3. Mose 26:30 - O Debleskro Drom 2021 (Sinte)

³⁰ Me krau kol mulne platse paash, kai tumer tumare deblenge viechen chatchrenna. Un kol boba, kai tumer lenge sungepaskro koowa chatchrenn, phagau khetne. Tumare mulen witsrau ap kol paash-dine figuren, un tumendar kamau buder tchi te djinell.

O Debleskro Lab 2024 (Sinte-Manouche)

³⁰ Me krau kol moulne platse paash, kay t'mer t'mare deblenge firhen rhačrenna. Oun kol boba, kay t'mer lenge soungepaskro koova rhačrenn, phagau khetne. T'mare moulen vitsrau ap kol paash-dine figuren, oun t'mendar kamau bouder či te djinell.

3. Mose 26:30 ပူးပေါင်းရင်းမြစ်များ

1. Mose 19:13

Bud djungelo koowa was glan o baro Debleskre kanda, hoi i menshe an kau foro kran. Doleske bitchras men o baro Dewel, te kras kau foro paash.”

1. Rajengro liil 13:2

Un jaake har o baro Dewel leske penas, das o Debleskro mursh gole: “Chatchepaskri! Chatchepaskri! Shun, hoi o baro Dewel penell! I tchawo well boldo an o Davideskri familja. Leskro lab hi Josia. Kowa marell ap tute kol rashajen, kai chatchrenn sungepaskro koowa ap tute i mule deblenge. Un menshengre kokale wenn chatchedo ap tute.”

1. Rajengro liil 13:32

Kowa, hoi job penas, was o baro Deblestar. Un jaake, har job les penas, wella kowa pral koi chatchepaskri an o foro Betel un pral kol tsele platse, kai mangenn le i mule deblen an, hoi hi an i forja an o them Samaria.”

2. Rajengro liil 23:16

Glan kowa dikas o Josia trujel un dikas i handako ap koi berga, un bitchras koi un mukas i mulengre kokale win te lell un chatchras len ap i chatchepaskri un kras lat pale-tchiddo, jaake har o baro Debleskro rakepaskro win kharas.

2. Rajengro liil 23:20

Un mukas i tsele rashajen, kai i mule deblenge budran, te marell ap lengre chatchepangre, un chatchras menshengre kokale koi pre. Un palle was lo pale an o foro Jerusalem.

2. Rajengro liil 23:8

Un job mukas i tsele rashajen dran o them Juda an o foro Jerusalem te well, un kras i mulne platse pale-tchiddo, kai i rashaja i mule deblenge sungepaskro koowa chatchran. Kowa kras lo an o tselo them mank o foro Geba un o foro Beersheba. Un job phagas koi chatchepaskri tele, hoi his tardo glan ko wudar, hoi o moskro, o Josua, kras, ap i serwi rig, te well jek an o foro dren.

2. Familjakro liil 23:17

Palle djan i tsele menshe dran o them Juda an o kheer ko deblestar Baal, un kran o kheer paash. Un kol chatchepangre, kai viechen un wawar koowa leske chatchedo wan, phagan le tele, ninna kol figure, hoi an-mangedo wan. Un glan kol chatchepangre maran le o Mattan, ko rashajes o deblestar Baal.

2. Familjakro liil 31:1

Un har kowa halauter kerdo his, djan kol tsele Israelitarja, kai kote khetne his, an i forja an o them Juda. Un jon phagan kol bare barra an kotja, hoi i mule deblenge pre-tchiddo his, un dan koi kashteni debletsa Ashera trujel, un kran kol mulne platse un kol chatchepangre paash, kai i mule debla an-mangedo wan, bis te tchi lendar pral atchas. Kowa kran le an o tselo them Juda, Benjamin, Efrajim un Manasse. Palle djan i tsele Israelitarja pale khere an lengre forja, kai lengre khera un lengri phub his.

Debleskri gili 106:40

Kote choiras pes o baro Dewel ap peskre menshende, un nai dikas len buder gar glan peskre jaka.

