1. Rajengro liil 22:22 - O Debleskro Drom 2021 (Sinte)

²² Un job penas: ‘Me mukau i chochepaskro ducho te well, hoi rakrell dran i muja leskre tsele dikepangren!’ Koi penas o baro Dewel: ‘Tu hunte kress kowa. Tuke djal kowa mishto. Dja win, un kre les jaake!’”

O Debleskro Lab 2024 (Sinte-Manouche)

²² Oun yob penas: Me moukau i rhorhepaskro dourho te vell, hoy rakrell dran i mouya leskre tsele dikepangren! Koy penas o baro Devel: Tou hounte kress kova. Touke djal kova mishto. Dja vin, oun kre les yaake!”

1. Rajengro liil 22:22 ပူးပေါင်းရင်းမြစ်များ

1. Rajengro liil 13:18

Kote penas o phuro ap leste: “Me hom ninna i Debleskro rakepaskro har tu, un i bolepaskro o baro Deblestar penas mange: ‘An les khere pash tute, te nai chal lo maro un te nai pijell lo pani!’” Chochepen his kowa, hoi ko phuro penas.

1. Rajengro liil 22:20

Un o baro Dewel penas: ‘Koon nai krell, te patsell o Ahab o chochepen, un djal an o kurepen o foreha Ramot an o them Gilead, un merell kote?’ Un ko jek penas jaake, ko wawar penas jaake.

1. Rajengro liil 22:21

Kote djas i bolepaskro ducho glan o baro Debleste un penas: ‘Me krau, te patsell lo o chochepen.’ Un o baro Dewel putchas: ‘Har kreh kowa?’

2. Rajengro liil 3:13

O Elisa penas ap o baro rai pral Israel: “Hoi djah tu man an? Dja pash kol Debleskre rakepangre, kolendar tiro dad un tiri dai i lab putchan!” “Na-a”, penas o baro rai pral Israel ap leste, “o baro Dewel das men triin rajen kai gole, te dell lo men an kol wasta i menshendar Moab.”

Hiob 1:12

Kote penas o baro Dewel ap o beng: “Mishto! Halauter, hoi les hi, dau an tiro wast. Les kokres ma tape an!” Pal kowa djas o beng krik o baro Deblestar.

Hiob 12:16

Pash leste hi i soor un o tchatcho goswepen. Les hi ninna i soor pral koleste, kai perell o tchatcho dromestar tele, un pral koleste, kai anell les o tchatcho dromestar tele.

Debleskri gili 109:17

Job kamas o praassepen. Jaake mu well kowa ninna ap leste! Job kamas gar te rakrell i bacht pral jekeste win. Kanna, mu atchell i bacht dur lestar!

Jesaja 19:14

O baro Dewel kras, te wenn le har mato un rakrenn sawo koowa, te djinenn i Egiptarja buder gar, hoi te krenn. Jaake perenn le jek rigjatar ap i wawar har i mato, kai perell an peskro tchadepen.

Ezekiel 14:9

Te mukell pes i Debleskro rakepaskro jaake dur te anell, te dell lo les i lab mandar dureder, palle krau me, o baro Dewel, te dell lo i chocheno lab dureder. Un me hadau miro wast pral leste, un krau les pale-tchiddo, te djiwell lo buder gar mank mire menshende Israel.

Zakarie 13:2

O baro Dewel, ko rai pral o bolepen un i phub, penell: An ko tsiro krau, te mangenn i menshe an o them Juda buder kek chochene deblen an. Un kolengre laba wenn bistedo. Ninna kol rakepangre, kai penenn, te hi le Debleskre rakepangre un hi kowa gar, un jon rakrenn, hoi i wawar ducho lenge penell, kolen tradau win dran o them.

Johanni 8:44

Tumaro dad hi o beng. Un tumer krenna, hoi tumaro dad ninna kamella. Job hi jek, kai marell i menshen hako tsiro. Un job hi gar an o tchatchepen tardo. O tchatchepen hi gar an leste. Te rakrell job o chochepen, well kowa dran leste. Job hi i chocheno, un anas o chochepen ap kai phub.

1. Timoteo 4:1

O Debleskro Ducho penell menge, te perenn i menshe o Debleskro dromestar tele an ko tsiro, hoi wella. Jon shunenn ap o chochepen, un ap kowa, hoi wella o bengestar.

1. Johanni 4:6

Mer ham o Deblestar, un hakeno, koon o Debles prindjrella, shunell ap mende. Koon hi gar o Deblestar, kowa shunell gar ap mende. Doleske djinah mer, kones o Debleskro Ducho hi, kai rakrell o tchatchepen, un kones o chocheno ducho hi.

Debleskro tsiro 17:17

Kowa das len o Dewel an lengre djia, te krenn jon, hoi job kamella. Doleske rikrenn le lauter khetne, un denn pengri soor ko viecheste. Kowa djala lauter jaake rah, bis te was lauter jaake, har o Dewel penas.

Debleskro tsiro 20:10

Un o beng, kai anas len ap peskro drom, well an i bari jag witsedo, hoi soreles chatchella un khandella. Kote hi ninna o viecho, un ko chocheno rakepaskro. Kote well len hako tsiro bare duka.

Debleskro tsiro 20:7

Pal kol sero bersh well o beng dran peskro stilepen win muklo.

Čačepangre 9:23

Un palle bitchras o Dewel i tchilatcho ducho mashkral o Abimelech un i menshende an o foro Sichem. Un kolla rissran pen lestar tele, un rikran buder gar pash leste.

1. Samuel 16:14

Un o baro Debleskro ducho djas peske o Saulestar. Un o baro Dewel bitchras leske i tchilatcho ducho, hoi kras leske daar.

1. Samuel 18:10

O wawar diwes mukas o Dewel o tchilatcho duches pral o Sauleste te well. Un job was diwjes an peskro kheer. I harfa an o wast bashras o David o Sauleske, jaake har job hako diwes kras. Un o Saules his i witsepaskro tchuri an o wast.

1. Samuel 19:9

Un ko tchilatcho ducho, bitchedo o baro Deblestar, was pral o Saul, har job khere beshdo his un peskro witsepaskro tchuri an o wast rikras. Ninna o David his koi un bashras ap peskri dorjengri bashepaskri.