2. Rajengro liil 16:15 - O Debleskro Drom 2021 (Sinte)

¹⁵ Un o baro rai Ahas mukas o rashajeske Urija te penell: “Ap koi newi bari chatchepaskri chatche kol viechen, hoi wenn taissarlake chatchedo, un ko chapen, hoi well rati chatchedo, ninna kol viechen un chapen, hoi anell o baro rai, un kol tsele viechen un ko chapen un koi mool, hoi anenn i menshe. Un ko tselo rat i viechendar, kolendar, kai wenn chatchedo un kolendar, kai wenn chalo, ko rat witse ap koi newi chatchepaskri. Koi chatchepaskri dran lolo saster lau mange, te rodap an i viechengre buke, hoi te krap.”

O Debleskro Lab 2024 (Sinte-Manouche)

¹⁵ Oun o baro ray Ahas moukas o rashayeske Ouriya te penell: “Ap koy nevi bari rhačepaskri rhače kol firhen, hoy venn taysarlake rhačedo, oun ko rhapen, hoy vell rati rhačedo, ninna kol firhen oun rhapen, hoy anell o baro ray, oun kol tsele firhen oun ko rhapen oun koy mool, hoy anenn i menshe. Oun ko tselo rat i firhendar, kolendar, kay venn rhačedo oun kolendar, kay venn rhalo, ko rat vitse ap koy nevi rhačepaskri. Koy rhačepaskri dran lolo saster lau mange, te rodap an i firhengre bouke, hoy te krap.”

2. Rajengro liil 16:15 ပူးပေါင်းရင်းမြစ်များ

1. Mose 44:5

Tumer tchoran miro rajeskro rupeno khoro, dran koleste job pijell un durkrell. Hi gar mishto, hoi kran!”

1. Rajengro liil 3:4

I diwes was, kai djas o baro rai Salomo an o foro Gibeon, te marell lo kote viechen o Debleske. Koi platsa his i feteder platsa, kai chatchran le viechen o Debleske. An o tselo tsiro his jaake jek sero viechen, hoi o Salomo kote ap koi chatchepaskri o Debleske chatchras.

1. Rajengro liil 7:23

Un o Huram kras i baro thopaskro tcharo. Kowa his pantch metarja lengsto fun jek rig ap i wawar, un 2,5 (dui-te-paash) metarja fun tel bis pral. Un i dori, hoi 15 (deesh-te-pantch) metarja lengsto hi, djals trul leste trujel.

1. Rajengro liil 8:64

Koi sasterni chatchepaskri his gar bares doha, te chatchrenn le kowa, hoi o Debleske dino was. Doleske las o baro rai Salomo ap ko diwes ninna o mashkralstuno kotar ap i platsa glan o Debleskro kheer chatchepaske. Kote mukas lo sawe viechen te chatchrell, hoi wan tseles o Debleske chatchedo, ninna jarro un ko thulepen kol viechendar, hoi chan le glan o baro Debleste.

2. Rajengro liil 16:14

Un koi chatchepaskri dran lolo saster, kai o baro Debleske vieche chatchedo wan, koi chatchepaskri mukas lo krik te tchiwell, te well li gar mashkral koi newi chatchepaskri un o baro Debleskro kheer tardo, un tchiwas les serwes pash koi newi chatchepaskri.

2. Rajengro liil 16:16

Un o rashai Urija kras halauter, hoi leske o baro rai Ahas penas.

2. Rajengro liil 18:4

O Hiskija kras kol mulne platse paash, kai le i mule deblen an-mangan. Job mukas kol bare barra an kotja te phagell, hoi le lenge pre-tchiwan, un mukas koi kashteni debletsa Ashera trujel te dell. Un job das ko sasterno sap paash, hoi mukas o Mose te krell. Glan ko tsiro, kai o Hiskija kowa kras, chatchran i Israelitarja sungepaskro koowa glan ko sap, un dan leste ko lab Nehushtan.

2. Rajengro liil 3:20

O wawar diwes taissarlakro, an ko tsiro, kai chatchran le chapen o Debleske, was pani i berge Edom tele. Un ko them was pherdo pani.

2. Familjakro liil 29:32

Khetne his kolla 70 (efta-deesh) grumja, 100 (sheel) mursh bakre un 200 (dui-sheel) terne bakre. Jaake bud vieche wan tseles chatchedo o baro Debleske.

2. Familjakro liil 29:35

Koi his bud budi kol tsele viechentsa, kai wan tseles chatchedo. Ninna hunte was o thulepen chatchedo kol wawar viechendar, kolengro mass i menshe chan. Un mool hunte was wi-tchoredo pash ko mass kol viechendar, kai wan tseles chatchedo. Un jaake was koi budi an o baro Debleskro kheer pale newes kerdo.

2. Familjakro liil 33:6

Un job mukas peskre tchawen an i jag te djal an i tala Ben-Hinnom, un shunas ap tchirklengre golja un wawar sikepen, un kras durkepen un rikras peske drawepangre un sawe menshen, kai i mulen putchan. Jaake kras lo bud koowa, hoi tchilatcho hi glan o baro Debleskre jaka, te choirell lo les.

Jesaja 2:6

Baro Dewel, tu mukal tire menshen. Jon krenn drawepangro koowa, har kol menshe, kai wenn kotar, kai o kham pre djala. Un jon hi durkepangre har i Filistarja. I menshentsa dran wawar themma krenn le tchomone win, un denn pengro dadeskro wast pre.

Daniel 11:31

Un job bitchrell lurden, kai o Debleskro kheer ap i berga pale-tchiddo krenn, un krenn, te wenn o Debleske buder gar hako diwes vieche anlo. Un jon tchiwenn kote koi djungeli tchilatchi figura pre.

Daniel 12:11

Un ko tsirestar, kai anenn le buder gar hako diwes viechen o Debleske, un kai tchiwenn le koi djungeli tchilatchi figura pre, hi 1.290 (jek-sero-dui-sheel-te-enja-deesh) diwessa.

Daniel 9:21

koi was ap jek kopo ko mursh Gabrijel ap tchirklengre mussja pash mande dren. Koles dikom an o dikepen ap ko tsiro, kai rati o Debleske i viecho anlo well.

Daniel 9:27

Un job krell pes budentsa khetne efta bershenge. Pal triin-te-paash bersha krell lo, te well o Debleske buder kek viecho anlo, witar kek chapen. Un i djungeli tchilatchi figura well pre-tchiddo an o Debleskro kheer un atchell koi, bis te well i phagi pral koleste, kai tchiwas les koi, – i phagi, hoi o Dewel leske glan dikas.

Hosea 4:12

Mire menshe putchenn pengre deblen un wawar kashta, te penenn jon lenge, hoi te krenn le. Lengre djia nashenn i chochene deblenge palla. Har i lubni mukell peskro romes, nashan le mandar, pengro Deblestar, krik.