3. Mose 1:9 - O Debleskro Drom 2021 (Sinte)

⁹ I buke un i herja hunte wan thodo. Kowa krell ko mursh, kai anas ko vieches. Un o rashai mukell halauter ap i chatchepaskri pre te chatchrell. Jaake hunte well i viecho anlo glan o Debleste, hoi well leske tseles chatchedo. Un o latcho sungepen, hoi well win, sungell mishto o baro Debleske.

O Debleskro Lab 2024 (Sinte-Manouche)

⁹ I bouke oun i herya hounte van thodo. Kova krell ko morsh, kay anas ko firhes. Oun o rashay moukell halauter ap i rhačepaskri pre te rhačrell. Yaake hounte vell i firho anlo glan o Debleste, hoy vell leske tseles rhačedo. Oun o lačo soungepen, hoy vell vin, soungell mishto o baro Debleske.

3. Mose 1:9 ပူးပေါင်းရင်းမြစ်များ

1. Mose 8:21

Un o baro Dewel sungas ko latcho sungepen un penas ap peste: “Me dau man sowel, te anau buder gar hawi bari bibacht pral i phub doleske, hoi i menshe krenna. Djinau, o mensheskro dji hi tchilatcho fun tiknes pre. Me kamau buder gar o tselo djipen ap i phub te marell, jaake har krom.

1. Familjakro liil 6:34

O rashajeskri budi his kokres o Aroneske un leskre tchawenge. Jon chatchran i viechen ap o Debleskri sasterni chatchepaskri, ninna sungepaskro koowa ap o Debleskro sonakaskro bob. Jon kokres nai djan an o Debleskri kutch isema, te krenn le o Debleskro koowa, te well o Israeleskri doosh krik lino, lauter jaake, har penas o Mose, koles o Debleskro wast his.

2. Familjakro liil 4:6

Un job kras deesh bare panjeskre pirja. Un pantch kolendar tchiwas lo ap i tchatchi rig un pantch kolendar ap i serwi rig, te nai thowenn le kol kotja mass, hoi o Debleske chatchedo wenn. O baro thopaskro tcharo mukas lo koi te tchiwell, te nai thowenn pen i rashaja koi dren.

Debleskri gili 51:6

Ap tute kokres krom, hoi tchilatcho hi. Awa me krom, hoi midjak hi glan tire jaka. Doleske hi tut tchatches an tiro rakepen. Tu kreh o tchatchepen, te deh man i phagi.

Debleskri gili 66:15

I thulle bakrendar anau me tuke, te wenn le tuke chatchedo. Ninna grumja un busja anau glan tute. Te wenn le chatchedo ap tiri chatchepaskri, djal i jagakro ducho pre pash tute.

2. Mose 12:9

Ma chan ko mass jales, witar gar keredo an o pani! Pral i jag well o tselo bakro peklo, o shero, i herja, ninna i buke.

2. Mose 29:18

Un chatche o tselo bakro ap i chatchepaskri, jaake te djal lauter pre an i jagakro ducho. Ko bakro hi mange, o baro Debleske, un well tseles chatchedo. Un o latcho sungepen, hoi well win, sungell mange mishto.

2. Mose 29:25

Palle le les dran lengre wasta un chatche les pre ap o Debleskri chatchepaskri pral ko wawar bakro, hoi tu tseles chatchral, jaake te djal kawa lauter ninna pre an i jagakro ducho. Un o latcho sungepen, hoi well win, sungell mange, o baro Debleske, mishto.

Jeremia 4:14

Jerusalem, te kameh win lino te well, palle thob tiro tchilatchepen tiro djijestar tele! Har rah kameh tu ko tchilatchepen an tiro shero te rikrell?

Ezekiel 20:28

Har me len an o them anom, kolestar man sowel dom, te dap les lende, mangan le wawar deblen an. Hako kopo, kai dikan le i tikni berga oder i baro ruk bud patjentsa, chatchran le viechen i chochene deblenge, un kran man chojedo koleha, hoi le lenge anan. Jon chatchran sungepaskro koowa lenge, un tchoran mool win lenge.

Ezekiel 20:41

Te sungau ko latcho sungepen, hoi dran kowa win well, hoi tumer mange chatchrenn, dikau latches ap tumende. Jaake well kowa an ko tsiro, kai lom tumen win dran i themma un natsjone, kai wan tradedo. Un i tsele wawar natsjone dikenn, te hom me o tchatcho Dewel.

Ezekiel 40:38

An i wudareskri halla fun o nordetikro wudar his i wudar, hoi djas an i tikni isema. Kote well o mass kol viechendar thodo, hoi wenn tseles chatchedo o Debleske.

3. Mose 1:17

Palle taprell o rashai o tchirkleskre mussja un tserdell o tchirkles pre, un chatchrell les ap i kasht pral i jag, hoi ap i chatchepaskri hi. Jaake hunte well i tchirklo anlo glan o Debleste, hoi well leske tseles chatchedo. Un o latcho sungepen, hoi well win, sungell mishto o baro Debleske.

3. Mose 2:16

O rashai lell i kotar kol djobendar un djetestar tele, un chatchrell kowa khetne ko tselo sungepaskro koowa. Kowa hi i sikepen, kai ko tselo djob, hoi anlo was, o baro Debleske hi.

3. Mose 2:2

Un job anell kowa pash i rashajende dran o kheer Aron. Jek lendar lell i wast pherdo jarro o djeteha un ko tselo sungepaskro koowa, un mukell kowa ap i chatchepaskri te chatchrell. Kowa sikrell, kai ko tselo chapen, hoi anlo was, o Debleske hi. Un o latcho sungepen, hoi well win, sungell mishto o baro Debleske.

