Zakarie 10:11 - O Debleskro Lab 2024 (Sinte-Manouche)

¹¹ Te djan le daryah mank o baro pani, tradau me o pani pale. Oun o lengsto pani Nil, ninna te djal lo dour tele, vell trouk. Oun me rikrau o pre-phourdo them Assour tele. Oun o them Egiptia hi bouder gar o ray pral vavar themma.

O Debleskro Drom 2021 (Sinte)

¹¹ Te djan le darjah mank o baro pani, tradau me o pani pale. Un o lengsto pani Nil, ninna te djal lo dur tele, well truk. Un me rikrau o pre-phurdo them Assur tele. Un o them Egiptia hi buder gar o rai pral wawar themma.

Zakarie 10:11 ပူးပေါင်းရင်းမြစ်များ

1. Mose 8:1

O Devel bistras o Noah gar, vitar gar i firhen, kay pash leste an o panyeskro kheer his: kol divye firhe oun kolla, kay gar divye hi. Oun o Devel moukas i baro dourho pral i phoub te phourdell. Koy djas o pani tele.

2. Rajengro liil 2:14

oun las koy plaashka, das ap o pani oun penas: “Kay hi kanna o baro Devel, ko Devel, koleske o Eliya boudras?” Oun das ap o pani. Koy djas o pani ap douy rigya, oun o Elisa djas ap i vavar rig.

2. Rajengro liil 2:8

Koy las o Eliya peskri plaashka, čivas lat khetne oun das koy peha ap o pani. Koy djas o pani ap douy rigya, yaake kay kol douy ap trouk phoub vergel djan.

Esra 6:22

Oun yon lauter rikran kol bare divessa, kay rhan le efta divessa maro, kay kek shoutlo yarro dren hi. Halauterenge his i gipaskro tsiro. O baro Devel das len barhtele djia oun kras, te dikas o ray pral o them Assour kamles ap lende. Yaake van lengre vasta zoreles, te nay kran le o kheer o Israeleskro Debleske.

Debleskri gili 114:3

Har van le pash o baro pani, nashas o pani peske. Har van le pash o pani Yordan, djas o pani pale.

Debleskri gili 114:5

“Tou baro pani, hoy his touha, te nashal touke, oun touha, tou pani Yordan, te djal pale?

Jesaja 14:25

Me dau i Assiryen an miro them, ap mire berge stakrau len khetne, te nay rikrenn le bouder gar mire menshen tele, oun krenn lenge bouder gar i pharo djipen.

Jesaja 19:16

Ap ko dives darenn i Egiptarya har djouvya; yon trissenn i trashatar glan o baro Debleste, ko rayeste pral o bolepen oun i phoub, ap ko dives, kay hadell lo peskro vast, te dell lo len.

Jesaja 43:2

Te djah tou an o pani, me hom pash toute, te tassenn tout kol zorele panya gar. Oun te djah tou an i yag, palle rhačell li tout gar, oun nay krell touke či.

Jesaja 44:27

Me hom kova, kay ap o baro pani penell: “Ab trouk!” Oun kol lengste panya, hoy nashenn an o baro pani, krau me trouk!

Jesaja 51:10

Hals gar tou kova, kay o baro pani trouk kras, oun mank kol panya, hoy yaake dour tele djan, i drom das, yaake te nay djan kolla vergel, kay dran o pandepen vin lino van?

Jesaja 51:9

Baro Devel, ste pre, ste pre! Sike tiri zoor! Ste pre har an kol phoure tsirya, har mare phourenge ap i rig val. Hals gar tou kova, kay o baro panyeskro sap, i Rahab, an kotya das?

Ezekiel 30:13

Kava penell o baro Devel, maro ray: Me moukau i rhorhene deblen paash te krell, oun lau i figuren dran o foro Memfis krik. Oun an o them Egiptia hi bouder kek ray. Oun bari daar taprell o tselo them.

Zefanja 2:13

Oun o baro Devel hadell peskro vast ap koy rig, kay norden hi, te krell lo o them Assour paash. Oun o forestar Ninive ačell či har paash-dine khera. O foro vell har i moulo them, kay bouder kek menshe djivenna.

Debleskro tsiro 16:12

Oun o shobto bolepaskro čoras peskro čaro vin pral o baro pani, hoy kharella Eufrat. Oun ko pani djas pale. Yaake vas i drom kerdo kol rayenge, kay venna dran o them, kay o kham pre djal.