1. Samuel 8:7 - O Debleskro Drom 2021 (Sinte)

⁷ Un o baro Dewel penas ap o Samuel: “Shun ap i Israelitarja, an lauter, hoi jon ap tute penan. Jon tchiwan gar tut ap i rig, na-a man tchiwan le ap i rig, te wap me buder gar o baro rai pral lende.

O Debleskro Lab 2024 (Sinte-Manouche)

⁷ Oun o baro Devel penas ap o Samuel: “Shoun ap i Israelitarya, an lauter, hoy yon ap toute penan. Yon čivan gar tout ap i rig, na-a man čivan le ap i rig, te vap me bouder gar o baro ray pral lende.

1. Samuel 8:7 ပူးပေါင်းရင်းမြစ်များ

2. Mose 16:8

Palle penas o Mose: “Ap i rat dell lo tumen mass un taissarlakro jaake bud maro, te wenn tchalo. O baro Dewel shunas, har choiran tumen ap leste. Koon ham mer? Gar ap mende choiran tumen, na-a, han chojedo ap o baro Debleste.”

Jesaja 66:4

Doleske hi mange shukar, te anap len an i bibacht. Un anau kowa pral lende, glan leste jon jaake darenna. Me dom ap lende gole, un kek shunas un kek rakras pale. Me dom len trad, un kek das pre jak. Awa, jon kran kowa, hoi an mire jaka tchilatcho hi, un lenge his shukar, te krenn le kowa, hoi an mire jaka djungelo hi.

Jeremia 34:14

te mukell hakeno peskro ginlo budepaskres te djal, kowa, kai i wawar Israelitari hi, un kai bikras pes leske, un budras leske shob bersha. An o eftato bersh hunte mukas lo les te djal. Tumare phure shunan gar ap mande, un rikran pen gar ap mire laba.

Ezekiel 2:3

Tu, mensho, me bitchrau tut pash i Israelitarja. Kolla hadan pen un peran mandar tele. Ninna lengre phure hadan pen pale te pale pral mande. Un kolla, kai kau diwes djiwenn, hi gar wawartchandes.

Ezekiel 3:7

Kolla dran o kheer Israel kamenn gar ap mande te shunell. Doleske shunenn le witar gar ap tute. Jon lauter djan pal pengro shero. Un lengre djia hi har dran bar.

4. Mose 22:20

Koi was o baro Dewel an i rati pash o Bileam, un penas ap leste: “Wan kol mursha, te denn jon tut gole, te djas lentsa, palle dja lentsa!”

Mateo 10:40

Koon tumen an peskro kheer lella, lell man an peskro kheer. Un kowa, kai man an peskro kheer lella, kowa lell koles an peskro kheer, kai man bitchras.

Louka 10:16

Pale penas o Jesus ap peskre malende: “Koon ap tumende shunella, kowa shunella ap mande. Un koon shunell gar ap tumende, kowa shunell witar gar ap mande. Kowa, kai shunell gar ap mande, kowa shunell ninna gar ap koleste, kai bitchras man.”

Louka 19:14

I menshe an peskro them his chojedo ap leste un bitchran murshen leske palla, te penenn le leske: Mer kamah gar, te wess tu baro rai pral mende!

Louka 19:27

Un job penas dureder: Anenn kolen glan mande, kai hi chojedo ap mande, un kai kaman gar, te wap baro rai pral lende, un denn len glan mire jaka temerl!”

Johanni 13:16

Tchatchepah, me penau tumenge: I budepaskro hi gar bareder har leskro rai. Un jek, kai was bitchedo, hi gar bareder har kowa, kai les bitchras.

Čačepangre 8:23

O Gideon penas ap lende: “Gar me kamau pral tumende rai te well, un ninna mire tchawe wenn gar rai pral tumende. O baro Dewel well tumaro rai.”

1. Samuel 10:19

Tumer witsran kau diwes tumaro Debles ap i rig, koles, kai las tumen win dran tumari daar un tumaro pharo djipen. Ap koleste penan: ‘Tchip i baro rajes pral mende!’ Kanna mishto! Awenn glan o baro Debleste! Haki bari familja, hoi well pal jekeste kol deesh-te-dui Jakobeskre tchawendar well tardo peske, un mank lende ninna hako dadeskro kheer.”

1. Samuel 12:1

Un o Samuel penas ap i tsele Israelitarja: “Me shunom ap lauter, hoi tumer mange penan, un tchiwom i baro rajes pral tumende.

1. Samuel 12:12

Har tumer dikan, te djal o rai pral i Ammonarja, o Nahash win, te kurell lo pes tumentsa, penan tumer mange: “Mer kamah i baro rajes pral mende”, har te wals o baro Dewel gar tumaro baro rai.

1. Samuel 8:22

Un o baro Dewel penas ap o Samuel: “Shun ap lende un tchip i baro rajes pral lende!” Pal kowa penas o Samuel ap i Israeleskre murshen: “Djan khere, hakeno an peskro foro!”

1. Samuel 8:8

Kanna krenn le tuha jaake har jon les mantsa kran. Jaake rah har anom len win dran o them Egiptia, bis kau diwes, mukan le man pale te pale, un mangan wawar deblen an.