Ropaskre gilja 2:14 - O Debleskro Lab 2024 (Sinte-Manouche)

¹⁴ Kolla, kay hounte penans touke o Debleskre laba, penan touke rhorheno koova glan-vi, hoy či moldo hi. Oun sikran touke gar tiri doosh. Kova te krans le, perals gar yaake har kanna peral. Na-a, yon moukan tout rhorhene laba te shounell, oun anan tout o čačo dromestar tele.

O Debleskro Drom 2021 (Sinte)

¹⁴ Kolla, kai hunte penans tuke o Debleskre laba, penan tuke chocheno koowa glan-wi, hoi tchi moldo hi. Un sikran tuke gar tiri doosh. Kowa te krans le, perals gar jaake har kanna peral. Na-a, jon mukan tut chochene laba te shunell, un anan tut o tchatcho dromestar tele.

Ropaskre gilja 2:14 ပူးပေါင်းရင်းမြစ်များ

Jesaja 58:1

De bari gole! Rike tout gar pale! Hade tiri gole, te vell li yaake zorelo har i phourdepaskri! Oun pen mire menshenge, havo čilačo koova yon kran! Ava, pen o khereske Yakob, havi doosh yob ap peste las!

Jeremia 2:8

T'mare rashaya poučan gar: Kay hi o baro Devel? Har penan le i menshenge, hoy te krenn le, rikran le pen gar ap mire laba. Oun kol pralstoune pral mire menshende hadan pen pral mande, oun shounan bouder gar ap mande. Oun mire rakepangre, kay hounte penans mire laba doureder, rakran an o lab ko rhorheno deblestar Baal, oun mangan figuren an, kay kek devel hi.

Jeremia 20:6

Oun tou, Pashour, veh tapedo khetne kolentsa, kay pash toute an o kheer hi, oun pandles an Babilonia anlo. Kote hounte meress oun veh paskedo tire tsele malentsa, kay ginal lenge rhorhepen dren.

Jeremia 23:22

Te vans yon glan mande tardo an miro tsillo, rakrans yon mire laba mire menshenge, oun penans lenge, te moukenn le pengro čilačo drom oun pengro čilačo koova, hoy kran le.

Jeremia 23:36

Ma penenn bouder: Man hi i lab o baro Deblestar, hoy phares ap mande čiddo hi. Kova, hoy hi phares čiddo ap i mensheste, vell i menshendar oun gar o baro Deblestar. Ma krenn savo koova i labentsa o djido Deblestar! Yob hi o ray pral o bolepen oun i phoub, oun maro Devel.

Jeremia 28:15

Oun o Yeremia penas ap o Hananya: “Shoun, Hananya! O baro Devel bičras tout gar. Tou kral, te patsenn kal menshe rhorhepen.

Jeremia 29:21

Kova penell o baro Devel, ko ray pral o bolepen oun i phoub, kay o Israeleskro Devel hi: O Ahab, koleskro dad o Kolaya his, oun o Sidkiya, koleskro dad o Maasseya his, kolla douy rakran rhorhepen ap t'mende an miro lab. Doleske dau len an i vasta o baro rayestar Neboukadnezar dran Babilonia. Kova moukell len moulo te dell glan t'mare yaka.

Jeremia 37:19

Kay hi kanna t'mare dikepangre, kay penan t'menge glan-vi, te vell o baro ray dran o them Babilonia gar pral t'mende, oun vitar gar pral kava tselo them?

Jeremia 5:31

O Debleskre rakepangre rakrenn rhorhepen, oun kol rashaya rodenn penge ko feteder vin, oun mire menshe kamenn kova yaake. Hoy kamenn t'mer te krell, te hi t'maro tsiro trouyel?

Ropaskre gilja 4:13

Kova vas pral o foro koy doshake, hoy o Debleskre rakepangre oun i rashaya ap pende anan. Yon moukan kote save menshen te marell, kay kek čilačepen kran.

Ezekiel 13:22

T'mare rhorhene labentsa doukran i djia kolendar, kay an o čačepen djivenn, oun kolenge kamom kek daar te krell. Oun t'mer kran i vasta kolendar zorelo, kay čilačo koova krenn. Yaake kran t'mer, te djan le gar tele lengro čilačo dromestar, te ačenn le djido.

Ezekiel 22:25

Tire raya hi mank toute har leve, kay denn gole, har dandrenn le firhen khetne. Yon marenn menshen, čorenn penge bravlepen khetne, oun krenn, te nashrenn boud romya an o them pengre romen.

Ezekiel 22:28

Oun o Debleskre rakepangre čakrenn kolengro tselo čilačepen lače labentsa. Yon rakrenn pral čomone, hoy sikroms lenge. Oun me sikrom len či. Oun yon penenn rhorhepen glan-vi, oun penenn: “Kava penell o baro Devel, maro ray”, kay me lenge či penom.

Ezekiel 23:36

Oun o baro Devel penas ap mande: Tou, mensho, hounte rakress o čačepen vin pral i Ohola oun i Oholiba! Sike lenge havo djoungelo koova yon kran!

Hosea 9:7

O tsiro hi koy, kay me t'menge t'mari phagi dau, oun t'maro čilačepen ap t'mare sherya pale anau. Oun t'mer Israelitarya hayvenn kova! T'mer penenn: “I narvelo hi ko Debleskro rakepaskro! Ko morsh, koles o Debleskro dourho hi, rakrell dinelo koova!” Yaake baro hi t'mari doosh oun t'mari rholi ap mande!

Micha 2:11

Te voms me i morsh, kay nashell o dourho palla, oun rakroms o rhorhepen, oun me penoms: “Piyenn boud mool oun vavar pipen!” Palle penans t'mer mandar: “Havo lačo rakepaskro hi kava morsh!”

Micha 3:8

Man hi i bari zoor. O baro Devel čivas peskro dourho an mande. oun kras miro dji pherdi zoor, te rakrap o čačepen vin, te penap o Yakobeskre čavenge pengri doosh, ava, te sikrap i Israelenge kay le o Debleskro dromestar tele djan.

Zefanja 3:4

Lengre dikepangre krenn, har te vell či, oun hi pherdo rhorhepen. Lengre rashaya krenn savo koova, hoy krell o Debleskro kheer pale-čiddo, oun penenn o Debleskro lab gar čačes doureder.