3. Mose 2:9

Un o rashai lell tchomone lestar un chatchrell les ap i chatchepaskri. Kowa sikrell, kai ko tselo chapen, hoi anlo was, o Debleske hi. Un o latcho sungepen, hoi well win, sungell mishto o baro Debleske.

3. Mose 3:11

Un o rashai chatchrell kowa lauter ap o Debleskri chatchepaskri. Kolla hi kol kotja o viechestar, hoi o baro Debleske hi.

3. Mose 3:5

Un i rashaja dran o kheer Aron chatchrenn kowa lauter ap o Debleskri chatchepaskri, ap ko kasht, hoi pral i jag hi. Jon chatchrenn kowa khetne ko wawar viecheha, hoi well o Debleske tseles chatchedo. Un o sungepen, hoi well win, sungell mishto o baro Debleske.

3. Mose 4:31

Un o tselo thulepen tchinell lo tele, jaake har tchinell lo o thulepen tele ko viechestar, hoi jek o Debleske anell, te chan le les khetne glan leste. Un ko rashai chatchrell kal thulle kotja ap o Debleskri chatchepaskri, te well i latcho sungepen win, hoi baro Debleske mishto sungella. Jaake krell o rashai, te well lauter pale mishto mank ko mensheste un o baro Debleste. Un o baro Dewel bistrell leskri doosh.

3. Mose 6:14

An o sasterno tcharo well o jarro khetne kerdo o djeteha, palle peklo, an kotja phagedo un o baro Debleske chatchedo. Un ko latcho sungepen, hoi well win, sungell mishto o baro Debleske.

3. Mose 8:21

Un job thowas leskre buke un leskre herja o panjeha, un tchiwas len ninna ap i chatchepaskri, un mukas ko tselo vieches pre te chatchrell ap o Debleskri chatchepaskri. Jaake har o baro Dewel penas, was ko tselo bakro leske chatchedo. Un o latcho sungepen, hoi was win, sungas mishto o baro Debleske.

3. Mose 8:28

Un o Mose las lauter pale dran lengre wasta, tchiwas les ap o Debleskri chatchepaskri pral pre ap ko mass ko viechestar, hoi well tseles chatchedo, un mukas les te chatchrell. Kawa hi ko chapen, hoi was o baro Debleske chatchedo, har wan i rashaja an pengri budi dren tchiddo. Un o latcho sungepen, hoi was win, sungas mishto o baro Debleske.

3. Mose 9:14

Job thowas i buke, un i palstune herja, un tchiwas len pral ap ko wawar mass ap i chatchepaskri, un chatchras len.

Zakarie 13:7

O baro Dewel, ko rai pral o bolepen un i phub, penell: “Miro charo, hade tut! Dja ap o bakrengro pre, kai mange budrella, ap koleste, kai pash mande tardo hi! De o bakrengres! Palle nashenn i bakre krik, hakeno ap peskri rig! Ninna ap i tiknende hadau miro wast.”

4. Mose 15:3

un tumer anenn i vieches tumare grumjendar un bakrendar chatchepaske o baro Debleske, hunte denn tumer i chapen koi pashel. Krenn kowa pash hako viecho, hoi mange anenn: pash ko viecho, hoi well tseles chatchedo mange; pash ko viecho, hoi chan tumer khetne glan mande; pash ko viecho, koleha i mensho sikrell, te das lo pes sowel, te dell lo man tchomone; pash ko viecho, hoi kamell i mensho pestar mande te dell; pash ko viecho, hoi chatchrenn tumer mange ap tumare bare diwessa. O latcho sungepen kol viechendar hi mishto mange. Ko chapen, hoi anenn pashel, hunte well jek kilogrammi latcho jarro, un jek litari djet. Kowa well halauter khetne kerdo.

4. Mose 28:11

Ap o ersto diwes an hako tchon hunte chatchrenn tumer o baro Debleske dui terne mursh grumja, jek mursh bakro un efta jek-bershengre bakre, kai gar nasselo hi.

4. Mose 28:7

Koi pashel well jek litari mool win tchoredo o baro Debleske an leskro kheer.

4. Mose 28:8

Ap i rati aness ko wawar terno bakro! Koi pashel o chapen un i mool har taissarlakro. Un o latcho sungepen, hoi pre djal, te well kowa halauter chatchedo an i jag, sungella mishto o baro Debleske.

2. Korintarja 2:15

Te rakrah o latcho lab o Jesus Kristestar, hi o Dewel bachtelo pral kowa. Kowa hi leske har i shukar sungepen, hoi djal pash kolende, kai lenn o Debleskro djipen un ninna pash kolende, kai djan nashedo.

Efesarja 5:2

un djiwenn an o kamlepen, jaake har o Jesus Kristo peskro kamlepen mende sikras, har job menge meras. Un jaake das lo peskro djipen o Debleske. Un o Dewel dikas latches ap leste.

5. Mose 12:27

Kote chatchrenn leske kol viechen, hoi wenn tseles chatchedo, lengro mass un rat. Kol wawarendar, hoi tumer chan, tchore o rat ap o baro Debleskri chatchepaskri win.

Filiparja 4:18

Kanna hi man lauter, hoi man hunte well djipaske, un budeder har doha. O Epafrodito anas mange kowa lauter, hoi tumer mange bitchran. Kowa hi jaake, har te anans tumer o Debleske latcho koowa, hoi sungell mishto, un kai dikell lo latches pre un hi bachtelo pral kowa.