2. Mose 27:9 - O Debleskro Drom 2021 (Sinte)

^9-10 Glan o Debleskro kheer kress tu i platsa. Trul koi platsa pandess tu laintikre kotja dran latcho sorelo than mank pesse kashta, hoi tardo hi ap lole sasterne herja. I rikepangre un kol shelle, hoi rikrenn i laintikre kotja, kress tu dran rup. I platsa well ap koi rig, kai o kham pralstunes hi, 50 (paash-sheel) metarja lengsto. Kote wenn kol laintikre kotja ap biish pesse kashta rikedo, hoi ap biish sasterne herja tardo hi.

O Debleskro Lab 2024 (Sinte-Manouche)

^9-10 Glan o Debleskro kheer kress tou i platsa. Troul koy platsa pandess tou layntikre kotya dran lačo zorelo than mank pesse kashta, hoy tardo hi ap lole sasterne herya. I rikepangre oun kol shelle, hoy rikrenn i layntikre kotya, kress tou dran roup. I platsa vell ap koy rig, kay o kham pralstounes hi, 50 (paash-sheel) metarya lengsto. Kote venn kol layntikre kotya ap biish pesse kashta rikedo, hoy ap biish sasterne herya tardo hi.

2. Mose 27:9 ပူးပေါင်းရင်းမြစ်များ

1. Rajengro liil 6:36

Job mukas ninna i glanstuni platsa trul o Debleskro kheer te krell. Trul i platsa kras lo i massuri, kai triin kope barra ap barra tchiddo wan, un ap i triinte barra wan zedertikre kashta tchiddo.

1. Rajengro liil 8:64

Koi sasterni chatchepaskri his gar bares doha, te chatchrenn le kowa, hoi o Debleske dino was. Doleske las o baro rai Salomo ap ko diwes ninna o mashkralstuno kotar ap i platsa glan o Debleskro kheer chatchepaske. Kote mukas lo sawe viechen te chatchrell, hoi wan tseles o Debleske chatchedo, ninna jarro un ko thulepen kol viechendar, hoi chan le glan o baro Debleste.

2. Familjakro liil 33:5

Un i tsele bolepangre momelenge tchiwas lo chatchepangre pre an kol dui glanstune platse glan o baro Debleskro kheer.

2. Familjakro liil 4:9

Un job kras i glanstuni platsa i rashajenge, ninna i bari glanstuni platsa un wudja glan i glanstuni platsa, un mukas kol wudja lolo sasteha pral te tserdell.

Debleskri gili 100:4

Awenn an i wudja glan leskro kheer un parkrenn tumen! Awenn ap i platsa glan leskro kheer un sharenn les i giljentsa! Parkrenn tumen pash leste un sharenn les.

Debleskri gili 116:19

un dau les tute kote ap i platsa glan tiro kheer an o foro Jerusalem. Sharedo well o baro Dewel!

Debleskri gili 84:10

Dik latches ap o baro rajeste, koles menge ap mari rig tchiwal! Dik ap leste, koles win rodal, te well lo maro rai!

Debleskri gili 92:13

Kolla, kai an o tchatchepen tardo hi, wenn sorelo har i senele palmtikre ruka. Jon well baro har i zedertikre ruka ap i berga Libanon.

2. Mose 35:17

kolla laintikre kotja un i pesse kashta ap herja, hoi trul i glanstuni platsa hi; koi plachta an o wudar glan i glanstuni platsa;

2. Mose 36:17

Un jon kran paash-sheel dorjengre gustria ap hako baro kotar ap koi rig, kai kol dui bare kotja khetne pandlo wenna.

2. Mose 39:40

kolla laintikre kotja un pesse kashta ap herja, hoi trul i glanstuni platsa hi; un koi plachta o wudareske ap i glanstuni platsa; kol tikne sasterne kotja, hoi denn le an i phub, te rikrenn le o plachteno kheer soreles, un kol shelle, hoi hi kote an-pandlo; ninna kol tsele koola, hoi kolen hunte well, kai budrenn an o Debleskro plachteno kheer.

