1. Mose 23:2 - O Debleskro Drom 2021 (Sinte)

² Un joi meras an o foro Kirjat-Arba. Kowa hi kanna Hebron an o them Kanaan. Un o Abraham was pash late, rowas un das i djijestar gole pral lakro merepen.

O Debleskro Lab 2024 (Sinte-Manouche)

² Oun yoy meras an o foro Kiryat-Arba. Kova hi kanna Hebron an o them Kanaan. Oun o Abraham vas pash late, rovas oun das i djiyestar gole pral lakro merepen.

1. Mose 23:2 ပူးပေါင်းရင်းမြစ်များ

1. Mose 13:18

Un o Abram djas peskre plachtene kherentsa trujel, un was pash o foro Hebron un atchas tel i bare ruka ko murshestar Mamre. Un kote kras job i chatchepaskri o baro Debleske, kai wenn vieche leske chatchedo.

1. Mose 23:1

Un i Sara was 127 (sheel-biish-te-efta) bersh phuro.

1. Mose 23:19

Pal kowa paskras o Abraham peskri romjat, i Sara, an koi grotta pash Machpela wergel Mamre. Kowa hi kanna o foro Hebron an o them Kanaan.

1. Mose 24:67

Un o Isaak anas i Rebekka an o plachteno kheer, kai leskri dai i Sara, djiwas, un romedineras lat. Un job kamas lat. Un o Isaakeskri duk an peskro dji pral peskro dakro merepen was krik lino.

1. Mose 27:41

Kol latche laba, hoi o Isaak pral o Jakobeste rakras, kran, te was o Esau chojedo ap o Jakobeste. Doleske penas o Esau ap peste: “Ko tsiro wella sik, kai rowenn le pral miro dadeskro merepen. Te hi lo mulo, dau miro phrales mulo.”

1. Mose 35:27

Un o Jakob was pash peskro dadeste Isaak an Mamre pash o foro Kirjat-Arba. Kowa hi kanna Hebron, kai ninna o Abraham un o Isaak djiwan.

1. Mose 37:14

Koi penas o Israel: “Dja koi un dik, har lenge un i bakrenge djala. Un pen les mange!” Jaake bitchras job les dran o telstuno them Hebron. Un job was pash o foro Sichem.

1. Mose 50:1

Koi peras o Josef ap peskro dadeskro mui un rowas pral leste un tchumras les.

1. Mose 50:10

Un jon wan ap i platsa, hoi kharella Goren-Atad. Koi platsa hi tchiddo ap i wawar rig o panjestar Jordan. Kote rowan le un dan bari gole pral o Jakobeskro merepen. Un o Josef rowas lentsa efta diwessa pral peskro dadeste.

2. Samuel 1:12

Jon rowan o tselo diwes. Un chan tchi bis te was i rati. Pral o Sauleste rowan le, un pral leskro tchaweste Jonatan, un pral o baro Debleskre menshende, i Israelitarja, kai wan maredo i chareha.

2. Samuel 1:17

O David giwas i ropaskri gili pral o Sauleste un pral leskro tchaweste Jonatan.

2. Samuel 2:11

Ko tsiro, kai o David baro rai his pral o kheer Juda, un an o foro Hebron djiwas, kowa his efta bersha un shob tchon.

2. Samuel 5:3

Har kol tsele phureder dran Israel pash o baro rajeste an o foro Hebron his, kras kote o baro rai David lentsa win, te well lo lengro baro rai. Un jon dan ap o baro Debleste gole, te shunell job kowa. Un jon tchoran djet pral o Davideskro shero, te well job baro rai pral o Israel.

2. Samuel 5:5

An o foro Hebron his les penepaske efta bersha un shob tchon pral o them Juda. Un an o foro Jerusalem his les penepaske 33 (trijanda-te-triin) bersha pral o Israel un o Juda.

1. Familjakro liil 6:57

an o them Issachar: i forja Kadesh un Daberat,

2. Familjakro liil 35:25

Un o Jeremia giwas i ropaskri gili pral o Josia. Un i tsele gipangre, mursha har djuwja, giwan ropangre gilja pral o Josia bis ap kau diwes. Jaake well kowa gomme kau diwes kerdo an Israel. Kal tsele gilja hi tele tchinlo an o liil, hoi kharell: Ropangre gilja.

