2. Timoteo 4:2 - O Debleskro Drom 2021 (Sinte)

² Pen i menshenge o Debleskro lab! Kre kowa un muk gar tele, ninna te kamenn i menshe kowa gar te shunell! Sike len lengri doosh! De len trad, te mukenn le o tchilatchepen! Kre lengre djia soreles an o patsepen! Un ab gar khino, te sikress len o tchatcho drom!

O Debleskro Lab 2024 (Sinte-Manouche)

² Pen i menshenge o Debleskro lab! Kre kova oun mouk gar tele, ninna te kamenn i menshe kova gar te shounell! Sike len lengri doosh! De len trad, te moukenn le o čilačepen! Kre lengre djia zoreles an o patsepen! Oun ab gar khino, te sikress len o čačo drom!

2. Timoteo 4:2 ပူးပေါင်းရင်းမြစ်များ

Debleskri gili 40:9

“Miro Dewel, me kamau te krap o djijestar, hoi tu kameh. Un tiro lab hi an miro dji.”

Jona 3:2

“Dja sik an ko baro foro, hoi kharell Ninive, un de kote wi-gole, hoi me tuke penau!”

Louka 7:23

Bachtelo hi kowa, kai choirell pes gar pral mande.”

Louka 7:4

Un jon wan pash o Jesuseste, un mangan les, un penan ap leste: “Kau pralstuno lurdo hi moldo, te kress leskro budepaskres sasto.

Louka 9:60

Penas o Jesus ap leste: “Muk kol mule pengre mulen te paskrell! Dja un pen i menshenge, kai o tsiro kanna kai hi, kai o Dewel kamell len dran o tchilatchepen te lell, un kamell lengro rai te well!”

Bičepangre 13:5

Un har jon an ko foro Salamis wan, penan le o Debleskro lab kote an i biboldengre kangria. Un o Johanni Marko budras lentsa.

Bičepangre 16:13

Ap o Debleskro diwes djam mer win glan o foro pash o pani. Mer patsam, te wenn pash o pani menshe khetne, kai mangenn kote o Debles an. Koi besham men tele, un rakram kolla djuwjentsa, kai kote wan.

Bičepangre 20:7

Ap o kurko wam mer khetne, te phagas o maro. Un o Paulo penas o Debleskro lab i menshenge. Un o wawar diwes kamas job ap o shiffo dureder te ulerell. Doleske rakras job jaake rah bis deesh-te-dujenge an i rati.

Bičepangre 28:16

Har wam an o foro Rom dren, nai las peske o Paulo i isema an i kertchima. Un i lurdo das garda ap leste.

Remarja 10:15

Te well kek bitchedo pash lende, nai penell lenge kek o Jesus Kristestar. O Debleskro lab penella: Har bachtelo ham pral kolende, kai wenn pash mende un penenn menge o latcho lab!

Remarja 12:12

Awenn bachtele un dikenn ap o latchepen, hoi ap tumende wella an ko tsiro, hoi wella! Te well tumaro djipen pharo, rikrenn win! Mangenn o Debles hako tsiro!

Galatarja 6:6

Jek te penell tumenge o Debleskro lab, palle hunte denn tumer les kowa, hoi les hunte well djipaske.

Kolossarja 1:25

Lengro budepaskro wom me. O Dewel das man koi budi, te penap tumenge o tselo Debleskro lab.

Kolossarja 4:3

Mangenn o Debles ninna menge, te krell lo menge i drom pre, te penas nai leskro lab i menshenge, te sikras lende, te hi o Jesus Kristo ko drom, kai anell men pash o Debleste. Kowa djinan i menshe i rah tsiro gar. Har me kowa i menshenge penom, wom doleske an o stilepen.

1. Tessalonikarja 1:6

Un kowa, hoi dikan tumer ap mende, kowa krenn tumer kanna ninna, un djiwenn jaake, har o rai Jesus djiwas. Har shunan tumer o Debleskro lab, patsan les un hans bachtelo pral kowa, ninna te kran i menshe tumenge o djipen phares. Koi bacht das o Debleskro Ducho an tumende.

1. Tessalonikarja 5:14

Mire phrala, kanna penah tumenge, hoi te krenn: Denn kolen trad, kai kamenn gar te budrell! Rakrenn kolentsa mishto, kai hi dareno! Krenn kolen soreles, kai hi gar sorelo an o patsepen! Denn kekes sik pre!

1. Tessalonikarja 5:20

Shunenn ap kol laba, hoi o Dewel i patsleske an o dji tchiwas!

1. Timoteo 4:13

Le o Debleskro lab an i wast, un sike i menshende, hoi koi dren tchinlo hi, un rake koi pral! Sike lende, har te djan jon ap o Debleskro drom! Kre kowa jaake rah, bis te wau pash tute!

1. Timoteo 5:20

Kolla, kai kran tchilatcho koowa, kolen dess trad glan lauterende, te well kol wawaren daar.

2. Timoteo 2:21

Jaake hi kowa ninna i patslentsa: Kowa, kai tchiwas ko tselo tchilatchepen dran peskro djipen win, kowa hi har i kutch tcharo o rajeske pral o kheer. Job hi kokres peskro rajeske koi, un hi leske bud moldo. Leskro rai nai dell leske haki latchi budi.

2. Timoteo 2:25

ninna te kamenn le gar ap leste te shunell. Job rakrell latches lentsa, te anell lo len ap o tchatcho drom! O Dewel nai dell len o dji, te mukenn le pengro tchilatcho drom, un te haiwenn le, hoi o tchatchepen hi.

2. Timoteo 3:10

Me sikrom tut, har te djas ap o Debleskro drom, un tu atchal ap leskro drom, un djiwal jaake, har me tuke glan djiwom. Tu kameh kowa, hoi me ninna kamau. Tu dikal, har me patsau ap o Jesus Kristeste. Un tu djineh, har rikrom ap o patsepen. Tu djineh ninna, har kamom i wawaren o djijestar, un har rikrom lauter win.

Tito 1:13

Un kowa, hoi ko sikepaskro penas, hi tchatcho. Doleske pen lenge, hoi pash lende gar mishto hi, un de len trad, te djan le tchatches ap o Debleskro drom.

Tito 2:15

Pen kawa lauter i patslenge! Rake an lengre djia! Te krenn le tchomone, hoi gar mishto hi, pen les lenge an o Debleskri soor! Hakeno hunte shunell ap tute.

Hebrearja 13:22

Mire phrala, me mangau tumen, shunenn ap kol laba, hoi me tumenge an kau tikno liil tchinom!

Debleskro tsiro 3:19

Lauteren, kai kamau o djijestar, kolende sikrau lengri doosh, un penau lenge dawentsa, te shunenn le ap mande. Mukenn kanna tumaro tchilatcho drom, un awenn pale ap miro drom!