2. Samuel 23:5 - O Debleskro Drom 2021 (Sinte)

⁵ O Dewel das man peskro lab hako tsireske, un hoi lo penas hi mishto un atchell tardo. Jaake hi miro kheer soreles glan leste tardo. Lauter, hoi mange mishto hi un hoi kamau o djijestar, mukell lo mishto te djal.

O Debleskro Lab 2024 (Sinte-Manouche)

⁵ O Devel das man peskro lab hako tsireske, oun hoy lo penas hi mishto oun ačell tardo. Yaake hi miro kheer zoreles glan leste tardo. Lauter, hoy mange mishto hi oun hoy kamau o djiyestar, moukell lo mishto te djal.

2. Samuel 23:5 ပူးပေါင်းရင်းမြစ်များ

1. Mose 9:16

Te hi miro brishineskro bogo an o bolepen tardo, dikau les, un ko lab, hoi dom, well an miro shero. Ko lab atchell tardo hako tsiro mange un hakeneske, kai djiwella ap i phub.”

2. Samuel 12:10

An tire jaka his miro lab tchi moldo, har lal tu tuke koi romjat fun o Urija, te well li tiri romni. Kanna well o charo ap tiro kheer gar buder krik lino.’

2. Samuel 13:14

O Amnon shunas gar ap late, tapras lat, peras pral late, un sowas lah.

2. Samuel 13:28

O Absalom penas ap peskre lurde: “Denn jak! Te pijas pes o Amnon mato, un te penau me ap tumende: ‘Denn o Amnones khetne!’ palle denn les mulo! Ma trashenn! Me penom tumenge, te krenn kowa. Awenn tchatche mursha un krenn kowa kek trashah!”

2. Samuel 18:14

“Kamau gar te nashrap miro tsiro tuha!” das o Joab gole, un las triin lengste sane tchurja an peskro wast, un das len o Absalomeske an o dji, har job gomme djido ap o ruk bladedo his.

2. Samuel 7:12

Te hi tiro tsiro trujel, un tu mereh, hadau jekes tire tchawendar, kai pal tute wenna, te well lo baro rai, un atchell kowa.

2. Samuel 7:18

djas o baro rai David an o Debleskro plachteno kheer, tchiwas pes tele glan o baro Debleste un penas: “Baro Dewel, miro rai, koon hom me, un hoi hi miro kheer, kai tu kral jaake bud mange?

1. Rajengro liil 1:5

Un o Adonija, koleskri dai o Davideskri romni, i Haggit his, kowa kras pes baro un penas: “Me, me kamau baro rai te well!” Un job las peske wurdja un graja, un i paash-sheel mursha, te nashenn le glan leste.

1. Rajengro liil 11:38

Te shuneh ap halauter, hoi me tuke penau, un te djah tu ap mire dromma un kreh, hoi glan mire jaka mishto hi, un djiweh pal miro tchatchepen un mire laba, har miro budepaskro, o David, kowa kras, palle hom me tuha. Un jaake har o Davideske krom, krau me, te well dran tiri familja hako tsiro jek, kai hi o rai. Un me dau tut o Israel, te wess rai pral leste.

1. Rajengro liil 12:14

Na-a, job rakras lentsa jaake, har i terne mursha kowa leske penan. Un penas: “Te tchiwas miro dad i pharo djipen ap tumende, me krau tumaro djipen gomme phareder! Miro dad das tumen i tchupnijah, me dau tumen i tchupnijah, hoi saster pre hi!”

Debleskri gili 111:9

O baro Dewel las peskre menshen win dran i tchilatche wasta, un kras lentsa win, te wenn le leskre menshe hako tsiro. Job kokres hi lengro Dewel. Baro hi lo!

Debleskri gili 119:81

Miro dji nashell pal tute: Ab ap miri rig! Me dikau ap tute, te rakress mantsa.

Debleskri gili 27:4

Jek koowa mangau miro baro Deblestar, kowa kamaus me lestar, te nai atchoms an leskro kheer jaake rah har me djiwau, te nai dikap o tselo tsiro leskro shukapen, un nai putchap pal leskro kamlepen an leskro kheer.

Debleskri gili 62:2

Pash o Debleste kokres hi miro djijes kek daar, Job well ap miri rig.

Debleskri gili 89:3

Kowa hi hoi me penau: Hako tsireske atchell leskro latchepen, jaake rah har dell o bolepen, rikrell job peskro lab.

Jesaja 11:1

Jaake har well i tikno newo kasht dran i tele dino ruk, un i newo tikno ruk mank leskre draba win, jaake well i newo baro rai dran o Davideskro kheer.

