2. Mose 15:26 - O Debleskro Drom 2021 (Sinte)

²⁶ Un job penas: “Te shuneh tu ap mande, tiro baro Debleste, un kreh, hoi me penau, lauter, hoi an mire jaka tchatcho hi, un rikreh tut ap mire laba un kreh, hoi me tutar kamau, palle tchiwau me kek nasslepen ap tute, hoi tchiwom ap i Egiptarja. Me hom o baro Dewel, kai tut sasto krell.”

O Debleskro Lab 2024 (Sinte-Manouche)

²⁶ Oun yob penas: “Te shouneh tou ap mande, tiro baro Debleste, oun kreh, hoy me penau, lauter, hoy an mire yaka čačo hi, oun rikreh tout ap mire laba oun kreh, hoy me toutar kamau, palle čivau me kek nasslepen ap toute, hoy čivom ap i Egiptarya. Me hom o baro Devel, kay tout sasto krell.”

2. Mose 15:26 ပူးပေါင်းရင်းမြစ်များ

1. Rajengro liil 11:33

O Salomo mukas man, un mangas i Astarte an, kai debletsa, hoi i Sidonarja an-mangenn. Ninna mangas lo o Kemosh an, ko dewel, hoi i Moabarja an-mangenn, un o Milkom, ko dewel, hoi i Ammonarja an-mangenn. Job djas gar ap mire dromma un kras gar, hoi mishto hi glan mire jaka. Pal mire laba un miro tchatchepen djiwas lo gar, har kowa leskro dad, o David kras.

1. Rajengro liil 11:38

Te shuneh ap halauter, hoi me tuke penau, un te djah tu ap mire dromma un kreh, hoi glan mire jaka mishto hi, un djiweh pal miro tchatchepen un mire laba, har miro budepaskro, o David, kowa kras, palle hom me tuha. Un jaake har o Davideske krom, krau me, te well dran tiri familja hako tsiro jek, kai hi o rai. Un me dau tut o Israel, te wess rai pral leste.

2. Rajengro liil 2:21

Koi djas job win pash ko pani, tchiwas ko loon dren un penas: “Jaake penell o baro Dewel: ‘Me krom ko pani djudjo, un kek merell buder koi pre un kek tchawe wenn buder mules bolde.’”

2. Rajengro liil 20:5

“Dja pale pale un pen ap o Hiskija, ko rajeste pral mire menshende: ‘Kawa penell o baro Dewel, ko Dewel tiro dadestar, o Davidestar: Me shunom tiro mangepen un me dikom tire swa. Dik, me kamau tut sastes te krell – an o triinto diwes nai djah tu pral an o baro Debleskro kheer.

2. Rajengro liil 22:2

Un job kras, hoi mishto hi glan o baro Debleskre jaka, un djas o drom, kai leskro phuro dad o David ninna djas, un peras gar kau dromestar tele, gar ap i tchatchi rig un witar gar ap i serwi rig.

Hiob 5:18

Job dukrell, un palle tchiwell lo i pandepen ap ko dukepen. Job dell khetne, un leskre wasta krenn pale sasto.

Debleskri gili 103:3

Job hi kowa, kai miri tseli doosh mandar krik lella, kowa, kai miro tselo nasslepen krik lella un man sastes krella,

Debleskri gili 147:3

Kolen, kai lengro dji phagedo hi, krell lo pale sasto, un kolenge, kai dukedo hi, tchiwell lo i pandepen pre.

Debleskri gili 81:9

Mire menshe, shunenn ap mande, me dau tumen trad. Israel, shuness, hoi me tuke penau:

2. Mose 12:29

Un mashkral an i rat maras o baro Dewel i tsele mursh tchawen, kai his i phureder tchawe pengre dajendar, an o tselo them Egiptia: o Faraeskro phureder tchawes, kai ap o rajeskri beshepaskri beshdo hi, un ninna i phureder tchawen kolendar, kai stilde hi. Awa, ninna i mursh vieche, hoi his i phureder tchawe pengre dajendar, wan temerl dino.

2. Mose 19:5

Kanna shunenn: Te rikrenn tumer lauter, hoi me tumenge penau, un shunenn ap mire tsele laba, palle han tumer mange kutcheder har i tsele wawar menshe ap kai phub. Ninna te hi i tseli phub miro, han tumer kokres mire menshe,

2. Mose 19:6

un han wi-rodedo, te wenn bare raja un rashaja, kai hi mange koi.’ Kal laba peness tu ap i tsele Israelitarja.”

2. Mose 20:2

Me, o baro Dewel, hom tiro Dewel, koon tut win las dran o them Egiptia, kai tu i pandlo budepaskro hals.

2. Mose 23:25

Mangenn man, tumaro baro Debles, kokres an! Palle krau, te hi tumen doha maro un bud pani. Un me lau hako nasslepen, hoi mashkral tumende hi, tumendar krik.

Jesaja 55:3

Shunenn mishto, hoi penau, un awenn pash mande! Shunenn ap mande, te atchenn djido! Un me kamau tumentsa win te krell, te atchas mer mala hako tsireske. Ko latcho koowa, hoi o Davideske penom, well ap tumende.

