Zakarie 10:5 - O Debleskro Lab 2024 (Sinte-Manouche)

⁵ I menshe an o them Youda venn zoreles har bare kourepangre, kay stakrenn kolen tele an i čik ap o drom, kay kourenn pen lentsa. O baro Devel hi lentsa an o kourepen. Ninna i klissepangre hounte tserdenn pen pale glan lende.

O Debleskro Drom 2021 (Sinte)

⁵ I menshe an o them Juda wenn soreles har bare kurepangre, kai stakrenn kolen tele an i tchik ap o drom, kai kurenn pen lentsa. O baro Dewel hi lentsa an o kurepen. Ninna i klissepangre hunte tserdenn pen pale glan lende.

Zakarie 10:5 ပူးပေါင်းရင်းမြစ်များ

2. Samuel 22:43

Oun me dom len khetne, dom len tiknes har čik, hoy i baro dourho krik phourdell. Ava, har ap čik ap i dromma stakrom len khetne.

2. Samuel 22:8

Koy trissas i phoub, pral oun tele djas o bolepen o Debleskri bari rholyatar.

2. Rajengro liil 9:33

“Vitsrenn la tele”, penas yob. Koy vitsran le i Isebel tele. Oun lakro rat peras ap i massouri oun ap i grayende. Oun yob ouleras pral late.

Debleskri gili 18:42

Fothe dan le gole, his kek koy, kay nay lals len dran miro vast vin. Ap o baro Debleste dan le gole, oun yob rakras gar pale ap lende.

Debleskri gili 20:7

Kanna djinau, kay vell o baro Devel ap i rig kolestar, koles yob vin rodas, te vell lo baro ray. Dran o bolepen, kay yob khere hi, shounell lo ap leste, oun peskri bari zoryah vell lo ap leskri rig.

Debleskri gili 33:16

I baro ray boud lourdentsa vell gar dran peskri zoor o zorleder an o kourepen. Oun i čačo morsh, koles boud zoor hi, vell gar dran peskri zoor vin lino dran o kourepen.

Debleskri gili 44:5

Tou hal miro baro ray, miro Devel. Tou hal kova, kay krell, te venn o Yakobeskre čave o zorleder an o kourepen.

Debleskri gili 45:3

Tou hal shoukeder har i vavar menshe. Dran tiro mouy venn lače laba. Čačepah o Devel čivas peskri barht ap toute, te ačell li hako tsireske ap toute.

Jesaja 10:6

Me bičrom len pash kol menshende, kay kamenn mandar či te djinell, oun ap kolende rhoyedo hom, te djan le ap lende pre, oun randenn len vin oun čorenn len vin, oun stakrenn len khetne har i čik ap o drom.

Jesaja 25:10

O baro Devel rikrell peskro vast pral kay berga. I menshen an o them Moab stakrell lo tel peskre herya khetne, yaake har phouss khetne stakedo vell, hoy an i čik čiddo hi.

Jesaja 31:1

Djungeles djal kolenge, kay djan tele pash i Egiptaryen, te mangenn le lendar, te venn yon lenge ap i rig; oun patsenn, kay kolengre graya oun boud kourepaskre vourdya oun kol zorele klissepangre len vin lenn dran i čilače vasta. Oun ap o Israeleskro Debleste, kay kokres o Devel hi, dikenn le gar. Ava, pal o baro Debleste poučenn le gar!

Jesaja 41:12

Tou rodeh len palle, oun nay hatseh len gar. Kol morsha, kay pen touha čingrenn, har či hi le. Oun har vans le gar koy, venn kol morsha, kay kouran pen touha.

Jesaja 41:25

Me dom i rayes gole, te vell lo peskre lourdentsa foun kotar, kay o kham gar diklo vell. Oun yob vas dran peskro them, hoy kote hi, kay o kham pre djala. Oun yob dell gole ap mande, oun stakrell kol vavar bare rayen khetne, har te vans le čik. oun krell lentsa har ko morsh, kay pirya dran čik rhačell, oun glan kova peskre pirentsa ap ko čik stakrell.

Jesaja 8:9

Shounenn, t'mer menshe an dour themma! Ninna te čivenn t'men khetne, te djan ap o Youda, ninna te denn i kourepaskri gole, t'mer venn khetne stakedo!

Ezekiel 38:15

Ava, tou veh dran tiro them, hoy dour krik kote hi, kay norden hi. Oun lourde dran boud themma djan touha, kay halauter ap graya klissenna. Boud boud lourde hi le, oun khetne hi len i bari zoor.

Amos 2:15

Kolla, kay denn karye, hounte tserdenn pen pale, sikede naashepangre venn dren lino, oun klissepangre nashrenn pengro djipen.

Micha 5:8

Israel, hade tiro vast pral halauterende, kay kourenn pen touha, te ačell kek lendar djido!

Micha 7:10

Kolla, kay rikrenn man tele oun poučenn mandar kay hi tiro baro Devel, yon hounte dikenn kova, oun hounte ladjenn. Oun mire yaka dikenn, har le khetne stakedo venna, har čik ap i drom.

