Remarja 16:18 - O Debleskro Lab 2024 (Sinte-Manouche)

¹⁸ Save menshe boudrenn gar maro rayeske, o Yezous Kristeske. Na-a, yon krenn, hoy lenge kokres mishto hi. Shoukar labentsa oun baro rakepen anenn le kolen o Debleskro dromestar tele, kay denn gar yak.

O Debleskro Drom 2021 (Sinte)

¹⁸ Sawe menshe budrenn gar maro rajeske, o Jesus Kristeske. Na-a, jon krenn, hoi lenge kokres mishto hi. Shukar labentsa un baro rakepen anenn le kolen o Debleskro dromestar tele, kai denn gar jak.

Remarja 16:18 ပူးပေါင်းရင်းမြစ်များ

2. Samuel 15:6

Yaake kras o Absalom hakeneha an Israel, kay kamas pash o baro rayeste te djal, te krell lo o čačepen pral leste vin. Yaake čoras o Absalom kol djia kol morshendar an Israel.

2. Familjakro liil 18:5

Kote moukas o baro ray pral o them Israel i dikepangren khetne te vell – kolla his star-sheel morsha – oun poučas lendar: “Djas mer an o kourepen, te kouras men o foreha Ramot an o them Gilead? Djas mer gar?” Kote penan yon: “Dja koy, oun o Devel dell o foro an tiro vast.”

Debleskri gili 119:130

Te hayvah tiro lab, palle krell men kova barhtelo, oun ninna kolla, kay či djinenn, venn gosevo.

Debleskri gili 12:2

Baro Devel, ab ap miri rig! Tire menshe hi bouder gar boud. Ava, kolla, kay patsle hi mank i menshende, hi gar boud.

Debleskri gili 19:7

O kham djal pre ap koy yek rig o bolepastar, oun nashell peskro drom bis ap i vavar rig, oun glan leskro tatepen ačella či khatedo.

Gosewe laba 14:15

Koles či an o shero hi, kova patsell hako lab, hoy yek ap leste rakrell. Kones i gosevo dji hi, kova dell yak, hoy lo krell oun kay lo djal.

Gosewe laba 22:3

Koles i gosevo dji hi, kova dikell, har i bibarht vella oun khatrell pes. Kolen či an o shero hi, kolla nashenn doureder, oun i bibarht vell ap lende.

Gosewe laba 8:5

Hayvenn t'mer či? Palle denn yak ap goseve laba! Han t'mer dinelo? Palle dikenn dren, hoy t'menge mishto hi!

Jeremia 23:17

Kolenge, kay san pral o baro Debleskro lab, penenn le: T'menge djal mishto an ko tsiro, hoy vella! Oun kolenge, kay djan pal pengro shero, penenn le: Kek bibarht vell pral t'mende.

Ezekiel 13:16

Kolla hi i rakepangre an o them Israel, kay dan glan, te vals len i lab o Deblestar oun penan i menshenge an Yerusalem glan-vi “lauter hi mishto”, ninna te hi či mishto. Kova penau me, o baro Devel, t'maro ray.

Ezekiel 13:19

T'maro dourkepah anenn t'mer ladj ap mande glan mire menshende, te lenn i vast pherdo djob oun i kotar maro. Mire menshenge penenn t'mer rhorhene laba. Oun yon kamenn te shounell ap rhorhepen. T'maro rhorhepah anenn t'mer save menshen an o merepen, kay hounte merans gar, oun krenn, te ačenn save djido, kay hounte merans.

Daniel 11:34

An ko tsiro, kay venn le yaake palla lino, venn lenge menshe ap i rig. Kolla hi gar boud. Boud vavar rikrenn gar čačepah pash lende.

Micha 3:5

Kava penell o baro Devel ap i rakepangre, kay penenn, te vell len i lab o baro Deblestar, oun kova hi gar yaake. Yon rhorhenn i menshen oun penenn kolenge, kay denn len rhapaske: Halauter vell mishto t'mentsa! Kolenge, kay denn len či te rhal, penenn le: I čilačo tsiro vell pral t'mende.

Maleachi 1:10

Kamaus, te vals yek t'mendar koy, kay krals o voudya an miro kheer pandles, te krenn t'mer gar čičeske i yag ap miri rhačepaskri! Man hi doha t'mendar, penell o baro Devel, ko ray pral o bolepen oun i phoub. Oun kol marede firhe, hoy mange anenn, hi mange gar mishto.

Mateo 24:11

Ninna venna boud rhorhene rakepangre oun penenna, te hi le bičedo o Deblestar. Kolla anenn boud menshen o čačo dromestar tele.

Mateo 24:24

Boud rhorhene morsha penenn ap t'mende: Me hom ko baro ray, kolestar o Devel penas, te vell yob. Oun rhorhene rakepangre penenna: Me hom o Debleskro bičedo. Oun yon krenna baro oun zorelo koova, hoy i mensho nashte krell gar dran peskri zoor. Kova krenn le, te anenn le i menshen o čačo dromestar tele. Te djals kova, anans le ninna kolen o Debleskro dromestar tele, kolen o Devel peske vin rodas.

Mateo 6:24

Kek boudrell nay douy rayenge. Te vals kova yaake, boudrals lo ko yekeske mishto, oun ko vavareske gar mishto. Ko yekes kamals yob gar, kol vavares kamals yob o djiyestar. Tou nay boudreh gar o Debleske oun rodeh tiro bravlepen.

Mateo 7:15

Denn yak, te patsenn gar kol rhorhene rakepangren, kay penenn, te vans le o Deblestar bičedo! Yon krenn, har te vans le t'mare phrala. An lengro dji hi le divye djoukle, kay marenna.

