2. Mose 20:7 - O Debleskro Drom 2021 (Sinte)

⁷ Ma le miro lab ‘baro Dewel’ tchitcheske an tiro mui! Me, o baro Dewel, hom tiro Dewel un dau i phagi hakenes, koon kowa krella.

O Debleskro Lab 2024 (Sinte-Manouche)

⁷ Ma le miro lab baro Devel čičeske an tiro mouy! Me, o baro Devel, hom tiro Devel oun dau i phagi hakenes, koon kova krella.

2. Mose 20:7 ပူးပေါင်းရင်းမြစ်များ

1. Mose 27:20

Koi putchas o Isaak peskro tchawestar: “Har hatsal kowa jaake sik, miro tchawo?” “O baro Dewel, tiro Dewel, das man bacht”, penas o Jakob.

1. Rajengro liil 2:9

Kau koowa hunte less tu an tiro wast. Tu hal i gosewo mursh un tu djineh, hoi hunte kress leha. Job hi i phuro mursh. Muk les gar an o latchepen te merell! Muk les mulo te dell!”

2. Rajengro liil 5:20

O Debleskro mursh, o Elisa, les his i budepaskro. Leskro lab his Gehasi. Kowa penas ap peste: “Miro rai mukas o Naaman te djal un las lestar tchi, hoi kowa leske anas. Kau Syrari hunte plaissrals tchomone. Pash o djido Debleste, me nashau leske pal, te dell job man tchomone.”

Debleskri gili 139:20

Jon, kai praassenn tut un hadenn pen ap tute, lenn tiro lab an o mui te chochenn le.

Gosewe laba 30:9

Te wals man budeder har man hunte well, nai penaus: “Koon hi o baro Dewel?” Un te wals man gar doha, nai tchoraus un anaus ladj ap miro Debleste.

Jeremia 34:16

Un kanna rikran gar, hoi tumen sowel dan, un kran, har te wals miro lab tchi moldo! Hakeno tumendar kamell kol murshen un djuwjen pale, kai leskre budepangre his, un kolen job mukas te djal, te nai djan le penge kote, kai le kaman. Kanna lell lo len sorjah pale pale, te wenn le pale leskre pandle budepangre.

Jeremia 4:2

Te denn tumen sowel un penenn: Me dau man sowel pash o djido Debleste … un tumer chochenn gar koi pashel, un rikrenn tumaro lab, palle putchenn mandar i menshe an i wawar themma, te tchiwap miri bacht ap lende, un jon sharenn pen, kai prindjrenn jon man.

Ezekiel 39:7

Me sikrau mire menshenge Israel, te hom o Dewel, un mukau buder kek ladj ap mande te anell. I menshe an wawar themma hunte dikenn un haiwenn, te hom me o baro Dewel, o Dewel pral o Israel.

3. Mose 19:12

Ma denn tumen i chocheno sowel pash miro lab! Sau koweha anenn tumer ladj ap miro lab. Me, o baro Dewel, hom tumaro Dewel.

Maleachi 3:5

Un me kamau pash tumende te well, te wap tumaro tchatchepaskro rai. Un mange nai patsenna, me rakrau o tchatchepen win pral i menshende, kai hadenn man gar: kolla, kai durkrenna, kol mursha, kai chochran pengri romjat, un kol djuwja, kai chochran pengri romes, kolla, kai phagenn pengri sowel, un kolla, kai djan djungeles kolentsa trujel, kai budrenn lenge, un kolla, kai chochenn kol djuwjen, kolengro rom meras, un kolla, kai chochenn kol tchawen, kolen buder kek dad hi, un kolla, kai rikrenn kol wi-themarjen tele, kai djiwenn mashkral tumende. Ko penell o baro Dewel, ko rai pral o bolepen un i phub.

2. Korintarja 1:23

Kanna penau tumenge, hoske djom gar pash tumende. Me kamom tumen gar pale te dukrell. Glan o Debleste penau tumenge kawa pash mo djipen.

5. Mose 10:20

Un hunte shunenn ap tumaro baro Debleste un mangenn les kokres an. Rikrenn tumen ap leste kokres. Te denn tumen sowel, denn tumaro sowel pash leskro lab.

5. Mose 5:11

Ma le miro lab ‘baro Dewel’ tchitcheske an tiro mui! Me, o baro Dewel, hom tiro Dewel un dau i phagi hakenes, koon kowa krella.

5. Mose 6:13

Tu mangess o baro Debles an, un rikress les glan tire jaka pash halauter, hoi kreh. Te deh tut sowel, dess tiri sowel pash leskro lab.

Jakobo 5:12

Mire phrala, ma denn tumen sowel, gar ap o bolepen, witar gar ap i phub un witar gar ap wawar koowa. Te penenn tumer: “Awa,” jaake hunte well kowa ninna awa. Un te penenn tumer: “Na-a,” jaake hunte well kowa ninna na-a, te lenn kek phagi o Deblestar.

Josua 2:12

Kanna denn tumen kate sowel pash o baro Debleste, te wenn latches ap miro dadeskro kheer, jaake har me latches ap tumende homs. Un denn man tchomone, hoi sikrell man,

Josua 2:17

Kote penan kol mursha ap late: “Mer krah jaake, har men kai sowel dam, hoi tu kamal te das mer tut.

Josua 9:20

un kamah maro sowel, hoi dam, te rikrell, un mukah len te djiwell, te well gar i choli o Deblestar pral mende. Kowa kamah lentsa te krell: