2. Rajengro liil 9:14 - O Debleskro Drom 2021 (Sinte)

¹⁴ Un o Jehu, koleskro dad o Josafat un koleskro papo o Nimshi hi, hadas pes pral o baro rai Joram un kamas gar, te atchell o Joram baro rai. [Glan jek tsiro djas o Joram khetne kol tsele lurdentsa dran Israel pash ko foro Ramot an Gilead, te kurell lo pes o baro rajeha pral o them Syria, o Hasael.

O Debleskro Lab 2024 (Sinte-Manouche)

¹⁴ Oun o Yehou, koleskro dad o Yosafat oun koleskro papo o Nimshi hi, hadas pes pral o baro ray Yoram oun kamas gar, te ačell o Yoram baro ray. [Glan yek tsiro djas o Yoram khetne kol tsele lourdentsa dran Israel pash ko foro Ramot an Gilead, te kourell lo pes o baro rayeha pral o them Syria, o Hasael.

2. Rajengro liil 9:14 ပူးပေါင်းရင်းမြစ်များ

1. Rajengro liil 15:27

O Baasha, koleskro dad o Achija his, dran o kheer Issachar, kras pes tchorchanes khetne wawarentsa, te dell lo les temerl. Un job maras les an o foro Gibbeton. Ko foro his an o them Filistia. An ko tsiro his o Nadab khetne i lurdentsa dran Israel trul o foro tardo, un rikran o foro dren pandles.

1. Rajengro liil 16:16

Un i lurde, kai glan o foro ap i lurdengri platsa his, shunan o rakepen: “O Simri kras pes tchorchanes wawarentsa khetne un maras o baro rajes.” Har shunan kowa i tsele Israeleskre mursha, kai ap i lurdengri platsa hi, hadan le ap kau diwes pengro pralstunes, o Omri, te well lo o baro rai pral Israel.

1. Rajengro liil 16:7

Kowa, hoi penas o baro Dewel ap peskro rakepaskro, o Jehu, kol laba pral o Baasha, kowa was pral koleste dran ko tselo tchilatchepen, hoi o Baasha kras glan o baro Debleste. Job kras peske mule debla, un kolentsa choiras job o baro Debles. Ninna mukas job i tsele tchawen o Jerobeamestar te marell. Doleske djas leske har koleskri familja.

1. Rajengro liil 16:9

Un o Simri, ko pralstuno pral o paash i wurdjendar, kras pes tchorchanes wawarentsa khetne, te marell lo o Ela. His i diwes, kai his o Ela an o kheer ko pralstunestar pral o rajeskro kheer an Tirza. Ko pralstuno kharas Arza. Un o Ela pijas kote un was mato.

1. Rajengro liil 22:3

Un o baro rai pral o them Israel penas ap leskre budepangre: “Djinenn tumer gar, kai o foro Ramot an o them Gilead maro hi? Hoske rikrah men pale, un lah les gar dran o wast o baro rajestar pral Syria?”

2. Rajengro liil 10:9

O wawar diwes taissarlakro djas job win glan o foreskro wudar un penas ap kol tsele menshende, kai kote hi: “Tumen hi kek doosh. Me krom, te hadenn pen i menshe ap miro rajeste, un dom les mulo. Koon das kal tsele wawaren mulo?

2. Rajengro liil 12:21

Un leskre pralstune budepangre kran pen khetne, te denn le les mulo. Un dui lendar dan les mulo an o kheer pash o Millo, ap ko drom, kai djal an o foreskro kotar, hoi kharell Silla. Kol dui his o Josachar, koleskro dad o Shimat hi, un o Josabad, koleskro dad o Shomer hi. Un jon paskran les pash peskre phurende an o Davideskro foro. Un leskro tchawo, o Amazja, was baro rai pal leste.

2. Rajengro liil 15:30

Un o Hoshea, koleskro dad o Ela his, tchiwas pes wawarentsa khetne un das o Pekaches, koleskro dad o Remalja his, mulo un was baro rai pal leste. Kowa djas, har o Jotam, koleskro dad o Usija his, an o biishto bersh o baro rai pral o them Juda his.

2. Rajengro liil 8:28

Un khetne o Ahabeskro tchaweha, o Jorameha, djas lo an o kurepen an o foro Ramot an o them Gilead, te kurell lo pes o baro rajeha pral o them Syria. Leskro lab his Hasael. Kol Syrarja dan o Jorames jaake,

2. Rajengro liil 8:29

te djas lo pale an Jesreel, te well leskro dukepen pale sasto, hoi kol Syrarja les an o foro Rama dan, har job pes ko baro rajeha pral Syria, o Hasael, kuras. Un o Ahasja, koleskro dad o Joram his, was tele pash leste an Jesreel, kai o Joram dukedo tchiddo his.

2. Rajengro liil 9:2

Te weh tu koi, hatseh ko murshes Jehu, koleskro dad o Josafat hi, un koleskro dad o Nimshi hi. De les win gole dran kolende, kai pash leste hi! Un dja leha an i palstuni isema!

2. Rajengro liil 9:31

Un har o Jehu tel ko foreskro wudar was, penas joi: “Djal mishto, tu Simri, kai peskro rajes mulo das?”