2. Mose 19:16 - O Debleskro Drom 2021 (Sinte)

¹⁶ Ap o triinto diwes taissarlake das o bolepen bari gole, un jag das tele karje, un i pessi wolka his pral i tseli berga, un i phurdepaskri das bari gole. Un i tsele Israelitarja lan i bari traash, te trissan lengre kokale.

O Debleskro Lab 2024 (Sinte-Manouche)

¹⁶ Ap o triinto dives taysarlake das o bolepen bari gole, oun yag das tele karye, oun i pessi folka his pral i tseli berga, oun i phourdepaskri das bari gole. Oun i tsele Israelitarya lan i bari traash, te trissan lengre kokale.

2. Mose 19:16 ပူးပေါင်းရင်းမြစ်များ

2. Samuel 22:10

Un job tserdas o bolepen ap i rig, un was tele. Kali rat his tel leskre herja.

2. Familjakro liil 5:14

An koi wolka his o Debleskro railepen. O tselo kheer his pherdo o railepen o baro Deblestar. Doleske nai atchan i rashaja gar koi, te krenn le pengri budi.

Hiob 38:25

Koon kras i drom o brishineske, kai perell lo tele? Koon kras ko drom, kai o bolepaskri jag pre te tele karje dell?

Debleskri gili 50:3

Maro Dewel wella un mukell pes te shunell. Glan leste nashell i jag un chal lauter pre. Un trul leste phurdell i baro sorelo ducho.

Debleskri gili 77:18

Dran o bolepen das baro sorelo brishin. O bolepen das bari gole, un i jag das karje ap o bolepen kate un kote.

Debleskri gili 81:8

Har tuke ropaske his, un tu pal mande gole dal, wom me un lom tut win. Tu putchal mandar, un me rakrom tuha dran koi wolka. Pash o pani Meriba lom tut an i jak, te dikap, har tu shuneh ap mande.

Debleskri gili 97:4

I jag dran o bolepen, hoi tele ap kai phub karje dell, mukell i rat win dikell har o diwes. Un i phub dikell kowa un trissell.

2. Mose 19:11

Jaake te wenn le djudjes mange koi tardo o triinto diwes. Ap o triinto diwes wau me, o baro Dewel, glan i tsele menshende tele ap i berga Sinai.

2. Mose 19:15

Un job penas: “Rikrenn tumen djudjo o triinto diweske! Un kek mursh taprell an kau tsiro peskri romjat an!”

2. Mose 19:17

O Mose anas len pash i berga, kai o Dewel hi. Un jon atchan tardo tele glan i berga.

2. Mose 19:9

Kote penas o baro Dewel ap o Mose: “Shun, an i pessi wolka khatemen wau me pash tute. Jaake te nai shunenn i tsele Israelitarja, hoi me tuke penau, jaake te patsenn le tut hako tsireske.” Un o Mose penas o baro Debleske, hoi i Israelitarja penan.

2. Mose 20:18

Un i tsele Israelitarja shunan, har o bolepen gole das, un dikan, har jag dran o bolepen tele karje das. Ninna shunan le, har jek ap i phurdepaskri phurdas, un dikan i jagakro ducho. Un har jon kawa shunan un dikan, nashan le penge un atchan i kotar dureder tardo un trissan i darjatar.

2. Mose 20:21

Un i menshe atchan i kotar dureder tardo. Un o Mose djas pash koi kali wolka, an koja o Dewel his.

2. Mose 40:34

Koi was i wolka ap o Debleskro plachteno kheer. Un o kheer was pherdo railepen o baro Deblestar.

2. Mose 9:23

Kote hadas o Mose peskro kasht pre ap o bolepen. Un o baro Dewel mukas barrengro brishin ap i phub te perell. Un o bolepen das bari gole, un das jag karje pral un tele ap i phub. Ko brishin, kai jag pral un tele karje das, un brishineskre barra ap i phub peran, kowa his jaake pharo, har gomme gar das, jaake rah har i menshe an o them Egiptia djiwenna.

Jeremia 5:22

Hi tumen kek traash mandar, putchell o baro Dewel. Trissenn tumer gar glan mande? Me krom, te atchell o baro pani ap jek platsa, un tchiwom santa koi glan. Koi hunte atchell o pani hako tsiro, un dureder nai nashell lo gar. Ninna te well ko pani jaake diwjo, un djal pral un tele, nai djal lo gar dureder.

Nahum 1:3

O baro Dewel well gar sik chojedo. Les hi bari soor, un tchatchepah, hakeneste, kai doosh ap peste anas, dell job peskri phagi. Kote, kai o baro Dewel djal, phurdell i sorelo ducho. Un i wolke hi har koi tchik, hoi leskre pire pre witsrenn.

Mateo 24:31

Un job bitchrell peskre bolepangren pral i tseli phub. Un kolla phurdenn an i bashepangre, te anenn le dran hako them kolen khetne, kai o Dewel peske win rodas.

5. Mose 5:5

Un me homs mashkral tumende un o baro Debleste tardo an ko tsiro, te penap tumenge, hoi lo penas. Tumer daran i jagatar un djan gar ap i berga pre. Un o baro Dewel penas:

Hebrearja 12:21

Kowa lauter, hoi i menshe kote dikan un shunan, kras len jaake dareno, te penas ninna o Mose: Man hi sawi daar, te trissenn mire herja.

Debleskro tsiro 1:10

Ap o Debleskro diwes was o Debleskro Ducho soreles pral mande. Un me shunom pal mande i sorelo rakepen. Kowa his har i gole, hoi dell i phurdepaskri.

Debleskro tsiro 11:19

Un o Debleskro kheer an o bolepen was pre kerdo. Un an o Debleskro kheer dikom me ko sonakaskro mochton, hoi sikrella, kai o Dewel o maal peskre menshendar hi. Un i jag das karje dran o bolepen pre te tele. Un o bolepen das bari gole, har koi gole, hoi o bolepen della, te dell baro brishin un te djal jag tele dran o bolepen. Un i phub trissas, un das brishin har bare barra.

Debleskro tsiro 4:1

Pal kowa dikom i wudar an o bolepen, hoi pre hi. Un kowa, kai ap mande rakras, un leskri gole sorelo har i phurdepaskri his, kowa penas ap mande: “Ab kate pre! Me sikrau tut, hoi pal kawa wella.”

Debleskro tsiro 4:5

Un kotar, kai ko rajeskro beshepaskro hi, das jag karje pral un tele, un was i bari gole win, har koi gole, hoi o bolepen krella, te dell baro brishin un te djal jag tele ap i phub. Un glan o rajeskro beshepaskro chatchan efta jaga. Kol efta jaga hi o Debleskro Ducho.

Debleskro tsiro 8:5

Un ko bolepaskro las ko tcharo, an koleste ko gudlo kasht chatchedo wella, un kras les pherdi jag, hoi job dran o Debleskri chatchepaskri las, un tchoras o tcharo win ap i phub. Koi das jag karje pral un tele, un das bari soreli gole, har koi gole, hoi o bolepen krella, te dell baro brishin, un te djal jag tele ap i phub. Un i phub trissas soreles.