Kolossarja 1:23 - O Debleskro Lab 2024 (Sinte-Manouche)

²³ Yek koova hounte krenn t'mer: Ačenn ap o Yezouseskro drom! Patsenn zoreles ap leste! Moukenn gar tele, te dikenn ap kova, hoy t'men hi pash o Debleste! Rikrenn zoreles ap leskro lačo lab, hoy t'menge penlo vas! Ko lab vas penlo ap i tseli phoub. Ninna me, o Paulo, hounte penap ko lab i menshenge. Kova hi miri boudi.

O Debleskro Drom 2021 (Sinte)

²³ Jek koowa hunte krenn tumer: Atchenn ap o Jesuseskro drom! Patsenn soreles ap leste! Mukenn gar tele, te dikenn ap kowa, hoi tumen hi pash o Debleste! Rikrenn soreles ap leskro latcho lab, hoi tumenge penlo was! Ko lab was penlo ap i tseli phub. Ninna me, o Paulo, hunte penap ko lab i menshenge. Kowa hi miri budi.

Kolossarja 1:23 ပူးပေါင်းရင်းမြစ်များ

Debleskri gili 125:5

Kolen, kay tiro drom moukenn oun djan ap bange dromma, deh tou, baro Devel, i phagi khetne kolentsa, kay i vavarenge čilačepen krenna. Barht te vell pral o Israel!

Ropaskre gilja 3:66

Le len palla tiri tseli rholyah, te ačell kek lendar djido ap kay phoub!

Ezekiel 18:26

Te djal i lačo mensho peskro čačo dromestar tele, oun krell o čilačepen, hounte merell lo. Dran peskro čilačepen, hoy lo kras, hounte merell lo.

Zefanja 1:6

Marau ninna kolen, kay perenn mandar tele, oun kolen, kay poučenn gar pal mande, oun kamenn či mandar te djinell.

Markus 16:15

Oun yob penas ap lende: “Djan pash i tsele menshende ap i phoub oun sikrenn hakeneste miro drom!”

Louka 22:32

Me mangom touke pash mo Debleste, te djas tou gar o Debleskro dromestar tele. Oun te djah tou pale ap o čačo drom, kre tire phralen zoreles an o patsepen!”

Louka 6:48

kova hi har i mensho, kay kras peske i kheer. Yob hadas i phoub vin, bis te vas lo ap i zorelo baro bar. Kote čivas yob peskro kheer pre. Oun o baro pani vas, oun kamas ko kheer paash te krell. Oun kova djas gar. Ko kheer his ap o zorelo bar tardo.

Johanni 15:6

Koon ačell gar an mande, kova vell vin vitsedo, har kol kashta, kay tele činlo hi. Yon venn khetne rodedo oun an i yag čiddo, te rhačrenn le.

Bičepangre 1:17

Yob his yek mendar. O Yezous rodas men khetne vin, te vas mer leskre bičepangre.

Bičepangre 1:25

te penell yob i menshenge o lačo lab o Yezous Kristestar oun krell koy boudi, hoy o Youdas moukas. Kova moukas men oun djas peske.”

Bičepangre 1:8

Ap t'mende vell o Debleskro Dourho oun dell t'men i bari zoor. Palle rakrenn t'mer mandar an o foro Yerusalem, oun an o tselo them Youdea, oun an o them Samaria, oun ap i tseli phoub.”

Bičepangre 11:23

Har yob koy his oun dikas, hoy o Devel an peskro baro lačepen kote lauter kras, vas lo barhtelo oun mangas len, te ačenn le pengro tselo djiyeha pash o Yezouseste.

Bičepangre 14:22

djan pash i patslende oun dan len zoor an o dji, oun rakran lenge an o dji, te ačenn yon an o patsepen. Oun yon penan ap kol patslende: “Ap maro drom pash o Debleste an o bolepen krenn menge i menshe o djipen phares.”

Bičepangre 2:5

Ap ko tsiro his an o foro Yerusalem bibolde dran boud themma, kay mangan o Debles an.

Bičepangre 20:24

Me dau či bouder ap miro djipen. Yek koova kamau me an miro djipen te krell: Me kamau koy boudi te krell, hoy das man maro ray Yezous: Yob penas mange, te penap i menshenge, har lačo o Devel lenge hi, oun har kras yob i drom, te nay venn le pash leste.

