1. Samuel 12:3 - O Debleskro Drom 2021 (Sinte)

³ Doleske hom kanna glan tumende tardo: Stenn pre un rakrenn kate glan o baro Debleste un glan o baro rajeste, kones job win rodas: Koneskri grumni lom me? Koneskri esla? Kones chochrom me? Konestar lom i sorjah, hoi leske his? Konestar mukom man te plaissrell, te pandap mire jaka glan leskro tchilatcho koowa. Me te krom kowa, palle kamau les me pale te dell.”

O Debleskro Lab 2024 (Sinte-Manouche)

³ Doleske hom kanna glan t'mende tardo: Stenn pre oun rakrenn kate glan o baro Debleste oun glan o baro rayeste, kones yob vin rodas: Koneskri groumni lom me? Koneskri esla? Kones rhorhrom me? Konestar lom i zoryah, hoy leske his? Konestar moukom man te playsrell, te pandap mire yaka glan leskro čilačo koova. Me te krom kova, palle kamau les me pale te dell.”

1. Samuel 12:3 ပူးပေါင်းရင်းမြစ်များ

2. Samuel 22:22

Me rikrom man ap i dromma o baro Deblestar, un mukom gar miro Debles.

Nehemia 5:11

Denn len gomme kau diwes lengri hachetikri phub pale, ninna lengro drakengro them, lengre djeteskre ruka un lengre khera! Un mukenn lenge lengri tseli sijaan tele, hoi jon pash tumende hi, lowe, djob, mool un djet!”

Debleskri gili 15:5

Te patsas lo peskre lowe, lell lo gar budeder lowe pale. Ninna te denn le les shukar koowa, anell lo kek chochepen ap koleste, kai kek tchilatchepen kras. Koon jaake djiwella, kowa hi soreles tardo an peskro djipen.

2. Mose 20:17

Ma rode, har nai less tu kowa tuke, hoi i wawares hi: leskro kheer, leskri romni, budepaskro, budepaskretsa, grumni, burika, tchi, hoi i wawares hi.

2. Mose 22:4

Te dell i mursh gar jak ap peskre viechende, un mukell len ap i wawareskro them te djal un kote te chal, palle hunte dell lo kowa pale. Te chan i vieche djob, palle dell lo o latcheder djob, hoi leskro hi. Te chan i vieche drake, palle dell lo peskre latcheder drake.

2. Mose 23:8

Te hi jek an o tchingepen i wawareha un kamell tut te ginell, te dess les tchatchepen, ma le kowa, hoi job kamell tut dell! Koon sau koowa an-lell, well korelo o tchatchepaske un dikell buder gar, koon an o tchatchepen hi.

Gosewe laba 15:27

Koon chochepah peskro brawlepen khetne lell, anell peskri familja an i bibacht. Koon mukell pes gar te ginell, sawo djiwell.

3. Mose 6:4

Palle riwell lo peskre koola win un wawar koola an, un hidjrell koi jagakri tchik win dran koi platsa, kai i menshe hi, ap i platsa, hoi hi djudjo o Debleske.

3. Mose 6:5

Un koi jag ap i chatchepaskri chatchell dureder, un djal ko tselo tsiro gar win. Haki taissarla tchiwell o rashai kasht pre, un koi pre ko mass ko viechestar, hoi well tseles chatchedo, ninna kol kotja thulepen ko viechestar, hoi i menshe khetne chan. Un o rashai mukell lauter pre te chatchrell.

4. Mose 16:15

Koi was o Mose chojedo, un penas ap o baro Debleste: “Ma dik latches ap kowa, hoi jon tut denna! Me lom gar i burika lendar, un krom len kek tchilatchepen.”

Mateo 22:21

Penan le: “O shero un o lab o baro rajestar an o foro Rom!” Penas lo ap lende: “Jaake denn leste, hoi leskro hi! Un denn o Debleste, hoi leskro hi!”

Louka 19:8

O Zacheo his koi tardo un penas ap o Jesuseste: “Mo rai, me dau i tchorwelende i paash lauterestar, hoi man hi. Un te chochrom jekes, dau les kanna star kope jaake bud pale.”