Haggai 2:22

Oun me vitsrau i beshepangre kol themengre rayendar trouyel oun lau lengri zoor krik. Lengre kourepangre vourdya vitsrau trouyel khetne kolentsa, kay koy pre beshenna. I graya oun i klissepangre merenna. Yek dell o vavares moulo.

Zakarie 12:4

“An ko tsiro”, penell o baro Devel, “krau me i grayenge bari traash, oun i klissepangre venn narvelo i daryatar. Ava, i tsele grayen kol menshendar krau korelo. Pral o kheer Youda rikrau mire yaka pre, te djal lenge kek čilačepen.

Zakarie 12:8

An ko tsiro rikrell o baro Devel peskre vasta pral i menshende an o foro Yerusalem. Oun i menshe kote sikrenn pen yaake zorelo, te hi i bango yaake zorelo har o David his. Oun i menshe dran o Davideskro kheer djan glan lende, har te djals o Debleskro bolepaskro glan lende.

Zakarie 14:13

An ko dives krell len o baro Devel yaake daar, te djinenn le bouder gar, hoy le krenn. Hakeno taprell o vavares. Oun yon djan yek ap o vavareste pre.

Zakarie 14:3

Palle djal o baro Devel vin, te kourell yob pes yaake kol lourdentsa dran i vavar themma, har kouras lo pes peskre menshenge an i phoure tsirya.

Zakarie 9:13

Me kourau man i lourdentsa dran o grichtikro them. I menshe dran Youda hi miro kourepaskro bogo. I menshe dran Israel hi mire fayle, oun kol morsha dran Yerusalem hi miro rharo, koleha len dau.

Mateo 28:20

Penenn lenge, te rikrenn le ap lauter, hoy me t'menge penom! Čačepah, me hom pash t'mende hako dives yaake rah, har i phoub koy hi.”

Mateo 4:3

Koy vas o beng pash leste, oun penas: “Te hal tou o Debleskro čavo, rake ap kol barra, te vell lendar maro!”

Louka 24:19

Oun o Yezous penas: “Hoy djas?” Oun yon penan: “Kova, hoy kran le o Yezouseha dran Nazaret. Yob his o Debleskro rakepaskro, ap koleste o Debleskri zoor his. O Devel bičras les. Kova dikas hakeno ap kova, hoy yob penas oun kras.

Bičepangre 18:24

Koy vas i biboldo an o foro Efesus. Leskro lab his Apollo. Kova vas dran o foro Alexandria. O Apollo djinas o Debleskro lab mishto, oun his i lačo rakepaskro.

Bičepangre 7:22

Oun goseve Egiptarya sikran leste lauter, hoy yon djinan, yaake te vas lo gosevo an lauter, hoy yob rakras oun kras.

2. Korintarja 10:4

An maro boudi o Debleske lah mer kek rharo an o vast, har i menshe ap kay phoub krenna. Na-a, o Devel dell men i zoor, te nay rakras yaake kol menshentsa, kay rhorheno koova pral leste patsenna, te dikenn le, kay kova, hoy yon yaake rah patsan, či moldo hi.

5. Mose 20:1

Te djan t'mer vin an o kourepen, te kourenn t'men kolentsa, kay kamenn t'men gar an o them, oun t'mer dikenn lengre graya oun kourepaskre vourdya oun lengre lourden, kay hi boud boudeder har t'mer, palle ma darenn lendar! T'maro baro Devel hi t'mentsa, kova kay t'men dran o them Egiptia vin anas.

2. Timoteo 4:17

O ray Yezous his ap miri rig, oun das man i zoor, te nay penap kote o tselo lačo lab lestar, yaake te shounan les ninna kolla, kay hi kek bibolde. Oun yob las man yaake dran lengre vasta vin, har te voms dran i leveskro mouy vin lino.

2. Timoteo 4:7

Me boudrom phares o Yezouseske oun dom miro patsepen gar pre. Me nashom yaake ap o Yezouseskro drom, har te voms i naashepaskro, kay nashell i rah drom. Kanna nashom o tselo drom.

Josua 10:14

Oun savo dives har kova dives das gar glan ko dives oun ninna bouder gar pal ko dives, kay shounas o baro Devel yaake ap o rakepen yek menshestar. O baro Devel kras kova i menshenge Israel!

Josua 10:42

Oun o Israeleskro baro Devel his ap lengre rig. Yaake las o Yosua kol tsele bare rayen oun lengre themma ap yek kopo dren.

Debleskro tsiro 19:17

Oun me dikom i bolepaskro an o kham tardo. Kova das zoreles gole, oun penas ap i tsele čirkle, kay denn pen dour pral an o bolepen. “Avenn kate pash o Debleskro baro rhapen khetne,

1. Samuel 16:18

Oun yek kol terne morshendar penas: “Shoun, o Isay dran Betlehem, les hi i čavo, ko hayvell i harfa lačes te bashrell. Ninna hi lo i čačo morsh, kay hayvell pes mishto te marell. Oun yob hatsella hako tsiro i laba, hoy penlo hounte venn. Oun yob hi i shoukar morsh. Oun o baro Devel hi leha.”