1. Samuel 6:14 - O Debleskro Drom 2021 (Sinte)

^14-15 Un o wurdin was ap i kotar phub, hoi his i murshes, kai kharas Josua un his dran Bet-Shemesh. Kote atchas o wurdin tardo. Kote his i baro bar tchiddo. Un i Levitarja lan ko mochton tele, kai o Debleskre deesh laba dren hi, ninna ko tikno mochton, hoi koi pashel tardo hi, an koja ko sonakaskro koowa his. Un tchiwan lauter ap ko baro bar. Un i menshe dan ko wurdineskro kasht tiknes, un maran kol grumjen un chatchran len o baro Debleske. Ap ko diwes maran kol mursha dran Bet-Shemesh kote gomme budeder viechen o baro Debleske. His vieche pashel, kai wan tseles chatchedo, un wawar, kai chan le khetne glan leste.

O Debleskro Lab 2024 (Sinte-Manouche)

^14-15 Oun o vourdin vas ap i kotar phoub, hoy his i morshes, kay kharas Yosua oun his dran Bet-Shemesh. Kote ačas o vourdin tardo. Kote his i baro bar čiddo. Oun i Levitarya lan ko morhton tele, kay o Debleskre deesh laba dren hi, ninna ko tikno morhton, hoy koy pashel tardo hi, an koya ko sonakaskro koova his. Oun čivan lauter ap ko baro bar. Oun i menshe dan ko vourdineskro kasht tiknes, oun maran kol groumyen oun rhačran len o baro Debleske. Ap ko dives maran kol morsha dran Bet-Shemesh kote gomme boudeder firhen o baro Debleske. His firhe pashel, kay van tseles rhačedo, oun vavar, kay rhan le khetne glan leste.

1. Samuel 6:14 ပူးပေါင်းရင်းမြစ်များ

2. Samuel 24:18

Un o Gad was ap ko diwes pash o David un penas ap leste: “Dja koi pral ap koi djobeskri platsa ko murshestar Arauna, ko Jebusari! Un kre kote o baro Debleske i chatchepaskri!”

2. Samuel 24:22

O Arauna penas ap o David: “Miro baro rai, le tuke kowa lauter un mare viechen o Debleske, jaake har kameh. Dik, koi hi i grumja chatchepaske! Le ninna ko wurdin un ko wawar kasht, hoi hi i grumjen trul i meen, te well tut kasht chatchepaske!

2. Samuel 24:25

Un o David kras koi o baro Debleske i chatchepaskri un anas viechen leske, sawen kai wan tseles chatchedo un sawen, kai chan le khetne glan o baro Debleste. Un o baro Dewel dikas pale latches ap ko them Israel. Un ko nasslepen djas kol menshendar pale krik.

1. Rajengro liil 19:21

Un o Elisa djas pale pale pash i grumjende, las dui grumjen un maras len. Ko kasht, hoi kol dujen khetne rikras, las lo un kras i jag. Koi pre keras lo o mass, das les peskre menshende, un jon chan. Palle stas lo pre, un nashas pal o Elija, un was leskro budepaskro.

2. Mose 20:24

Hi mange doha, te krenn mange i chatchepaskri dran phub! Koi pre anenn mange kol marede bakren un grumjen, hoi chatchrenn tseles mange, ninna kolen, hoi mange marenn, te chan tumer lengro mass khetne glan mande. Kote, kai kamau, te mangenn man an, kote wau me pash tumende un dau tumen miri bacht un miri soor.

Čačepangre 21:4

Un o wawar diwes taissarlake stan i menshe sik pre, un kran i chatchepaskri, un maran viechen o Debleske, sawe, hoi leske tseles chatchedo wan un sawe, kai chan le khetne glan leste.

Čačepangre 6:26

Un kre i chatchepaskri o baro Debleske, kai tiro Dewel hi, kate pral ap kai berga, kai tumaro sorelo kheer tardo hi! Un le ko duito gurum un mare les mange un chatche les mange kote! Kre koi jag ko kashteha, hoi i debletsa Ashera his, hoi tu trujel dal!”

1. Samuel 11:5

An ko tsiro was o Saul peskre grumjentsa pale peskri budjatar ap peskro kotar phub, un putchas: “Hoi hi i menshenge, te rowenn le jaake?” Un jon penan leske i laba, hoi i mursha dran Jabesh lenge penan.

1. Samuel 20:29

Job penas: ‘Muk man koi te djal! Mire menshe anenn o Debleske viechen an o foro. Un miro phraal penas, me hunte wap. Te hom tiro maal, palle muk man te djal, te dikap mire phralen!’ Doleske was lo gar pash tiro chapen.”

1. Samuel 6:13

Un i menshe dran Bet-Shemesh lan an ko tsiro o djob dren an o telstuno them. Un har le pre dikan, un o mochton dikan, kai o Debleskre deesh laba dren hi, wan le bachteles.

1. Samuel 6:18

Ninna dan le sonakangre kermuse, jek kermuso hako foreske, pral koleste i pantch Filistarja i raja his: gar kokres i sorele forjenge, na-a ninna hako gab. Ko baro bar, kai tchiwan le o mochton pre, kai o Debleskre deesh laba dren hi, ko bar hi gomme kau diwes tchiddo ap ko kotar phub, hoi hi ko murshes Josua dran Bet-Shemesh.