1. Samuel 31:7 - O Debleskro Drom 2021 (Sinte)

⁷ Har shunan kol Israelitarja, kai djiwan wergel i tala Jesreel un wergel o pani Jordan, te nashan penge i Israelengre lurde, un kai meras o Saul un leskre tchawe, kote nashan jon dran pengre forja un nashan penge ninna. Un i Filistarja wan koi un djiwan an kol forja.

O Debleskro Lab 2024 (Sinte-Manouche)

⁷ Har shounan kol Israelitarya, kay djivan vergel i tala Yesreel oun vergel o pani Yordan, te nashan penge i Israelengre lourde, oun kay meras o Saul oun leskre čave, kote nashan yon dran pengre forya oun nashan penge ninna. Oun i Filistarya van koy oun djivan an kol forya.

1. Samuel 31:7 ပူးပေါင်းရင်းမြစ်များ

3. Mose 26:32

Me krau te well tumaro them i mulo them. Un kolla, kai kuran pen tumentsa, un wenn, te djiwenn le koi, lenge atchell o rakepen krik, te dikenn le kowa.

3. Mose 26:36

Kolla, kai tumendar pral atchenn an kol wawar themma, kai le pandle hi, kolen krau jaake dareno, te well len daar glan i patri, hoi krik phurdedo well. Lestar nashenn le, har te lals jek len o chareha palla. Un jon perenn, un jek perell pral o wawareste, ninna te hi kek koi, kai len palla las. Un tumen hi kek soor, te kurenn tumen kolentsa, kai ap tumende djan.

5. Mose 28:33

Lauter, hoi ap tiri hachetikri phub baro was, koleske tu phares budral, chan sawe menshe, kai wenn dran i dur them. Un tu weh sorjah tele rikedo, un hunte budress tel duka tiro tselo djipen.

Čačepangre 6:2

Un kolengro wast was jaake soreles pral o Israel, te khatran pen i Israelitarja an i berge un djiwan an i grotte mank i bare barra un an sorele khera, hoi kran pen le an i berge.

1. Samuel 13:6

Har i Israelitarja dikan, har sorelo i Filistarja hi, tapras len i daar, un jon khatran pen an i phub, pal subjengre burra, mank bare barra, an grufte un panjengre chebja.

1. Samuel 13:7

His ninna sawe, kai nashan pral o Jordan an i themma Gad un Gilead. Un o Saul his gomme an Gilgal un kol lurden, kai pash leste his, his bari daar.

1. Samuel 31:6

Jaake meras o Saul un leskre triin tchawe, un leskro hidjepaskro lurdo, un kol tsele mursha, kai pash leste his, ap ko jek diwes.

1. Samuel 31:8

Un ap ko diwes pal o kurepen wan i Filistarja, te randenn le lauter kolendar, kai kote mulo tchiddo hi. Un koi pashel hatsan le o Saules un leskre triin tchawen mules ap koi berga Gilboa tchiddo.