Nehemia 11:25

Bud i menshendar Juda djiwan an pengre khera pash pengri hachetikri phub an i forja: Kirjat-Arba un leskre gaba; Dibon un leskre gaba; Jekabzeel un leskre gaba;

Jeremia 22:10

Ma rowenn pral koleste, kai meras, ko baro rai Josia. Ma denn gole i dukatar leske! Na-a, rowenn pral leskro tchaweste, kai was krik anlo, o baro rai Joahaz. Kowa well buder gar pale, te dikell lo kau them pale.

Jeremia 22:18

Doleske penell o baro Dewel pral o Jojakim, ko baro rajeste pral o them Juda, koleskro dad o Josia his: Te merell job, rowenn le gar pral leste. Kek penell: Mo phraal, mo pheen, hoske hunte meras lo? Witar gar penenn le: Maro rai, i pralstuno, hunte meras!

4. Mose 13:22

Un jon djan an o them Negev, un wan bis pash o foro Hebron. Kote djiwas o Ahiman un o Sheshai un o Talmai, kolengro dad o Anak his. O foro Hebron was newo kerdo efta bersha glan o foro Zoan an o them Egiptia.

4. Mose 20:29

Un har kol tsele menshe dikan, kai o Aron mulo hi, rowas o tselo kheer Israel pral leste 30 (trijanda) diwessa.

Johanni 11:31

Kol bibolde, kai pash i Mariate an o kheer his, te rakrenn le latches lah, dikan, har joi sik pre stas un win nashas. Koi djan le lake palla. Jon patsan, joi djal pash o mulengro kheer, te rowell li koi.

Johanni 11:35

Un o Jesus rowas.

Bičepangre 8:2

Un mursha, hoi ap o Debleskro drom djan, paskran o Stefanes un rowan bud pral leskro merepen.

5. Mose 34:8

Un i Israelitarja rowan pral o Mose trijanda (30) diwessa an o telstuno them Moab. Jaake rah djas o ropaskro tsiro o Moseske.

Josua 10:39

un lan o foro dren, ninna kol forja, hoi trul o foro Debir his. Un jon dan lengro baro rajes un i tsele menshen o chareha mulo, un mukan kekes te nashell. Jaake har lo kowa o foreha Hebron un o foreha Libna un leskro baro rajeha kras, kras lo ninna o foreha Debir un leskro baro rajeha.

Josua 15:13

Un o Josua das o Kalebes peskro foro mashkral dren an o them Juda, jaake har o baro Dewel ap o Josua penas, te krell lo kowa. Kau foro kharas Arba, un kharell kanna Hebron. O Arba his o phuro dad kol menshendar, kai kharenn Anakarja.

Josua 15:54

Humta, Kirjat-Arba – kowa hi kanna Hebron, un Zior. Kolla hi enja forja, un koi pashel lengre gaba.

Josua 20:7

Un i mursha dran Israel rodan kal forja win, te wenn le naashepangre forja: o foro Kedesh an o them Galilea ap i berga Naftali; o foro Sichem an o them Efrajim; un o foro Kirjat-Arba, hoi hi kanna Hebron, ap i berge Juda.

Josua 21:11

Kirjat-Arba, hoi his kharedo pal o mursheste Arba, kolestar i Anakarja wenn, un i phub trul o foro trujel, kai i vieche nai chan; kau foro hi kanna Hebron un hi tchiddo an i berge Juda.

Čačepangre 1:10

Un palle kuran le pen kolentsa an o them Kanaan, kai an o foro Hebron djiwenn. – Un ko foro kharas glan ko tsiro Kirjat-Arba. – Un jon dan i familjen Sheshai un Ahiman un Talmai un his sorleder har jon.

1. Samuel 20:31

Jaake rah har o Isajeskro tchawo ap kai phub djiwella, jaake rah hunte daress tu tiro djipaske, un weh gar o baro rai. Kanna bitche jekes koi, te anell lo les pash mande. Job hunte merell.”

1. Samuel 25:1

Un o Samuel meras, un o tselo Israel was khetne un rowas kote pral leste. Un palle paskran le les an o foro Rama, kai lo khere his. Pal kowa djas o David an o mulo them Paran.

1. Samuel 28:3

Un o Samuel meras. Un i tsele Israelitarja wan khetne un rowan pral leste. Un palle paskran le les an peskro foro Rama. Glan kau tsiro tradas o Saul i drawepangren un kolen, kai putchenn i mulen, dran o them win.