1. Petro 3:4 - O Debleskro Drom 2021 (Sinte)

⁴ Tumaro shukapen hunte well dran tumaro dji un sikrell pes an o latchepen, kai kek tchingepen dren hi. Sawo shukapen atchella, un hi bud moldo glan o Debleskre jaka.

O Debleskro Lab 2024 (Sinte-Manouche)

⁴ T'maro shoukapen hounte vell dran t'maro dji oun sikrell pes an o lačepen, kay kek čingepen dren hi. Savo shoukapen ačella, oun hi boud moldo glan o Debleskre yaka.

1. Petro 3:4 ပူးပေါင်းရင်းမြစ်များ

Debleskri gili 131:2

Na-a, miro dji hi pokones un tchalo, jaake har i tikno tchawo tchalo hi an i mussi peskri datar, awa, jaake tchalo hi miro dji.

Debleskri gili 147:6

O baro Dewel hadell kolen pre, kai tele rikedo hi, un i tchilatchen witsrell lo tele ap i phub.

Debleskri gili 149:4

O baro Dewel dikell latches ap peskre menshende. Job well kolenge ap i rig, kai tele rikedo hi un hadell len pre.

Debleskri gili 25:9

Kolen, kai tele rikedo hi, anell lo ap o tchatcho drom, un sikrell lende, hoi lo lendar kamella.

Debleskri gili 45:13

I menshe dran o foro Tirus wenn pash tute un anenn tuke shukar koowa. I brawele dran o tselo them wenna, un rodenn te dikess kamles ap lende.

Debleskri gili 51:6

Ap tute kokres krom, hoi tchilatcho hi. Awa me krom, hoi midjak hi glan tire jaka. Doleske hi tut tchatches an tiro rakepen. Tu kreh o tchatchepen, te deh man i phagi.

Jesaja 11:4

Na-a, job dell i tchorwelende pengro tchatchepen, un well kolenge ap i rig, kai gar an-dikle hi, te lenn jon pengro tchatchepen. Penell lo i sorelo lab, palle lenn i marepangre pengri phagi. Les hi i soor, te penell ap o tchilatcheste: “Tu hunte meress!”

Jesaja 29:19

Un o baro Dewel krell kolen pale bachtelo, kai wan tele rikedo. Un i tchorwele giwenn i bachtjatar pral o Israeleskro Debleste.

Jesaja 57:15

Me, o pralstuno, kai hadedo hom, un hako tsiro djiwau, un kokres o tchatcho Dewel hom, penau: Me djiwau an o pralstunepen an miro bolepaskro kheer, un ninna pash o mensheste, kai i phagedo un tele-rikedo dji an leste hi, te dap pale soor koleste, kai tele rikedo hi, un mukap koles pre te djiwell, koleskro dji phagedo hi.

Jesaja 61:1

O baro Debleskro ducho hi ap mande. O baro Dewel rodas man win un bitchras man, te penap i tchorwelenge o latcho lab. te krap i phagede djia sasto, te penap i pandlen, te hi le buder gar pandlo, un penap i stilden, te nai djan le win dran o stilepen.

Jeremia 51:59

Kal tsele laba, kai penenn, hawi bibacht pral o foro Babilon well, tchinas o Debleskro rakepaskro, o Jeremia, an i liil. Kau liil das lo i mursheste, kowa kharas Seraja. Leskro dad his o Nerija, koleskro dad his o Machseja. Kowa his an ko tsiro, har o Zedekja an o starto bersh baro rai pral o them Juda his, un an o foro Babilon djas. O Seraja djas leha. Un an leskro wast his, te dikell lo, kai lauter mishto djas ap o drom.

Mateo 11:29

Me hom tumenge i latcho rai, un dikau ap kekeste tele. Shunenn ap mande un krenn, hoi me tumenge penaua! Un tumaro dji well pale sorelo.

Mateo 21:5

Penenn i menshenge an o foro Jerusalem: Dik, tiro baro rai well pash tute. Job hi latcho un krell pes gar bares. Job hi beshdo ap i esla, ap i terni esla.

Mateo 23:26

Tu Farisari, tu hal korelo. Kre tiro dji djudjo! Palle well tuke o tselo wawar koowa ninna djudjo.

Mateo 5:5

Bachtele hi kolla, kai kek tchingepen krenna. O Dewel dell len i tseli phub.

Louka 11:40

Tumer haiwan tchi! O Dewel, kai kras o tselo menshes, kras ninna leskro dji.

Louka 16:15

Koi penas o Jesus ap lende: “Glan i menshengre jaka kamenn tumer latcho te well. O Dewel prindjrell tumaro dji. Hoi pash i menshende bud molella, hi tchi moldo an o Debleskre jaka.