2. Mose 40:33

Un trul o kheer un i sasterni chatchepaskri tchiwas lo i pesse kashta pre un pandas kol laintikre kotja mank lende, te was i platsa. Un an o wudar glan i platsa tchiwas lo koi bari plachta. Jaake kras o Mose koi tseli budi.

2. Mose 40:8

Trul i platsa glan o kheer tchip i pesse kashta pre, un pande kol laintikre kotja mank lende! Un an o wudar glan i platsa pande koi bari plachta pre!

Ezekiel 40:14

Un koi wudareskri halla his deesh metarja buchlo. Un i glanstuni platsa djas bis pash i massuri fun ko baro wudar.

Ezekiel 40:17

Un job anas man an i bari glanstuni platsa. Un trul i glanstuni platsa trujel djas i barrengro drom. Un pal o barrengro drom his trijanda tikne iseme tardo trul i glanstuni platsa.

Ezekiel 40:20

Un ko mursh dikas pal, har baro un buchlo ko wudar hi, hoi glan i bari glanstuni platsa hi ap koi rig, kai norden hi.

Ezekiel 40:23

Un jaake har pash ko wudar ap koi rig, kai o kham pre djal, his pash kau wudar ap i nordetikri rig. Wergel lestar his i baro wudar, hoi djas an i tikni glanstuni platsa. Un ko mursh ginas tele, har dur hi fun ko jek wudar bis pash ko wawar. Un kowa his 50 (paash-sheel) metarja.

Ezekiel 40:28

Un ko mursh djas mantsa an kau baro wudar, kai kote hi, kai o kham pralstunes tardo hi, un dureder ap i tikni glanstuni platsa. Un job dikas pal, har baro kau wudar hi. Un kowa his jaake baro har kol wawar wudja.

Ezekiel 40:32

Un job anas man an koi tikni glanstuni platsa ap koi rig, kai o kham pre djal. Un dikas pal, har baro ko baro wudar kote hi. Un kowa his jaake baro har kol wawar.

Ezekiel 40:44

Palle anas lo man glan koi tikni glanstuni platsa. Kote dikom dui iseme, kolengre wudja ap koi tikni glanstuni platsa djan. Koi jek isema his pash o nordetikro wudar, un lakri glanstuni rig sikrell kote, kai o kham pralstunes tardo hi. Un koi wawar isema his pash ko wudar, hoi kote tardo hi, kai o kham pralstunes hi, un lakri glanstuni rig sikrell kote, kai norden hi.

Ezekiel 42:3

Kau kheer his tardo mank koi tikni glanstuni platsa, hoi his deesh metarja buchlo, un koi drom, hoi djas trul i bari glanstuni platsa. Kau kheer his jaake kerdo, te his iseme telstunes, mashkralstunes un pralstunes.

4. Mose 3:26

ninna kol plachte, kai hi trul i platsa, hoi glan o kheer hi, kai ninna i sasterni chatchepaskri hi, kai vieche o Debleske chatchedo wenna. Ninna denn le jak ap koi plachta an o wudar glan koi platsa un ap i shelle un ko wawar koowa, hoi koi pashel hi.

4. Mose 4:26

ninna i laintikre kotja trul i glanstuni platsa, un koi bari plachta an o wudar glan i platsa, hoi trul o kheer un i sasterni chatchepaskri hi, ninna i shelle un ko tselo koowa, hoi koi pashel hi.

4. Mose 4:32

ninna kol pesse kashta, hoi wenn pre tardo trul koi glanstuni platsa, lengre pire un kol tikne sasterne kotja, kai deh an i phub, kol shelle un ko tselo wawar koowa, jaake har kowa lengre budi hi. Un tumer hunte sikrenn lende hako kotar, hoi hidjrenn le.