Jesaja 57:18

Lengre dromma dikom me, un doleske krau jaake: Me krau len sasto, sikrau len o drom, un rakrau latches lentsa. Un kolenge, kai rowenn,

Jeremia 11:7

Me dom tumare phuren trad ap ko diwes, har anom len dran Egiptia win, bis ap kau diwes, un penom lenge pale te pale: Shunenn ap miro rakepen!

Jeremia 17:24

Te shunenn tumer kanna ap mande, penell o baro Dewel, un hidjrenn ap o Debleskro diwes tchi dren an wudja kau forestar, un rikrenn ko diwes dren un budrenn gar ap ko diwes,

Jeremia 30:17

Tut un tiro dukepen krau me pale sasto, penell o baro Dewel, ninna te penenn le ap tute ‘o praassedo them’ un: ‘o foro Zion, pal koleste kek putchella’.

Jeremia 33:6

Kanna shun, me kamau kau foro pale soreles te krell, un leskro dukepen sasto te krell, te djal leskre menshenge mishto, un te nai djiwenn le kek darjah.

Jeremia 7:23

Me penom lenge: Shunenn ap miro lab, palle kamau me tumaro Dewel te well, un tumer han mire menshe. Djan ap ko drom, kai me tumenge penom, palle djal tumenge mishto.

Jeremia 8:22

Hi an o them Gilead kek dukepaskro djet? Hi kek dramaskro koi? Hoske dell kek sastepen mire menshenge?

Ezekiel 18:5

I mursh, kai djiwell an o tchatchepen un krell, hoi mishto un tchatcho hi,

Hosea 11:3

Me sikrom o Efrajimeske, har te nashell lo, un lom les ap mire mussja. Un jon haiwan gar, hoi me lenge krom.

Hosea 6:1

Awenn, te djas pale pash o baro Debleste! Job dukas men, un job krell men pale sasto. Job das men dawa, un job pandell men pale khetne.

3. Mose 26:13

Me, o baro Dewel, hom tumaro Dewel, un anom tumen dran o them Egiptia win, te atchenn gar buder lengre pandle budepangre. Kote hans har grumja, kai hunte budrenn i kashteha trul lengri meen. Ko kashtes phagom me, te nai djan pale pre hadede sherja.

3. Mose 26:3

Te djiwenn jaake, har me tumendar kamau un rikrenn kowa hoi me penom,

4. Mose 12:13

Un o Mose das ap o baro Debleste gole: “Ach Dewel, kre lat sasto!”

5. Mose 12:25

Te krenn jaake, hi kowa mishto glan o baro Debleskre jaka, un tumenge un tumare tchawenge pal tumende djal mishto.

5. Mose 12:28

Denn jak, te rikrenn mishto lauter dren, hoi penom tumenge. Te djiwenn jaake, hi kowa mishto un latcho glan tumaro baro Debleskre jaka. Un tumenge un tumare tchawenge pal tumende djal mishto hako tsireske.

5. Mose 13:18

Un rikrenn tumenge tchi kolestar, hoi hunte kran paash! Palle lell o baro Dewel peskri bari choli tumendar krik, un well tumenge latcho, un krell tumenge pale peskro dji pre, te krell lo tumendar bud un budeder menshe, jaake har lo pes glan tumare phurende sowel das.

5. Mose 28:27

O baro Dewel bitchrell tumen sawo nasslepen, hoi lo glan i rah tsiro i Egiptarjen das: I djungelo nasslepen well ap tumaro mass, dukepen phagell pre, un tumaro mass chatchell un chandjrell. Un kek drab hi koi, hoi nai krell tumen sasto.

5. Mose 28:58

Un o Mose penas dureder: Doleske denn jak, te djan ap o drom tumaro baro Deblestar! Un rikrenn leskre tsele laba, hoi an kau liil dren tchinlo hi! Un dikenn ap leste pre, ap tumaro rajeste, kai jaake baro koowa krell, kai darenn i menshe lestar.

5. Mose 28:60

Ko tselo djungelo nasslepen, hoi lo pral i Egiptarjen anas, un kolendar tumen sawi daar his, anell lo palle ap tumende. Un tumer wenn gar sasto lestar.

5. Mose 32:39

Dikenn kanna dren, te hom me kokres o Dewel, dell kek wawar Dewel har man! Me marau un me krau djido, me dukrau un me krau sasto, un dell kek, kai jekes dran miro wast nai win lell.

5. Mose 5:1

Un o Mose das i tsele menshen Israel khetne gole, un penas ap lende: Shun Israel kowa, hoi o baro Dewel kamell tumendar, leskre tsele tchatchepaskre laba, hoi kau diwes glan tumare kanna penom. Rikrenn len an o shero, un denn jak ap lende, un djiwenn pal lende!

5. Mose 7:15

Un o baro Dewel lell hako nasslepen tumendar, un anell kek sawo nasslepen ap tumende, hoi ap i menshende an o them Egiptia wan, un hoi tumer prindjrenn. Na-a gar ap tumende tchiwell lo len, ap hakeneste, kai ap tumende pre djal, tchiwell lo len.