Johanni 12:26

Koon kamell mange koy te vell, kova hounte djal mantsa. Kote, kay me hom, hi ninna kova, kay mange koy hi. Kova, kay mange koy hi, vell sharedo miro dadestar.

Remarja 14:18

Koon yaake djivella, kova sharell o Yezous Kristes. Ap leste dikell o Devel lačes. Oun pash i menshende hi lo an-diklo.

Remarja 16:19

Boud menshe shounan, kay t'mer ap o Debleste patsenn oun ap leste shounenn. Doleske hom me barhtelo pral t'mende. Oun me kamau o tselo djiyestar, te hayvenn t'mer boud oun boudeder, hoy lačo hi, oun te krenn kek čilačo koova.

2. Korintarja 11:3

Me darau, te vas vavar koova an t'maro shero, oun t'mer djivenn bouder gar djoudjes oun kokres o Yezous Kristeske. Me darau, te djas t'menge har i Evake, har o gosevo sap rhorhras lat, oun yoy moukas o čačo drom.

2. Korintarja 2:17

Boud rakepangre penenn o Debleskro lab, te lenn le i menshenge love lendar tele. Yaake ham mer gar. Mer penah o Debleskro lab čičeske. Kova krah o Yezous Kristeske. Mare laba venna o Deblestar. Oun yob shounell, hoy rakrah.

2. Korintarja 4:2

Djungelo koova, hoy krenn i menshe čorrhanes, kova krah mer gar. Mer rhorhah kek menshen oun penah o Debleskro lab yaake har činlo hi, oun gar vavarčandes. Yaake djivah glan o Debleste oun rakrah o čačepen, te hayvell nay hakeno, kova, hoy penah, hi čačo.

Galatarja 1:10

Penenn mange, rakrau me kanna yaake, har kamenn i menshe kova te shounell? Na-a! Me rakrau yaake, har o Devel kova kamella. Me kamau gar, te sharenn man i menshe. Te vals kova yaake, voms gar o Yezous Kristeskro boudepaskro.

Filiparja 2:21

Kol vavar krenn lauter, hoy lenge mishto hi. Yon krenn gar, hoy o Yezous Kristo kamella.

Filiparja 3:19

Yon djan ap i drom, kay djan le nashedo. Lengro per hi lengro Devel. Yon sharenn ko djoungelo koova, hoy kran le, oun hounte ladjans pen pral kova. Kova, hoy an lengro shero trouyel djala, hi phoubyakro koova.

Kolossarja 2:4

Kova penau t'menge, te anell t'men kek rhorhene labentsa kava dromestar tele.

Kolossarja 3:24

Djinenn, maro ray, o Yezous Kristo, dell t'men peskro bravlepen an o bolepen. Leskre boudepangre han t'mer.

2. Tessalonikarja 2:10

Oun rhorhepah anell lo kolen ap o čilačo drom, kay djan nashedo. Kolla hi kol menshe, kay kaman gar o čačepen te shounell. Te patsans le o čačepen, nay vans le vin lino dran o čilačepen oun o merepen.

1. Timoteo 6:5

Savo čingepen djal doureder oun doureder. Kolla, kay krenn kova, hi nasselo an o shero oun hayvenn bouder gar, hoy o čačepen hi. Yon patsenna, te nashte lenn le boud love khetne, te krenn le, hoy o Devel kamella.

Jakobo 1:1

Kava liil činau me, o Yakobo, kova, kay boudrell o Yezous Kristeske oun o Debleske. Me penau lače laba kolenge, kay patsenn ap o Yezous Kristeste oun djivenn mashkral kolende, kay gar patslo hi.

2. Petro 2:3

Kol rhorhene sikepangre kamenn t'men rhorhene labentsa ap pengri rig te anell, te lenn le love t'mendar. O Debleskri rholi vell čačepah pral lende, oun lengri bibarht vella sik.

Judas 1:1

Me, o Youdas, činau kava liil ap t'mende, kolen o Devel peske vin rodas. Yob hi t'maro dad oun kamell t'men o djiyestar. Oun o Yezous Kristo dell garda ap t'mende. Me hom o Yezous Kristeskro boudepaskro oun o Yakobeskro phraal.

Judas 1:12

Kol menshenge hounte ladjenn t'men. Te venn t'mer khetne, te piyenn oun te rhan, palle rhan yon pen thoulles pash t'mende oun ladjenn pen gar. Yon dikenn ap pende kokres, te djal lenge kokres mishto. Yon krenn bare laba, hoy či moldo hi. Yon hi har rouka, ap kolende či baro vella, vitar kek patria, oun kay hi tseles moulo oun venn tele dino.

Judas 1:16

Kolla hi save menshe, kolenge kova gar mishto doha hi, hoy o Devel len das. Oun yon rhoyrenn pen, kay lenge gar feteder djal. Yon djivenn pal pengro shero. Yon hi sharede, kay rakrenn shoukar labentsa i menshentsa, te lenn le lendar lačo koova.

Debleskro tsiro 1:1

An kava liil hi kova činlo, hoy o Devel moukas o Yezous Kristes te dikell, te sikrell yob peskre boudepangren, hoy an i tikno tsiro hounte vella. Oun o Yezous Kristo bičras peskro bolepaskres pash mande, te sikrell lo mande kava lauter. Me, o Yohanni, hom leskro boudepaskro

1. Samuel 2:29

Hoske dikenn t'mer ap kol firhen oun rhapen, hoy yaake an miro kheer anlo vell, har me penom, har te vals kova či moldo? Tou hadeh tire čaven pral mande, oun moukeh len i feteder kotya mass te lell kol firhendar, hoy mire menshe Israel mange anan. Oun t'mer rhan t'men pesso ap kova.