Louka 7:22 - O Debleskro Lab 2024 (Sinte-Manouche)

²² Oun yob penas o Yohanneskre malenge: “Penenn o Yohanneske, hoy t'mer dikan oun shounan: I korele nay dikenn pale. Oun i bange nay djan pale. I nassele, kay lengro mass ap lende tele merell, venna sasto. Kolla, kay nay shounan gar, nay shounenna pale. I moule venna djido. Oun i čorvele shounenn o Debleskro lačo lab.

O Debleskro Drom 2021 (Sinte)

²² Un job penas o Johanneskre malenge: “Penenn o Johanneske, hoi tumer dikan un shunan: I korele nai dikenn pale. Un i bange nai djan pale. I nassele, kai lengro mass ap lende tele merell, wenna sasto. Kolla, kai nai shunan gar, nai shunenna pale. I mule wenna djido. Un i tchorwele shunenn o Debleskro latcho lab.

Louka 7:22 ပူးပေါင်းရင်းမြစ်များ

Hiob 29:15

O koreleske homs me har i yak, oun i heri koleske, kay nay nashell gar.

Debleskri gili 146:8

O baro Devel krell, te nay dikenn i korele pale. O baro Devel hadell kolen pale pre, kay tele dino hi. O baro Devel kamell kolen o djiyestar, kay an o čačepen tardo hi.

Jesaja 42:16

Mire menshen, kay hi har korele, sikrau i drom, kolestar yon či djinenn. Oun anau len ap dromma, kolendar yon či shounan. Yon djivenn har an kali rat, oun me lau o tamlepen glan lende krik. Oun kol barra, hoy ap lengro drom čiddo hi, lau krik. Kava krau lenge, oun moukau len gar.

Jesaja 43:8

An kay glan mande kol menshen, kay korele hi, ninna te hi len yaka, oun kolen, kay shounenn gar, ninna te hi len kanda!

Jeremia 31:8

Ava, me, o baro Devel, anau len dran o them, hoy kote čiddo hi, kay norden hi. Oun anau len khetne dran i tsele themma ap i phoub, ninna kolen, kay korelo, bango oun an vavar koova hi, ninna i terne daya. Kolla lauter hi boud boud menshe, kay venn pale kay.

Zefanja 3:12

Kokres čorvele menshen, oun saven, kay rikrenn gar boud pendar, moukau djido an tiro them. Kolla patsenn pengro tselo djiyeha ap o baro Debleste.

Mateo 11:5

I korele dikenna pale oun i bange nashenna pale. I nassele, kay lengro mass ap lende tele merell, kolla venna sasto. Kolla, kay nay shounan gar, shounenna kanna. I moule venna djido. I čorvele shounenn o Debleskro lačo lab.

Mateo 21:14

Koy van korele oun bange an o Debleskro baro kheer pash o Yezouseste, oun yob kras len sasto.

Louka 4:18

O Debleskro Dourho hi ap mande. Yob rodas man vin, te penap i čorvelenge o Debleskro lačo lab. Oun yob bičras man, te penap kolenge, hoy stilde hi, te venn le dran lengro stilepen vin, oun kolenge, kay korelo hi, te dikenn le pale, oun kolenge, kay pale-čiddo hi, te venn le pale erligo,

Louka 7:21

Ap kava tsiro kras o Yezous boud menshen sasto, kay nasselo oun korelo hi, ninna kolen, kay benga an lende hi.

Louka 7:23

Barhtelo hi kova, kay rhoyrell pes gar pral mande.”

Johanni 1:46

Oun o Natanael penas ap leste: “Dran Nazaret nay vell či, hoy mishto hi.” “Am oun dik!” penas o Filipo.

Bičepangre 26:18

Tou kress lenge i yaka pre, te venn yon dran o tamlepen pash i momeli, te less len dran o bengeskro vast vin, oun te aness len pash o Debleste. Te patsenn le ap mande, palle lell o Devel lengri doosh lendar krik. Oun yon venn o Debleskre čave, oun djivenn leha an o bolepen khetne lauterentsa, kay Debleskre čave hi.

Bičepangre 8:7

Boud menshendar tradas lo bengen vin. Kolla dan zoreles gole, har yon lendar vin djan. Oun boud menshe, kay his bango oun nay djan gar, van sasto.

Jakobo 2:5

Shounenn, mire kamle phrala! O Devel rodas kolen vin, kay hi čorvelo ap kay phoub, te venn le bravelo an o patsepen. Ko tsiro vella, kay djivenn le leha khetne an o bolepen oun lenn leskro bravlepen. Kova lenna kolla, kay kamenn les o djiyestar. Yaake penas les o Devel.