2. Rajengro liil 23:15 - O Debleskro Drom 2021 (Sinte)

¹⁵ Ninna koi mulni platsa an Betel kras lo paash, hoi o Jerobeam, ko Nebateskro tchawo kras, te anell lo o Israel o baro Debleskro dromestar tele. Koi chatchepaskri phagas lo tele, das lakre barra paash un kras len jaake tiknes, te wan le phubjakri tchik. Un i figura, hoi sikras i debletsa Ashera, chatchras lo pre.

O Debleskro Lab 2024 (Sinte-Manouche)

¹⁵ Ninna koy moulni platsa an Betel kras lo paash, hoy o Yerobeam, ko Nebateskro čavo kras, te anell lo o Israel o baro Debleskro dromestar tele. Koy rhačepaskri phagas lo tele, das lakre barra paash oun kras len yaake tiknes, te van le phoubyakri čik. Oun i figura, hoy sikras i debletsa Ashera, rhačras lo pre.

2. Rajengro liil 23:15 ပူးပေါင်းရင်းမြစ်များ

1. Rajengro liil 12:28

Un o rai Jerobeam djinas pash peste, hoi nai krell lo, un mukas dui sonakangre terne grumjen te krell, un penas ap i menshende: “Tumer Israelitarja, hi doha, kai djan tumer jaake rah an Jerusalem, te mangenn o Debles an. Kate hi tumare debla, kolla anan tumen dran o them Egiptia!”

1. Rajengro liil 13:1

Koi was i Debleskro mursh dran Juda, koles bitchras o baro Dewel an Betel. Job was koi, har his o Jerobeam pash koi chatchepaskri tardo un chatchras sungepaskro koowa.

1. Rajengro liil 13:2

Un jaake har o baro Dewel leske penas, das o Debleskro mursh gole: “Chatchepaskri! Chatchepaskri! Shun, hoi o baro Dewel penell! I tchawo well boldo an o Davideskri familja. Leskro lab hi Josia. Kowa marell ap tute kol rashajen, kai chatchrenn sungepaskro koowa ap tute i mule deblenge. Un menshengre kokale wenn chatchedo ap tute.”

1. Rajengro liil 14:16

Dran o tchilatchepen, hoi o Jerobeam kras, mukell o baro Dewel i Israelitarjen. O Jerobeam djas o baro Debleskro dromestar tele, un kras, te djan i Israelitarja ninna o baro Debleskro dromestar tele.”

1. Rajengro liil 15:30

Kowa his i phagi koleske, hoi o Jerobeam kras, har djas lo o baro Debleskro dromestar tele, un kras, te djan ninna i Israelitarja ap i tchilatcho drom. Doleske was o baro Dewel, kai o Israeleskro Dewel hi, jaake chojedo pral leste.

1. Rajengro liil 21:22

Tu kral man chojedo, un anal i Israelitarjen miro dromestar tele. Doleske djal tiri familjake jaake djungeles har koi familjake fun o Jerobeam, koleskro dad o Nebat his, un har koi familjake fun o Baasha, koleskro dad o Achija his.’

2. Rajengro liil 10:31

O Jehu rikras pes gar peskro tselo djijestar ap i laba o baro Deblestar, kai o Israeleskro Dewel hi. Job mukas gar kol chochene deblen, hoi o Jerobeam kras, un kolentsa job i Israelitarjen o Debleskro dromestar tele anas.

2. Rajengro liil 23:4

Un o baro rai penas o pralstuno rashajeske Hilkija un wawar bare rashajenge, un kolenge, kai denn garda ap o wudar, te witsrenn le dran o baro Debleskro kheer kol tsele koola win, hoi kol deblenge Baal un Ashera un kol tsele bolepangre momelenge kerdo wan. Un job mukas halauter te chatchrell an i jag, win glan o foro Jerusalem an o telstuno them, hoi kharell Kidron. Un i jagakri tchik mukas lo an o foro Betel te anell.

2. Rajengro liil 23:6

Un o Josia mukas koi kashteni debletsa Ashera dran o baro Debleskro kheer te anell glan o foro Jerusalem pash ko tikno pani, kai kharell Kidron. Un kote mukas lo lat te chatchrell. Un hoi latar pral atchas, mukas lo tiknes te krell har phubjakri tchik, un tchiwas kowa khetne koi jagakri tchik ap o handako, kai i tchorwele paskedo wan.

2. Familjakro liil 34:6

Kowa kras lo ninna jaake ap i tsele platse an i forja, hoi an i themma Manasse, Efrajim un Simeon tchiddo hi, un bis an o them Naftali.

2. Familjakro liil 34:7

Un an o tselo them Israel phagas lo kol chatchepangre tele, ninna i figure, hoi i Ashera sikran. Un i tsele wawar figure das lo an kotja un kras len jaake tiknes, te his le har tchik. Un i boba, kai sungepaskro koowa chatchedo was, das lo trujel. Pal kowa djas lo pale an o foro Jerusalem.

Amos 3:14

Ap ko diwes, kai dau i Israelenge i phagi lengro tchilatchepaske, dau me i chatchepangre an Betel paash. Lengre shinga wenn tele phagedo, un perenn ap i phub.

1. Samuel 7:3

Kote penas o Samuel ap lende: “Te kamenn tumer tumaro tselo djijeha pale ap o baro Debleskro drom te djal, palle tchiwenn i chochene deblen tumendar krik, ninna i debletsa Astarte! Patsenn ap o baro Debleste, un mangenn les kokres an un kek wawares! Palle lell job tumen win dran i wasta i Filistarendar.”

1. Samuel 7:4

Un i Israelitarja tchiwan i chochene deblen krik, kai kharenn Baal un Astarte, un mangan kokres o baro Debles an.