1. Rajengro liil 15:13 - O Debleskro Drom 2021 (Sinte)

¹³ Un ninna kras lo, te his leskri dai, i Maacha, buder gar i rani. Kowa kras lo doleske, kai mukas li i djungeli figura te krell, hoi i debletsa Ashera sikras. Un o Asa das lakri djungeli figura an kotja un chatchras lat pash o pani Kidron.

O Debleskro Lab 2024 (Sinte-Manouche)

¹³ Oun ninna kras lo, te his leskri day, i Maaka, bouder gar i rani. Kova kras lo doleske, kay moukas li i djoungeli figura te krell, hoy i debletsa Ashera sikras. Oun o Asa das lakri djoungeli figura an kotya oun rhačras lat pash o pani Kidron.

1. Rajengro liil 15:13 ပူးပေါင်းရင်းမြစ်များ

2. Samuel 15:23

Un lauter, kai pale atchan, rowan soreles, har kol tsele lurde glan leste wergel djan. Un o baro rai djas wergel ko tikno pani Kidron. Un khetne leha djan kol tsele lurde dureder ap ko drom, kai djal an ko mulo them.

1. Rajengro liil 15:10

Un job his 41 (star-deesh-te-jek) bersha baro rai an o foro Jerusalem. Leskri dai his i Maacha, lakro dad his o Abishalom.

1. Rajengro liil 15:2

Triin bersha his lo baro rai an o foro Jerusalem. Leskri dai his i Maacha, kolakro dad his o Abishalom.

1. Rajengro liil 2:19

Un i Batsheba djas pash o baro rajeste Salomo, te rakrell li leha pral kowa, hoi o Adonija lestar kamell. Un o baro rai, har dikas lo peskri dai, stas lo pre glan late, tchiwas peskro shero tele glan late, un beshas pes ap peskri rajeskri beshepaskri. Un lake mukas lo ninna i beshepaskri te well, te beshell li pes nai ap leskri tchatchi rig.

2. Rajengro liil 10:26

Un lan kol figure win, hoi i Ashera sikrenn, un chatchran len pre.

2. Rajengro liil 18:4

O Hiskija kras kol mulne platse paash, kai le i mule deblen an-mangan. Job mukas kol bare barra an kotja te phagell, hoi le lenge pre-tchiwan, un mukas koi kashteni debletsa Ashera trujel te dell. Un job das ko sasterno sap paash, hoi mukas o Mose te krell. Glan ko tsiro, kai o Hiskija kowa kras, chatchran i Israelitarja sungepaskro koowa glan ko sap, un dan leste ko lab Nehushtan.

2. Rajengro liil 23:4

Un o baro rai penas o pralstuno rashajeske Hilkija un wawar bare rashajenge, un kolenge, kai denn garda ap o wudar, te witsrenn le dran o baro Debleskro kheer kol tsele koola win, hoi kol deblenge Baal un Ashera un kol tsele bolepangre momelenge kerdo wan. Un job mukas halauter te chatchrell an i jag, win glan o foro Jerusalem an o telstuno them, hoi kharell Kidron. Un i jagakri tchik mukas lo an o foro Betel te anell.

2. Rajengro liil 23:6

Un o Josia mukas koi kashteni debletsa Ashera dran o baro Debleskro kheer te anell glan o foro Jerusalem pash ko tikno pani, kai kharell Kidron. Un kote mukas lo lat te chatchrell. Un hoi latar pral atchas, mukas lo tiknes te krell har phubjakri tchik, un tchiwas kowa khetne koi jagakri tchik ap o handako, kai i tchorwele paskedo wan.

2. Familjakro liil 34:4

Un glan leskre jaka mukas lo i chatchepangre tele te phagell, kai viechen ko debleske chatchedo wan, kai kharell Baal. Un kol boba, hoi koi pral tardo his, un kai sungepaskro koowa chatchedo was, mukas lo trujel te dell. Un i figure, hoi sikrenn i debletsa Ashera, un kol wawar figure, hoi le pengre wastentsa kran, kolen phagas lo an kotja, un das len jaake khetne, te atchas tchi har tchik pral. Kai tchik witsras lo pral ko handako, kai kolla paskedo his, kai chatchran viechen un wawar koowa kol chochene deblenge.

2. Mose 32:20

Ko terno gurum, hoi kran i Israelitarja penge, witsras job an i jag, te chatchrell lo. Un das les tiknes, bis te stauba pral atchas. Koi stauba witsras lo an o pani, un das les i Israelitarja te pijell.

3. Mose 26:30

Me krau kol mulne platse paash, kai tumer tumare deblenge viechen chatchrenna. Un kol boba, kai tumer lenge sungepaskro koowa chatchrenn, phagau khetne. Tumare mulen witsrau ap kol paash-dine figuren, un tumendar kamau buder tchi te djinell.

Zakarie 13:3

Te penell sawo mursh dureder, te hi leskro rakepen o Deblestar, palle penenn leskro dad un leskri dai ap leste: “Tu hunte meress! Tu rakral chochepen an o lab o baro Deblestar.” Un leskro dad un leskri dai, denn les mulo tchurje, doleske, kai rakras lo chochepen an o baro Debleskro lab.

Mateo 10:37

Koon kamell peskro dades un peskri dai budeder har man, hi gar moldo, te well lo miro maal. Un koon kamell peskro tchawes un peskri tchat budeder har man, hi gar moldo, te well lo miro maal.

Johanni 18:1

Har o Jesus kowa penas, djas job peskre malentsa win. Un jon djan wergel ko pani, hoi kharella Kidron. Koi his i baar. Koi dren djas o Jesus peskre malentsa.

2. Korintarja 5:16

Doleske dikah kanna buder gar jaake ap i mensheste har an o tsiro, har hams gomme gar patslo. Ninna prindjrah mer o Jesus Kristes kanna wawartchandes har an ko tsiro, har djiwas lo ap i phub.

Galatarja 2:14

Har me dikom, kai jon gar ap o tchatcho drom djan, jaake har o Jesus les mende sikras, koi penom me ap o Kefaseste glan hakeneste: Ninna te hal i biboldo, djiweh tu gar har i biboldo. Hoske kameh i sorjah, te djiwenn kol patsle, kai kek bibolde hi, har i bibolde?

5. Mose 33:9

Jon rikran budeder ap tute har ap pengre dadende un dajende, pengre phralende un tchawende. Un dan jak ap tiro lab, un rikran pen ap koi sowel, hoi tu lentsa dren djal.

5. Mose 7:5

Doleske krenn kawa lentsa: Witsrenn kol pre-tchidde barra trujel, kai marenn le un chatchrenn le viechen lengro debleske. Phagenn kol bare barra paash, hoi le leske pre-tchiwan! Un denn kol kashta tele, hoi sikrenn i debletsa Ashera. Un chatchrenn lengre figuren pre.

5. Mose 9:21

Un ko terno gurum, hoi kran tumenge un jaake o Deblestar tele peran, kai figura lom me un witsrom lat an i jag, dom lat paash un dom lat an sawe tikne kotja, te atchas tchi har stauba pral. Un koi stauba witsrom an ko pani, hoi kote i berga tele nashell.

Josua 6:24

O foro un halauter, hoi an leste his, chatchran le pre. Kokres o rup un o sonakai un ko sasterno koowa tchiwan le pash o brawlepen an o baro Debleskro kheer.