1. Mose 44:16 - O Debleskro Drom 2021 (Sinte)

¹⁶ Penas o Juda ap leste: “Hoi penas mer tuke, miro rai? Har nai sikrah, kai hi men kek doosh an kau koowa? O Dewel dell men i phagi. Miro rai, mer ham kanna tire budepangre: mer un kowa, kai hatsan o khoro pash leste.”

O Debleskro Lab 2024 (Sinte-Manouche)

¹⁶ Penas o Youda ap leste: “Hoy penas mer touke, miro ray? Har nay sikrah, kay hi men kek doosh an kava koova? O Devel dell men i phagi. Miro ray, mer ham kanna tire boudepangre: mer oun kova, kay hatsan o khoro pash leste.”

1. Mose 44:16 ပူးပေါင်းရင်းမြစ်များ

1. Mose 37:7

“Mer pandam djob khetne ap i hachetikri phub. Un ap jek kopo stas miri djob pre un atchas tardo. Un tumari djob was un his trul miri djob tardo un witsras pes tele glan miri djob.”

1. Mose 37:9

Un job das i wawar suni un penas kowa peskre phralenge: “Shunenn, me dom i wawar suni. Kau kopo witsras pes o kham un o tchon un deesh-te-jek bolepangre momlia glan mande tele.”

1. Mose 44:17

Penas o Josef: “Sawo koowa krau gar. Ko rom, kai hatsan o khoro pash leste, hunte well miro budepaskro. Tumer wawar nai djan an o latchepen khere pash tumaro dadeste.”

1. Mose 44:32

Miro rai, me dom miro wast koi pre, kai anau o tchawes pale. Me penom ap miro dadeste: ‘Te anau les tuke gar pale, well i doosh ap mande un atchell ap mande, jaake rah har djiwau!’

1. Mose 44:9

Miro rai, tu te hatseh ko khoro pash jekeste mendar, nai deh les mulo! Un mer wawar wah tire budepangre.”

1. Rajengro liil 17:18

Kote penas joi ap o Elija: “Hoske kral tu kowa mantsa, Debleskro mursh? Tu wal pash mande, te was miri doosh an o Debleskro shero. Doleske hunte meras miro tchawo.”

Esra 9:10

Un kanna, maro Dewel, hoi te penas pal kau tselo koowa? Mer djiwam gar pal tire laba,

Esra 9:15

Baro Dewel, tu o Israeleskro Dewel, hal an o tchatchepen tardo un lal men, kai pral atcham, win dran o merepen, jaake har kau diwes hi. Dik, kate ham glan tute an mari doosh, un djinah, mer nai atchah gar tardo glan tute!”

Hiob 40:4

Dik, me hom tchi moldo! Hoi penap me tuke? Me tchiwau miro wast ap miro mui.

Gosewe laba 17:15

Kowa hi dui kope i djungelo koowa glan o baro Debleskre jaka: te rakrell jek koles tchatches, kai doosh ap peste las, un ninna, te tchiwell jek doosh ap koleste, kai o tchatchepen kras.

Gosewe laba 28:17

I mensho, kai i wawares mulo das, kowa atchell ap o naashepen, jaake rah har djiwell lo. Kek te rikrell les pre!

Jesaja 27:9

Jaake well o Israelengri doosh krik lino. Un ap kowa sikrell pes, te hi lengri doosh krik lino: Te denn le i pre-tchidde barra jaake khetne, kai mangan le i wawar deblen an, te atchell tchi har tchik. Un te mukenn le kek figure tardo, hoi sikrenn i debletsa Ashera, witar kek boba, kai lake sungepaskro koowa chatchedo was.

Jesaja 5:3

Kanna awenn, tumer menshe an o foro Jerusalem un an o them Juda, un krenn o tchatchepen win mashkral mande un miro drakengro them!

Daniel 9:7

Tu, rai, hal an o tchatchepen. Un mer hunte ladjas men, mer, kai wah dran o them Juda un dran o foro Jerusalem, ninna dran o tselo them Israel. Mer kram tchilatcho koowa ap tute. Doleske tradal men an wawar themma, kai dur hi un kai gar jaake dur hi, te djiwas buder gar khetne.

4. Mose 32:23

Te kamenn tumer kowa gar te krell, palle lenn i doosh ap tumende glan o baro Debleste. Un kowa dikenn tumer, te well koi phagi ap tumende.

Mateo 7:2

Te hi tumen i baro dji i wawarenge, hi o Debles ninna i baro dji tumenge. Hi tumen kek baro dji lenge, hi o Debles witar gar i baro dji tumenge.

Louka 12:2

Well o diwes, kai well kowa diklo, hoi kanna khatedo hi. Well o diwes, kai djinell hakeno kowa, hoi kanna kek djinella.

Bičepangre 2:37

Har kol menshe kowa shunan, djas lenge kowa an lengro dji. Un jon putchan o Petrestar un kol wawar Jesuseskre bitchepangrendar: “Murshale, mire phrala, hoi kras mer?”

5. Mose 25:1

Te well i tchingepen mashkral mursha pre, un jon glan tchatchepangre murshende stakrenn, un o tchatchepen well win kerdo, palle well pral koleste, kai an o tchatchepen his, glan halauterende win rakedo, te hi job an o tchatchepen. Un pral koleste, koles doosh his, well glan halauterende win rakedo, te hi les doosh.

Josua 7:1

I Israelitarja rikran pen gar ap o Debleskro lab, hoi job penas, te well halauter an o foro Jericho leskro. Jek lendar, o Achan, las tchomone peske. O Achaneskro dad his o Karmi, koleskro dad his o Sabdi, un koleskro dad his o Serach. Un kolla his mursha dran o kheer Juda. Har o Achan kowa kras, las o baro Dewel i bari choli pral i Israelitarja.

Josua 7:18

Un har mukas lo i murshen an koleskro tselo kheer glan te well, was o Achan wi-rodedo, – koleskro dad o Karmi hi, koleskro dad o Sabdi hi, un koleskro dad o Serach hi. Kolengro phuro dad his o Juda.

Čačepangre 1:7

Koi penas o Adoni-Besek: “Efta-deesh bare rajenge mukom i pesse gushte lengre wastendar tele te dell un ninna i bare gushte lengre pirendar. Un jon hunte chan, hoi miri chapaskri tele peras. Un jaake har me les lentsa krom, jaake das les man o Dewel pale.” Un jon anan les an o foro Jerusalem. Un kote meras lo.