Debleskri gili 89:38

un o tchon ap o bolepen tardo hi, un dikell, hoi ap kai phub djala.”

Jesaja 27:9

Jaake well o Israelengri doosh krik lino. Un ap kowa sikrell pes, te hi lengri doosh krik lino: Te denn le i pre-tchidde barra jaake khetne, kai mangan le i wawar deblen an, te atchell tchi har tchik. Un te mukenn le kek figure tardo, hoi sikrenn i debletsa Ashera, witar kek boba, kai lake sungepaskro koowa chatchedo was.

Jeremia 14:19

Dal tu kol menshen an Juda pre? Kameh tu o forestar Zion tchi buder djinell? Hoske dal tu men jaake, kai nai krell men kek buder sasto? Mer patsam, kai well lauter mishto. Tchi was mishto! Mer kamam, te well i tsiro, kai kowa, hoi an mende nasselo hi, sasto wals. Kowa was gar. I daar was.

Jeremia 16:18

Jon lenn mandar pengri tseli phagi lengri doshake un ko tchilatchepaske, hoi jon kran. Me mukau lenge tchi. Jon kran miro them pengre mule deblentsa pale-tchiddo. Ko them, hoi mange win rodom, hi pherdo ko koweha, hoi djungelo glan mire jaka hi.

Ezekiel 16:39

Un me dau tut an lengre wasta, te denn le tire mangepaskre platse khetne, kai chochene deblen an-mangal, un randjenn tuke tire koola win, un lenn penge tiro sonakaskro koowa, un mukenn tut nanges tchiddo.

Ezekiel 43:7

Job penas ap mande: Tu, mensho, kate hi koi platsa, kai miri beshepaskri tardo hi un ko banko, ap koleste mire pire tchiwau. Kate djiwau hako tsireske mashkral i Israelitarjen. Un i Israelitarja anenn buder gar ladj ap mande, jon gar un lengre bare raja witar gar. Kowa kran le, har mangan le wawar deblen an, un har paskran le pengre bare rajen gar dur miro kherestar.

Ezekiel 6:13

Palle hi i mulo-dine tchiddo mashkral pengre chochene deblende, un trul lengre chatchepangre trujel ap haki tikni un bari berga, un tel hako baro ruk bud patjentsa, un tel hake wawar senele ruka, kai mangan le pengre chochene deblen an, un chatchran lenge latcho sungepaskro koowa. Un tumer dikenn un haiwenn, te hom me o baro Dewel.

Hosea 10:2

Lengre djia hi pherdo chochepen. Kanna well lengri doosh pral lende. Lengre altare wenn khetne phagedo, un kol pre-tchidde bare barra wenn tele dino.

3. Mose 20:23

Ma djiwenn pal ko koowa, pal kowa i wawar menshe djiwenn, kolen me glan tumende win tradau. Jon kran kau tselo pale-tchiddo koowa, un wan infam glan mire jaka.

3. Mose 26:11

Un me djiwau mashkral tumende, un sikrau tumen gar miro dumo.

3. Mose 26:15

un krenn gar, hoi tumendar kamau, un djiwenn gar pal miro tchatchepen, un rikrenn jaake gar dren, hoi tumentsa win krom,

Amos 6:8

O baro un sorelo Dewel, ko rai pral o bolepen un i phub, das pes sowel pash peskro djipen un penas: Me hom chojedo pral o pre-phurdepen o Jakobeskre tchawendar, un nai dikau lengre shukar khera buder gar glan i jaka. Doleske dau o foro un lauter, hoi koi dren hi, an i wasta wawar menshendar.

Amos 7:9

I mulne platse, kai mangan o Isaakeskre menshe chochene deblen an, kal platse wenna paash dino. Un kol khera, kai sharan i Israelitarja o Debles, wenn dino an kotja. Un me wau miro chareha pral o kheer Jerobeam.”

5. Mose 32:19

O baro Dewel dikas kowa, un was chojedo pral peskre tchawende un tchende, kai kaman tchi buder lestar te djinell.