Jesaja 27:6

Ko tsiro wella, kai well o Jakob pale sorelo. Awa, o Israel well har i ruk, koles sorele draba hi, un senelo well, un ap koleste blume pre djan, un bud rukengre win anenn. Kolendar well i tseli phub pherdo.

Jesaja 4:2

I tsiro wella, kai krell o baro Dewel peskro them Israel railo un shukar. Un kolla, kai pral atchan un an o them djiwenn, hi bachtelo pral ko bud latcho koowa, hoi i phub win anell. Un wawar menshe sharenn len koleske.

Jesaja 54:10

I berge nai djan ap i rig, un i tikne berge nai perenn khetne, miro latchepen, kowa djal gar tutar, un kowa, hoi win kram, te ham mer mala, atchell tardo. Kowa penau me, o baro Dewel, kai peskro dji tuke pre kras.

Jesaja 55:3

Shunenn mishto, hoi penau, un awenn pash mande! Shunenn ap mande, te atchenn djido! Un me kamau tumentsa win te krell, te atchas mer mala hako tsireske. Ko latcho koowa, hoi o Davideske penom, well ap tumende.

Jesaja 61:8

Me, o baro Dewel kamau o tchatchepen, un hom chojedo pral o tchorepen un o tchilatchepen. Un tchatchepah, me dau latcho koowa i menshende an Juda ko tselo tchilatchepaske, hoi ap lende was. Un me krau lentsa win, te atchas mer mala hako tsiro. Koi pre dau miro tchatcho wast.

Jesaja 7:14

Doleske dell o baro Dewel kanna kokres i sikepen, te sikrell lo, kai hi lo ap tumari rig: I terni tchai well wawartchandes un lell i mursh tchawes. Un koles dell li o lab Immanuel.

Jeremia 32:40

Un me krau lentsa win, te mukap gar tele, te krap lenge latchepen, un te dap len i dji, hoi ap mande shunell, un mukell man gar. Kau lab, hoi lentsa win krau, atchell hako tsireske.

Jeremia 33:21

jaake nai lell kek ko lab pale, hoi dom Davideske, kai mange koi his. Leske penom, te hi hako tsiro jek leskre tchawendar o baro rai pral Juda. Witar gar nai lell jek ko lab pale, hoi dom i Levitarenge, kol rashajenge, kai mange budrenn.

Ezekiel 37:26

Un me pandau miro dji ap lende, un krau lentsa win, te nai djiwenn le an o latchepen. Kowa te atchell hako tsireske jaake. Un me mukau len bud te well, un krau lendar i soreli natsjona. Un miro kheer atchell mashkral lende hako tsireske.

Amos 9:11

O baro Dewel penell: Ap ko diwes krau o Davideskro kheer newes, kowa hoi kanna khetne peredo hi. Kote, kai lo paash hi, krau les tseles. Kote, kai barra win phagedo hi, tchiwau len pale pre. Me krau les jaake har lo glan bud tsiro his.

Bičepangre 13:34

O Dewel kras o Jesuses i mulendar djido. Un job merell buder gar. Ap mare phurende penas o Dewel: Me kamau tumen miro latchepen un miro kamlepen te dell, har me o Davideske penom, te dap leste.

Hebrearja 13:20

O Dewel kras i drom, te nai wah pash leste. Job kras o Jesuses, maro rajes, i mulendar djido. Kowa ratas peskro rat menge, te nai wah pash o Debleste, un djiwah hako tsiro leha khetne. O Jesus was maro baro bakrengro. Kowa dell jak ap mende, har i bakrengro dell jak ap peskre bakre.

Hebrearja 6:19

Kau patsepen rikrell maro djipen, jaake har rikrell i sorelo saster i shiffo, te djal lo gar ap o pani nashedo. Un kowa, ap koleste patsah un dikah, kowa hi o Jesus. Job djas glan mende pash o Debleste an o bolepen, jaake har djas o baro rashai an o phuro tsiro an o Debleskro kheer. Un jaake was o Jesus hako tsireske sawo baro rashai, har glan i rah tsiro o Melchisedek his.

1. Samuel 2:35

Me mukau mange i rashajes pre te stell, kai peskri budi mishto krell. Job krell lauter jaake, har me kamau un mange shukar hi. Un me krau leske i kheer, hoi atchella. Un job budrella hako tsiro koleske, koles me wi-rodau, te well lo baro rai.

1. Samuel 25:28

Biste mange, te hadom me man un rakrom ap tute! Me djinau, o baro Dewel dell tut i kheer, hoi atchella. Tu hal kowa, kai djal o baro Debleske an o kurepen. Kek tchilatchepen mu well hatslo ap tute, jaake rah har tu djiweh!