3. Mose 13:46 - O Debleskro Drom 2021 (Sinte)

⁴⁶ Un jaake rah, har ko djungelo nasslepen ap leste hi, hi lo pale-tchiddo. Job djiwell kokres, un krell peskro kheer win glan koi platsa, kai i wawar menshe djiwenn.

O Debleskro Lab 2024 (Sinte-Manouche)

⁴⁶ Oun yaake rah, har ko djoungelo nasslepen ap leste hi, hi lo pale-čiddo. Yob djivell kokres, oun krell peskro kheer vin glan koy platsa, kay i vavar menshe djivenn.

3. Mose 13:46 ပူးပေါင်းရင်းမြစ်များ

2. Samuel 3:29

Lauter mu well ap o Joab un ap peskre menshende! An leskri familja mu well hako tsiro bibacht: menshe, kolendar nashell dukepaskro pani win, oder kolen i djungelo nasslepen ap pengro mass hi, oder sawe, kai bango hi, oder wenn maredo i chareha, oder jek, koles hi gar doha chapaske.”

2. Rajengro liil 15:5

Un o baro Dewel mukas i djungelo nasslepen ap leste te well. Un jaake rah har job djiwas, his lo nasselo ap peskro mass, un hunte djiwas peske an i kheer. Leskro tchawo, o Jotam, his o pralstuno pral o rajeskro kheer, un his o tchatchepaskro rai pral i menshende an o them.

2. Rajengro liil 7:3

Glan ko foreskro wudar his star mursha, kolen i djungelo nasslepen ap pengro mass hi. Un jek penas ap o wawareste: “Hoske atchas mer kai bis te merah?

2. Familjakro liil 26:21

Un o baro rai Usija atchas nasselo ap peskro mass bis te meras lo, un hunte djiwas an i pale-tchiddo kheer, un nai djas buder gar an o baro Debleskro kheer. O Jotam, leskro tchawo, was o pralstuno pral leskro kheer un rakras o tchatchepen win pral i menshende an o them.

Gosewe laba 30:12

Hi menshe koi, kai an pengre jaka djudjo hi, un lengro djungelo koowa was gar tele thodo.

Ropaskre gilja 1:1

Jerusalem, har muklo hal koi tchiddo, tu, kai hals pherde menshe! An-diklo hals pash i tsele themma. Kanna hal kokres har i romni, kolakro rom meras. I rajetsa hals pral wawar themma. Kanna hunte budress i wawarenge.

Ropaskre gilja 1:8

Jerusalem anas doosh ap peste, doleske hi kau foro har i chatchedi djuwel. Halauter, kai hadan lat an o bolepen, praassenn lat kanna. Jon dikenn, har nango joi hi. Joi rowella un khatrell peskro mui.

Ropaskre gilja 4:15

“Djan tumenge, tumer pale-tchidde”, dan le lenge gole. “Djan tumenge, djan tumenge! Ma taprenn ap tchomone!” Jaake nashan le penge, un djinan gar, kai te djan. An i wawar themma was lenge penlo: “Pash mende nai atchenn gar!”

3. Mose 13:47

Te sikrell pes i djungelo kotar ap i ripen oder ap koola, hoi hi dran bakrengre balla, laina oder ledera, un ko djungelo kotar hi senelo oder lolo, hunte dikell pes kowa o rashai an.

3. Mose 14:3

O rashai djal win glan koi platsa, kai i menshe hi, un dikell les peske an. Te was ko dukepen ap leste sasto,

3. Mose 23:29

Hakeno, koon rikrell pes gar pale o chapastar, kowa well pale-tchiddo hako tsireske, un nai djiwell buder gar mank peskre menshende.

Louka 17:12

Un job djas an i gab. Un kote wan deesh nassele mursha pash leste. Kolen his i djungelo nasslepen, kai lengro mass tele merella. Jon his lestar doha dur krik tardo,

1. Korintarja 5:5

te merell leskro phuro djipen an leste, jaake te djal ko mensho gar nashedo ap ko diwes, kai well maro rai Jesus pale.

2. Tessalonikarja 3:14

Jek te krell kowa gar, hoi mer an kau liil tchinam, penenn kowa i wawar patslenge, un rikrenn tumen lestar pale, te well i ladj pral leste!

2. Tessalonikarja 3:6

Mire phrala, an o lab maro rajestar, o Jesus Kristestar, penah tumenge soreles: Rikrenn tumen kol phralendar krik, kai kamenn gar te budrell! Jon djiwenn gar jaake, har mer tumenge penam.

1. Timoteo 6:5

Sawo tchingepen djal dureder un dureder. Kolla, kai krenn kowa, hi nasselo an o shero un haiwenn buder gar, hoi o tchatchepen hi. Jon patsenna, te nashte lenn le bud lowe khetne, te krenn le, hoi o Dewel kamella.

Debleskro tsiro 21:27

Un tchi well kote dren, hoi an o Debleskre jaka pale-tchiddo hi, witar kek mensho, kai djungelo koowa krella un chochella. Kolla wenna an ko foro dren, kolengre laba an o terno bakreskro liil dren tchinlo hi. Kote hi kolla dren tchinlo, kai lenna o djipen, hoi gar pre-herella.

Debleskro tsiro 22:15

Win hi kolla, kai mukan o Debleskro drom, kolla, kai kran bengeskro koowa, kolla, kai lubran trujel, kolla, kai maran wawaren, kolla, kai mangan wawar koowa an har o Debles, un hakeno, kai kamell un krell o chochepen.