochene debla wenn khetne dino, un nai wenn buder gar an-mangedo. Un kol boba, kai sungepaskro koowa chatchran, wenn tele dino. Kowa, hoi kran tumenge, hi kanna paash.

Ezekiel 9:6

Denn i phuren mulo, un i terne murshen un i terne tchen, ninna i tchawen un i djuwjen! Ma taprenn jekeske an, koles ko sikepen glan ap peskro shero hi! Djan glanstunes pash miro kheer, un fun kotar dureder. Jaake kran le, un maran glanstunes kol pralstunen, kai glan o baro Debleskro kheer tardo his.

Daniel 2:46

Kote mukas pes o baro rai Nebukadnezar ap i phub te perell, glan o Daniel, un penas, te chatchrenn le leske chapen un sungepaskro koowa.

Amos 7:9

I mulne platse, kai mangan o Isaakeskre menshe chochene deblen an, kal platse wenna paash dino. Un kol khera, kai sharan i Israelitarja o Debles, wenn dino an kotja. Un me wau miro chareha pral o kheer Jerobeam.”

Micha 3:12

Doleske well o Debleskro foro trujel witsedo har i hachetikri phub. Un an o foro Jerusalem atchell kek bar ap o wawar. Ap i berga, kai o Debleskro kheer tardo hi, wenn diwje burra baro. Kowa lauter well jaake dran tumari doosh.

Zefanja 3:6

O baro Dewel penell: Me krom, te hi tsele natsjone buder gar koi. Lengre forja hi paash. Lengre sorele khera hi tele phagedo, Kek menshe djiwenn buder koi. Ap i dromma djal buder kek mensho. Halauter hi krik.

Louka 21:24

Bud wenna maredo o chareha. Wawar wenna pandlo un wenna an i wawar themma anlo. Un o foro Jerusalem well kol menshendar khetne stakedo, kai wenna dran wawar themma. Kowa djal jaake rah, har o Dewel mukell len kowa te krell.”

Bičepangre 6:14

Mer shunam, har job penas: O Jesus dran Nazaret phagell o Debleskro baro kheer tele un krella, te hunte rikras mer buder gar ap kowa, hoi o Mose menge penas.”

Hebrearja 10:26

Te kamell jek ap i tchilatcho drom te djal, un krell kowa ninna, ninna te prindjrell lo o tchatchepen, koleske hi buder kek koi, kai nai merals, te lell lo leskri doosh krik.