Zefanja 1:4 - O Debleskro Lab 2024 (Sinte-Manouche)

⁴ Me hadau miro vast pral o them Youda, oun pral halauterende, kay an o foro Yerusalem djivenn, te dap len lengri phagi. Oun krau lauter paash, hoy kote o rhorheno deblestar Baal pral ačas. Ninna leskre rashaya venn bistedo, oun kol vavar rashaya, kay moukan o baro Debles.

O Debleskro Drom 2021 (Sinte)

⁴ Me hadau miro wast pral o them Juda, un pral halauterende, kai an o foro Jerusalem djiwenn, te dap len lengri phagi. Un krau lauter paash, hoi kote o chocheno deblestar Baal pral atchas. Ninna leskre rashaja wenn bistedo, un kol wawar rashaja, kai mukan o baro Debles.

Zefanja 1:4 ပူးပေါင်းရင်းမြစ်များ

2. Rajengro liil 21:13

Oun me kamau ko emligo koova ap o foro Yerusalem te krell, har krom ap o foro Samaria. Oun dau o fores savi phagi har čivom ap o kheer Ahab. Oun kamau i menshen dran o foro Yerusalem vin thovell, yaake har čare vin thode venna, oun ap o shero čiddo venn.

2. Rajengro liil 23:12

Oun yob kras kol rhačepangre paash, hoy pral ap o kheer koy tardo his, kay o Ahases leskri isema his. Kol rhačepangren moukan i bare raya pral o them Youda te krell. Ninna kolla, kay o Manasse kras, phagas lo tele. Kolla his tardo ap kol douy platse glan o baro Debleskro kheer. Oun o Yosia djas koy oun vitsras lengri čik an ko tikno pani, hoy kharell Kidron.

2. Familjakro liil 34:4

Oun glan leskre yaka moukas lo i rhačepangre tele te phagell, kay firhen ko debleske rhačedo van, kay kharell Baal. Oun kol boba, hoy koy pral tardo his, oun kay soungepaskro koova rhačedo vas, moukas lo trouyel te dell. Oun i figure, hoy sikrenn i debletsa Ashera, oun kol vavar figure, hoy le pengre vastentsa kran, kolen phagas lo an kotya, oun das len yaake khetne, te ačas či har čik pral. Kay čik vitsras lo pral ko handako, kay kolla paskedo his, kay rhačran firhen oun vavar koova kol rhorhene deblenge.

2. Mose 15:12

Tou hadal tiri čači moussi, oun i phoub rhas kolen pre, kay hadan pen pral toute.

Jeremia 15:6

Tou djal mandar krik, penell o baro Devel, oun kamal mandar či bouder djinell. Doleske hadom me miro vast ap toute, te marap tout. Me hom khino, te krap miro dji touke pre.

Jeremia 6:12

Lengre khera lenn kol vavar, ninna lengre themma oun lengre djouvyen. Me hadau miro vast, te marap kolen, kay djivenn an kava them, penell o baro Devel.

Ezekiel 25:7

Doleske djau zoryah ap t'mende pre, oun dau t'men an o vast i menshendar dran vavar themma. T'mer venn lenge har ko kouč koova, hoy i kourepangre penge lenna, te van le i zorleder an o kourepen. Oun me krau, te ačess bouder kek natsyona. T'menge ačell kek them. O tselo kheer Ammon djal paash. Oun t'mer dikenn oun hayvenn, te hom me o baro Devel.

Ezekiel 6:14

Oun me hadau miro vast ap lende oun krau lengro them paash, te vell ko tselo them mank o moulo divyo them Youda oun o foro Ribla i mouklo them. Hako forestar, kay le djivan, ačell či har barra. Palle dikenn oun hayvenn le, te hom me, o baro Devel.

Hosea 10:5

I menshe an o foro Samaria darenn, te vell ko sonakaskro terno gouroum krik lino, hoy hi tardo an o foro Bet-Aven. Yon rovenna har pal yekeske, kay meras. Leskre rashaya trissenna troul leskro shoukapen, te vell lo lestar krik lino.

Micha 5:13

Kol kashta, hoy i debletsa Ashera sikrenn, tserdau vin dran i phoub, oun t'mare forya krau paash.

Zefanja 2:11

Kanna krell o baro Devel lenge bari daar, te krell lo i rhorhene deblen ap i tseli phoub paash. Oun an hake themma vitsrenn pen i menshe glan leste tele, hakeno an peskro them.

Zefanja 2:13

Oun o baro Devel hadell peskro vast ap koy rig, kay norden hi, te krell lo o them Assour paash. Oun o forestar Ninive ačell či har paash-dine khera. O foro vell har i moulo them, kay bouder kek menshe djivenna.