1. Samuel 20:13 - O Debleskro Drom 2021 (Sinte)

¹³ Te kamals miro dad tuke tchilatchepen te krell, un me penoms tuke kowa gar, palle nai dell man o baro Dewel mulo. Palle mukau me tut te djal, jaake te nai djah tu an o latchepen. Un o baro Dewel mu well jaake ap tiri rig, har job ap miro dadeskri rig his.

O Debleskro Lab 2024 (Sinte-Manouche)

¹³ Te kamals miro dad touke čilačepen te krell, oun me penoms touke kova gar, palle nay dell man o baro Devel moulo. Palle moukau me tout te djal, yaake te nay djah tou an o lačepen. Oun o baro Devel mou vell yaake ap tiri rig, har yob ap miro dadeskri rig his.

1. Samuel 20:13 ပူးပေါင်းရင်းမြစ်များ

2. Samuel 19:13

Tumer han mire phrala, miro mass un rat. Hoske mukenn tumer kol tsele wawaren glan tumende pash o baro rajeste te well, te lenn le les pale pale?”

2. Samuel 3:35

O tselo diwes wan menshe pash o Davideste, un kaman, te chal job. Koi das job pes sowel un penas: “O Dewel nai krell mantsa, hoi job kamella, te chau me maro oder wawar koowa, bis te o kham tele djas.”

2. Samuel 7:15

Miro latchepen lau gar lestar krik, har me miro latchepen o Saulestar krik lom, koles krik lom, te wess tu baro rai.

1. Rajengro liil 1:37

Har o baro Dewel miro baro rajeha his, jaake te well job o Salomeha. Mu well o tchawo gomme bareder har leskro dad!”

1. Rajengro liil 19:2

Kote bitchras i Isebel i bitchepaskres pash o Elija un mukas leske te penell: “I debla mu denn man i bari phagi, te krom gar tuha taissar an kau tsiro, hoi tu kral lentsa.”

1. Rajengro liil 20:10

Kote bitchras len o Ben-Hadad pale pash o Ahab, un mukas leske te penell: “I debla nai denn man mulo, te dau me gar o foro Samaria paash. Kau forestar atchell gar jaake bud pral, te nai lell hakeno mire lurdendar jek wast pherdo tchik peha.”

1. Familjakro liil 22:11

Kanna, miro tchawo, mu well o baro Dewel ap tiri rig, te nai kreh tiro baro Debleske i kheer, jaake har job tutar penas.

Mateo 28:20

Penenn lenge, te rikrenn le ap lauter, hoi me tumenge penom! Tchatchepah, me hom pash tumende hako diwes jaake rah, har i phub koi hi.”

Filiparja 4:9

Un djiwenn jaake, har me tumenge penom un sikrom, jaake har tumer kowa mandar shunan un ap mande dikan! Un o Dewel, kai kras i drom, te nai djiwah an o latchepen khetne, hi tumentsa!

Josua 1:5

Kek nai well sorleder har tu, jaake rah har tu djiweh. Jaake har me o Moseha homs, jaake wau me tuha. Me mukau tut gar, un me djau gar tutar.

Ruth 1:17

Kote kai tu mereh, kamau ninna te merell. Un kote kamau me paskedo te well. O baro Debleskri choli well pral mande, te rikrau gar, hoi tuke penom. O merepen kokres nai tchinell men, – ko jekes o wawarestar.”

1. Samuel 10:7

Kanna, te well kowa lauter, palle kre kowa, hoi glan tire wasta hi. O Dewel hi pash tute.

1. Samuel 14:47

Har was o Saul o baro rai pral o Israel, djas lo an o kurepen lauterentsa, kai djiwan trul o them Israel un kaman les tele te rikrell. Kolla his i menshe dran o them Moab, Ammon un Edom, ninna i bare raja an o them Zoba, un i Filistarja. Un kai lo ninna djas, kote was lo o sorleder.

1. Samuel 17:37

Un pale penas o David: “O baro Dewel, kai las man win dran o leweskre mussja un dran o bereskre mussja, kowa lell man ninna win dran i wasta kau Filistarestar.” Un o Saul penas ap o David: “Dja koi, o baro Dewel djal tuha!”

1. Samuel 18:12

O baro Dewel his o Davideha un buder gar o Sauleha. Doleske daras o Saul o Davidestar.

1. Samuel 19:3

Me kamau miro dadeha win te djal kote ap kai platsa, kai tu hal, un rakrau leha pral tute. Un hoi shunau, kowa penau tuke pale.”

1. Samuel 20:12

Un o Jonatan penas ap o David: “Pash o baro Debleste, ko Israeleskro Dewel, dau man sowel, te penap tuke, hoi miro dades tuha glan hi. Taissar un ap o triinto diwes rakrau leha. Te dikau, te hi mishto trul tute tardo, bitchrau jekes, kai kowa tuke penella.

1. Samuel 20:14

Tutar mangau, te wess jaake latches ap mande, har o baro Dewel latches ap tute hi, jaake rah har djiwau.

1. Samuel 25:22

O Dewel mu dell man i phagi, te mukau jek murshes djido leskre tsele murshendar, bis te djal o kham taissarlakro pre.”

1. Samuel 3:17

“Hoi penas o Dewel tuke?” putchas lestar o Eli. “Pen mange lauter, un rike tchi pale! O Dewel te dell tut i phagi, te peneh mange gar i tsele laba, hoi lo ap tute rakras.”