3. Mose 23:34 - O Debleskro Drom 2021 (Sinte)

³⁴ Pen ap i Israelitarja: An o eftato tchon hi kol bare diwessa, kai djiwenn tumer an patjengre khera efta diwessa, te well o baro Dewel sharedo. Ko ersto diwes hi o 15. (deesh-te-pantchto) diwes an kau tchon.

O Debleskro Lab 2024 (Sinte-Manouche)

³⁴ Pen ap i Israelitarya: An o eftato čon hi kol bare divessa, kay djivenn t'mer an patyengre khera efta divessa, te vell o baro Devel sharedo. Ko ersto dives hi o 15. (deesh-te-pančto) dives an kava čon.

3. Mose 23:34 ပူးပေါင်းရင်းမြစ်များ

1. Rajengro liil 12:32

Un job tchiwas i baro diwes dren an o ochtato tchon, ap o deesh-te-pantchto diwes, te wals ko diwes har kol bare diwessa an o them Juda. Un ap i chatchepaskri chatchras lo viechen. Kowa kras lo an Betel, kote chatchras lo viechen kol terne grumjenge dran sonakai, hoi lo kras. Un kote an Betel tchiwas lo rashajen an pengri budi dren, te his le rashaja ap kol mulne platse, hoi lo kras, kai mangenn le i mule deblen an.

1. Rajengro liil 8:2

Un i tsele mursha dran Israel wan khetne pash o baro rajeste, o Salomo, an kol bare diwessa an o eftato tchon. Kowa hi o tchon, hoi kharell Etanim.

1. Rajengro liil 8:65

Un ap ko tsiro his kol bare diwessa, kai djiwenn i Israelitarja an patjengre khera. Un o Salomo khetne kol tsele Israelentsa rikran kol bare diwessa. His bud menshe kote khetne dran o tselo them, fun Lebo-Hamat bis pash koi tala mank Israel un Egiptia. Efta diwessa his le khetne glan maro baro Debleste, un koi pal pale efta diwessa. Kolla his khetne deesh-te-star diwessa.

Esra 3:4

Un jon rikran kol bare diwessa, kai djiwenn i Israelitarja an patjengre khera, jaake har tele tchinlo was, un chatchran jaake bud viechen o Debleske kol tsele efta diwessa, har hako diweske glan tchinlo his.

Nehemia 8:14

Un an ko liil hatsan le kol laba, kai penas o baro Dewel ap o Moseste, te hunte rikrenn i Israelitarja kol bare diwessa, kai kharenn ‘Patjengre Khera’ an o eftato tchon. Un an kol diwessa hunte djiwenn le an tikne khera, hoi jon penge dran patria krenn.

2. Mose 23:16

Rikrenn ninna bare diwessa mange an ko tsiro, kai anenn o newo djob dren. Un bare diwessa rikrenn mange ninna an ko tsiro pal i nijal, te anan i drake dren, un lauter, hoi bares was ap i ruka un ap tiri phub.

2. Mose 34:22

Rikrenn bare diwessa mange dren ap ko tsiro, kai tumer o newo djob dren anenn! Un palle rikrenn bare diwessa dren pal i nijal, te anan i drake dren un lauter, hoi ap i ruka un ap tumari phub bares was.

Ezekiel 45:25

An o eftato tchon ap o 15. (deesh-te-pantchto) diwes an ko tchon well ko festo, kai djiwenn i Israelitarja an patjengre khera efta diwessa. An kal efta diwessa krell o rai jaake har an kal efta diwessa glan kowa, un anell ko emligo koowa o baro Debleske: vieche, hoi wenn maredo un tseles chatchedo, un sawe, hoi wenn maredo, te well i doosh krik lino, ninna djob un djet. Un halauter well jaake kerdo har glan kowa.

3. Mose 23:33

O baro Dewel penas ap o Mose:

3. Mose 23:42

Djiwenn an ko tsiro an patjengre khera, hakeno, kai an o them Israel djiwell.

3. Mose 23:43

Krenn kowa jaake, te djinenn tumare tchawe, te mukom me, o baro Dewel, i Israelitarjen an patjengre khera te djiwell, har anom len win dran o them Egiptia. Me, o baro Dewel, hom tumaro Dewel.

4. Mose 29:12

Ap o deesh-te-pantchto diwes an o eftato tchon hunte wenn khetne glan o baro Debleste. Kek budi krenn ap ko diwes! Krenn i festo o Debleske efta diwessa,

Johanni 1:14

Ko lab was i mensho, un djiwas pash mende. Un mer dikam leskro railepen un leskri soor, kai o Dewel peskro tchawes das. Kowa his pherdo latchepen un tchatchepen.

Johanni 7:2

I tikno tsiro glan kol biboldengre bare diwessa, hoi kharenna Sukkot, penan leskre phrala ap leste: “Ma atch an o them Galilea! Dja an o them Judea, te dikenn ninna tire mala, hawo baro koowa tu kreh!

5. Mose 16:16

Triin kope an o bersh hunte wenn tumare tsele mursha glan tumaro baro Debleste ap koi platsa, hoi job peske win rodell: ap kol bare diwessa, kai chan kek maro dran shutlo jarro, un ap ko baro diwes, kai anenn o baro Debleske o newo djobestar, hoi tumer dren anan, un ap kol diwessa, kai djiwenn an patjengre khera. Un kek well, koles tchi pash peste hi, hoi job o baro Debleske anella.

5. Mose 31:10

O Mose penas ap lende: “Hake efta bersha, an ko bersh, kai well i sijaan muklo, hunte denn i laba an kau liil win gole glan i tsele Israelitarja. Kowa krenn ap ko tsiro, kai wenn le khetne glan tumaro baro Debleste ap koi platsa, hoi job peske win rodell, an kol bare diwessa, kai djiwenn le an patjengre khera.

Hebrearja 11:13

Kol phure patsle meran lauter. Ninna te lan le kowa gar, hoi kamas o Dewel len te dell, patsan le, te lenn le les. Jon dikan kowa dur glan pende, un his bachtelo pral kowa. Jon penan pendar, te hi len kek them ap i phub, un te hi le kate gar khere.

Hebrearja 11:9

Ap ko tsiro djiwan wawar menshe an ko them, hoi kamas les o Dewel te dell. Un o Abraham djas kate un kote an ko them trujel, un djiwas an plachtene khera. Ninna leskro tchawo, o Isaak, un koleskro tchawo, o Jakob, djiwan jaake. Kolenge penas o Dewel ninna: Tumende dau ko them.