2. Timoteo 2:2 - O Debleskro Drom 2021 (Sinte)

² Tu hals pashel, har penom bud menshen o Debleskro lab. Kowa, hoi shunal mandar, sike kanna wawar patslen, kai krenn, hoi tu lenge peneh, un kolendar tu djineh, te haiwenn le mishto o Debleskro lab te penell!

O Debleskro Lab 2024 (Sinte-Manouche)

² Tou hals pashel, har penom boud menshen o Debleskro lab. Kova, hoy shounal mandar, sike kanna vavar patslen, kay krenn, hoy tou lenge peneh, oun kolendar tou djineh, te hayvenn le mishto o Debleskro lab te penell!

2. Timoteo 2:2 ပူးပေါင်းရင်းမြစ်များ

Esra 7:10

O Esra tchiwas peskre djijeskre jaka ap o Debleskro drom, te haiwell lo les bud un budeder, un te djiwell lo pal o Debleskro lab, un te sikrell lo halauterenge an o them Israel, hoi o baro Dewel lendar kamell, un har nai djiwenn le pal leskro tchatchepen.

Esra 7:25

Un tu Esra, tchip o goswepah, hoi tiro Dewel tut dell, tchatchepangren un rakepangren an i budi dren, te rakrenn le o tchatchepen win i tsele menshenge, kai wergel o panjestar Eufrat djiwenna, halauterenge, kai i laba tiro Deblestar prindjrenn. Un koon kal laba gar prindjrell, koleske sikrenn, hoi tumaro Dewel lestar kamell!

Nehemia 7:2

Un me tchiwom dui pralstunen pral o foro Jerusalem, miro phrales, o Hanani, un o Hananja, kai o pralstuno lurdo pral o lurdengro kheer his. Job his i mursh o labestar, un djiwas jaake o Debleha har gar bud wawar.

Debleskri gili 101:6

Mire jaka rodenn pal kolende an o them, kai rikrenn pen ap tire laba, te djiwenn jon pash mande. Kolen, kai o tchatcho drom djan, lau me pash mande, te budrenn le mange.

Gosewe laba 13:17

I tchilatcho bitchepaskro anell bibacht. I bitchepaskro o labestar rakrell jaake, te well lauter pale mishto.

Jeremia 23:28

Te dell i rakepaskro suni, mu penell lo peskri suni! Kowa, kai lell i lab mandar, kowa te penell ko lab mishto dureder! Me, o baro Dewel penau tumenge: O phuss un o djob hi gar o emligo koowa. Jaake hi witar gar emligo ko rakepen, hoi kol chochene rakepangre rakrenna, un o rakepen, hoi mandar wella.

3. Mose 14:42

Un kote, kai i barra win phagedo wan, wenn wawar barra dren tchiddo. Un wawar tchik well ap i barra pre maklo.

Maleachi 2:7

Kowa hi i rashajengri budi: Jon hunte penenn o Debleskro lab an o tchatchepen, te nai djan i menshe pash lende, te kamenn le te djinell, hoi o baro Dewel lendar kamella. I rashaja hi i bitchepangre o baro Deblestar, ko rajestar pral o bolepen un i phub.

4. Mose 12:7

O Moseha, koles miro tchatcho wast hi, krau gar jaake. Leste dom miro tselo kheer an o wast.

Mateo 13:52

“Tumer dikenn,” penas lo, “hako tchatchepaskro, koon djinell o phuro biboldengro tchatchepen, un ap mande patslo was, kowa haiwell kanna o newo un o phuro koowa pral o Debleste, un nai penell kowa i menshenge.”

Mateo 24:25

Ma bistrenn, hoi me tumenge penom!

Louka 12:42

Penas o Jesus: “I latcho budepaskro dell mishto garda ap peskro rajeskro kheer, un sowella gar. Leskro rai das peskre tsele budepangren an leskre wasta. Un ko latcho budepaskro dell lende hako diwes kowa, hoi len hunte well djipaske.

1. Korintarja 4:2

Un i budepaskro hunte krell peskri budi mishto.

2. Korintarja 2:14

Me parkrau man pash o Debleste, te dell lo men i soor, te djas ap o Jesuseskro drom. Khetne o Jesuseha ham hako tsiro sorleder har o tchilatchepen. Un kote, kai penah i menshenge o latcho lab o Jesusestar, hi kowa jaake, har te well i latcho sungepen pash bud menshende.

2. Korintarja 3:5

Dran mari soor nai krams mer mari budi gar mishto. Kai budi krah mer dran o Debleskri soor. Un kowa, hoi haiwah, well o Deblestar.

Kolossarja 1:7

Kau lab penas tumenge maro kamlo phraal, o Epafras. Kowa budrella o Jesus Kristeske har mer. Job krell peskri budi mishto pash tumende.

1. Timoteo 1:12

Me parkrau man pash maro rajeste, o Jesus Kristeste, kai das man i soor, te budrap leske. Job patsas ap mande, un tchiwas man an koi budi, te wap leske koi.

1. Timoteo 1:18

Miro tchawo Timoteo, kowa penau tuke, te rikress tu kowa an tiro dji. Ma biste kol laba, hoi glan i tsiro pral tute glan-wi penlo wan! Kolla laba denn tut i soor, te mukess gar tele te krell o Debleskri budi, jaake har i latcho kurepaskro gar pre dell an o kurepen.

1. Timoteo 4:14

Ma biste koi budi, hoi o Debleskro Ducho tut das, har kol phureder phrala tuke i wasta pre tchiwan, un hoi jon pral tute glan-wi penan!

1. Timoteo 4:6

Te peneh tu kau koowa i patslenge, hal tu o Jesuseskro latcho budepaskro. Jaake sikreh, kai djiweh pal o latcho lab o Jesus Kristestar, hoi tu shunal un patsal, un kai djah tu dureder ap o Debleskro drom!

1. Timoteo 5:22

Ma tchip sik tire wasta ap jekeste pre! De jak, te well i doosh i wawarestar gar ap tute! Rike tiro dji djudjo!

1. Timoteo 6:12

Jaake har i kurepaskro kurell pes mishto un dell gar pre, jaake dess tu gar tiro patsepen pre, te tapress ko djipen, hoi gar pre-herella. O Dewel das tut gole, te tapress les. Un tu penal glan bud menshende, kai patseh ap o Jesus Kristeste.

2. Timoteo 3:10

Me sikrom tut, har te djas ap o Debleskro drom, un tu atchal ap leskro drom, un djiwal jaake, har me tuke glan djiwom. Tu kameh kowa, hoi me ninna kamau. Tu dikal, har me patsau ap o Jesus Kristeste. Un tu djineh, har rikrom ap o patsepen. Tu djineh ninna, har kamom i wawaren o djijestar, un har rikrom lauter win.

2. Timoteo 3:14

Tu, Timoteo, atch pash kowa, hoi tuke penlo was, un hoi tu patseh! Tu djineh, koon tuke kowa lauter penas.

Hebrearja 2:17

Doleske hunte was o Jesus an lauter jaake, har leskre phrala, te well les i baro dji lenge, un te well lo lenge i tchatcho baro rashai glan o Debleste, te mangell lo leskre menshenge, te lell job i doosh lendar krik.

1. Samuel 2:35

Me mukau mange i rashajes pre te stell, kai peskri budi mishto krell. Job krell lauter jaake, har me kamau un mange shukar hi. Un me krau leske i kheer, hoi atchella. Un job budrella hako tsiro koleske, koles me wi-rodau, te well lo baro rai.