Remarja 1:23

O baro Debles, kai hako tsiro atchella, sharan le gar. Na-a, jon mangan kol murshen un djuwjen an, kai merenna. Ninna wawar koowa, har i tchirkle, i star-herjengre vieche un i sapa mangan le an.

Remarja 2:29

Na-a! Kowa hi i tchatcho biboldo, koleske o Debleskro Ducho i newo dji das. Kowa nai krenn i tchinle laba gar. Sawo biboldo rodell gar, te well lo i menshendar sharedo. Job well o Deblestar sharedo.

Remarja 6:6

Mer djinah, maro phuro djipen was leha ap o trushel dino un meras, te well o tchilatchepen buder gar o rai pral mende.

Remarja 7:22

Miro dji kamell te krell, hoi o Dewel penella.

2. Korintarja 10:1

Me, o Paulo, rakrau tumentsa kamles un latches, jaake har o Jesus Kristo kamles un latches hi. Hi menshe mank tumende, kai penenna: “Me te hom pash tumende, nai rakrau kek triin laba. Te hom dur tumendar krik, palle rakrau sorele labentsa.”

2. Korintarja 4:16

Doleske wah mer gar khino, ninna te mukell men mari soor. Ko djipen, hoi o Dewel an mende das, well hako diwes pale newes.

Galatarja 5:23

Job krell pes gar bares un lell pes khetne. O Moseskre laba, kolen hi kek soor pral koleste, koon jaake djiwella.

Efesarja 4:2

Ma krenn tumen bares! Awenn latches jek ap o wawareste! Denn i wawaren gar jaake sik pre! Djiwenn khetne an o kamlepen!

Kolossarja 3:12

Tumer han kanna o Debleskre menshe, kolen job peske win rodas. Job kamell tumen o djijestar. Doleske hunte well tumen i baro dji o wawareske, te well hakeno latcho ap o wawareste, te krell pes kek bareder har o wawar, te rakrell hakeno latches o wawareha, te dell kek o wawares sik pre,

Kolossarja 3:3

Tumer meran. Un tumaro newo djipen hi kanna o Jesus Kristeha pash o Debleste an o bolepen, ninna te dikenn kowa kanna gomme gar.

1. Tessalonikarja 4:11

Djiwenn tumaro djipen jaake, te nai rakrenn i menshe gar djungeles pral tumende! Krenn tumari budi! Budrenn jaake, te well tumen doha djipaske, jaake har tumenge penam!

2. Tessalonikarja 3:12

Kolenge penah mer an o lab maro rajestar, o Jesus Kristestar, te budrenn le, te nai ginenn le penge, hoi len hunte well djipaske.

1. Timoteo 2:2

Mangenn lestar, te dell lo i rajen un i pralstunen o goswepen, te krenn le pengri budi mishto, jaake te djiwas nai an o latchepen, te djas mer o Debleskro drom, te nai rakrenn i menshe gar djungeles pral mende!

2. Timoteo 2:25

ninna te kamenn le gar ap leste te shunell. Job rakrell latches lentsa, te anell lo len ap o tchatcho drom! O Dewel nai dell len o dji, te mukenn le pengro tchilatcho drom, un te haiwenn le, hoi o tchatchepen hi.

Tito 3:2

te rakrenn le gar djungeles pral wawarende, un te rodenn le kek tchingepen! Na-a! Jon hunte wenn o djijestar latcho un kamlo ap i tsele menshende.

Jakobo 1:21

Doleske mukenn hako djunglepen un tchilatchepen! Un patsenn ko lab, hoi o Dewel an tumende tchiwas! Krenn kowa i latcho djijeha! An o Debleskro lab hi koi soor, te lell lo tumen dran o tchilatchepen un o merepen win.

1. Petro 1:23

Tumer wan newes boldo un han tchawe jekestar, kai merell gar. Ko newo djipen lan tumer, har patsan ap o Debleskro lab, hoi hi djido un atchella hako tsiro.

1. Petro 3:15

O Jesus Kristo kokres te well o rai an tumare djia! Un te putchenn le tumendar tchomone pral tumaro patsepen, ma darenn kek tsiro, te penenn lenge, ap koneste tumer patsenna.

1. Samuel 16:7

O baro Dewel penas ap o Samuel: “Ma dik ap kowa, har job win dikella un har baro job hi! Koles rodom me gar win. O baro Dewel dikella gar ap kowa, kai i menshe pre dikenna. I menshe dikenn ap kowa, hoi glan lengre jaka hi, o baro Dewel dikella ap o dji.”