Bičepangre 20:33

Tumer djinenna: Me mangom kekestar tumendar tchomone: kek sonakai, kek rup, kek an-ripaske. Mire wastentsa budrom, te well man un kolen, kai pash mande hi, te chal.

2. Korintarja 12:14

Me wau kanna o triinto kopo pash tumende. Ninna kau kopo kamau tchi tumendar te lell. Me kamau tumen un gar tumare lowe. O dad un i dai denn pengre tchawen te chal, un gar i tchawe pengro dades un pengri dat.

5. Mose 16:19

Te hal tu i tchatchepaskro, hunte dess tu koles peskro tchatchepen, koon an o tchatchepen hi. Tu dikess gar koi pre, koon glan tute tardo hi. Te dell jek tut kutch koowa, te dess tu les tchatchepen, ma le kowa an! Koon sawo shukar kutch koowa an-lell, well korelo o tchatchepaske, un dikell buder gar, koon an o tchatchepen hi.

1. Tessalonikarja 2:10

O Dewel dikas, har djiwam mashkral tumende. Un tumer, kai ap leste patsenna, dikan ninna, te djiwam jaake pash tumende har o Dewel kamella, un djam pal o tchatchepen, te hatsas kek i doosh ap mende.

1. Tessalonikarja 2:5

Tumer djinenna, mer rakram tumenge gar pal o mui. Witar gar penam o Debleskro lab, te las lowe i menshendar. O Dewel djinella, me penau o tchatchepen.

1. Petro 5:2

Denn garda ap i patslende, kai o Dewel peske khetne anas! Tumer han har i bakrengre. Un o Debleskre tchawe hi har bakre, hoi o Dewel an tumare wasta das. Denn len kowa, hoi len hunte wella, te atchell lengro patsepen djido! Krenn kowa o tselo djijestar! Jaake kamell les o Dewel. Krenn kowa gar, har te wals i phari budi, hoi hunte krenn! Krenn koi budi dran o kamlepen un gar, te wenn tumer plaissedo!

1. Samuel 10:1

Un o Samuel las o khoro, kai o kutch djet dren hi, un tchoras les pral o Sauleskro shero. Un job tchumras les un penas: “Ko djet sikrella, te tchiwas tut o baro Dewel pral peskre menshende, te wess lengro rai.

1. Samuel 12:4

Jon penan: “Tu chochral men gar, un lal tuke tchi i sorjah, un lal kekestar tchomone an, te pandess tire jaka glan leskro tchilatcho koowa.”

1. Samuel 12:5

Job penas ap lende: “O baro Dewel un tumaro baro rai, koles job wi-rodas, kolla dui dikenn un shunenn kau diwes, te hatsan tumer tchi an miro wast.” “Awa, jaake hi kowa”, penan le.

1. Samuel 2:35

Me mukau mange i rashajes pre te stell, kai peskri budi mishto krell. Job krell lauter jaake, har me kamau un mange shukar hi. Un me krau leske i kheer, hoi atchella. Un job budrella hako tsiro koleske, koles me wi-rodau, te well lo baro rai.

1. Samuel 24:11

Kau diwes nai dikeh tire jakentsa, te das tut o baro Dewel an mire wasta, har hals tu an koi grotta. Un mange penan le, te dap tut mulo. Un me krom tut tchi. Me penom mange: Me kamau gar miro wast ap miro rajeste te tchiwell, koles o baro Dewel win rodas, te well lo baro rai.

1. Samuel 24:6

Pal kowa, har lo kowa kras, djas leskro dji soreles.

1. Samuel 24:7

Un job penas ap kol murshende, kai pash leste his: “O baro Dewel mu rikrell man pale, te taprap miro rajes an, koles o baro Dewel win rodas, te well lo baro rai. Kowa hi lo un atchell lo.”

1. Samuel 26:11

O baro Dewel mu rikrell man pale, te taprap me koles an, kones job peske win rodas. Le kanna leskro witsepaskro tchuri, hoi pash leskro shero an i phub dino hi, un leskro panjeskro khoro, te djas mer menge!”

1. Samuel 26:9

O David penas: “Na-a, ma de les mulo! Koon hadell o wast pre ap koleste, koles o baro Dewel peske win rodas, kowa lell peskri phagi.”