Bičepangre 26:16

Ste pre oun ač ap tire pire tardo! Me moukom man toutar te dikell, te vess miro boudepaskro, oun te peness i menshenge, hoy tou dikal. Oun lauter, hoy me tout sikrau, hounte peness.

Bičepangre 4:12

Kek vavar har o Yezous kokres nay anell men pash o Debleste. Ap i tseli phoub das o Devel kek vavares, kay nay lell men dran o čilačepen oun o merepen vin.”

Remarja 10:18

Kanna poučau t'mendar: Shounan i bibolde ko lab gar? Ava! Yon shounan kova lauter. Yaake hi činlo an o Debleskro lab: Ap i tseli phoub shounan le ko rakepen. An i tsele themma vas ko lab penlo.

Remarja 15:16

Yob bičras man, te boudrap o Yezous Kristeske oun te djap pash kolende, kay kek bibolde hi, te sikrap len o Debleskro drom. Yaake hom har i rashay, kay anell kol menshen, kay kek bibolde hi, pash o Debleste. Oun o Devel dell len peskro Dourho, te venn le leskro. Oun yob dikell lačes ap lende.

Remarja 2:7

Kolen, kay moukan gar tele, te krenn le o lačepen, dell lo o djipen, hoy gar pre-herella. Yon hi kolla, kay čivan pengro dji koy pre, te dikell o Devel kamles ap lende, oun te lell lo len pash peste an leskro raylepen, kay dell lo len o djipen, hoy gar pre-herella.

Remarja 5:5

Oun kava patsepen moukell yekes gar nashedo te djal. O Devel kamell men o tselo djiyeha. Kova sikras men o Debleskro Dourho, hoy o Devel an mende das.

1. Korintarja 15:58

Doleske, mire kamle phrala, ačenn zoreles an o patsepen! Ma moukenn t'men kekestar o Debleskro dromestar tele te anell! Avenn hako tsiro o Debleske koy, oun boudrenn leske mishto! T'mer djinenna: Kay boudi, hoy leske krenna, hi gar čičeske.

1. Korintarja 3:5

Dikenn, koon hi o Apollo, oun koon hom me, o Paulo! O Debleskre boudepangre ham mer oun kram, kay van t'mer patslo. Hakeno mendar kras koy boudi, har o Devel leste das.

2. Korintarja 10:1

Me, o Paulo, rakrau t'mentsa kamles oun lačes, yaake har o Yezous Kristo kamles oun lačes hi. Hi menshe mank t'mende, kay penenna: “Me te hom pash t'mende, nay rakrau kek triin laba. Te hom dour t'mendar krik, palle rakrau zorele labentsa.”

2. Korintarja 11:23

Yon penenn, te hi le o Yezous Kristeskre boudepangre. Kanna rakrau har i dinelo: Me hom boudeder har yon leskro boudepaskro. Me boudrom boudeder. Me vom boudeder stildo. Me lom boudeder dava. Man his boudeder o merepen glan i yaka har yon.

2. Korintarja 3:6

Yob kras dran mende peskre boudepangre, te sikras mer i menshende o nevo drom, kay o Devel oun i menshe mala venna. Ap o phouro drom hounte rikrenn le pen ap i činle laba. Kol phoure činle laba anenn i menshen an o merepen. Ap o nevo drom lenn le o Debleskro Dourho, hoy dell len o djipen.

2. Korintarja 4:1

O Debles hi i baro dji menge, oun das men kay boudi, te sikras i menshende leskro drom. Doleske vah gar khino, te kras kova.

2. Korintarja 6:1

Mer ham o Debleskre boudepangre. Doleske penah t'menge: Ma vitsrenn gar o Debleskro lačepen an i čik!

Galatarja 4:11

Me trashau t'menge, kay miri boudi pash t'mende čičeske his.

Galatarja 5:5

Mentsa hi vavarčandes. Mer patsah, te čivell men o Devel an o čačepen, te patsah ap o Yezous Kristeste. Ko patsepen dell men o Debleskro Dourho.

Galatarja 5:7

T'mer nashan mishto ap o Debleskro drom. Koon rikras t'men pale, te shounenn bouder gar ap o čačepen?

Galatarja 6:9

Dikas, te vas gar khino, te kras lačo koova. Vell ko tsiro, kay lah ninna lačo koova.

Efesarja 1:18

Me mangau lestar, te krell lo t'mare djia pre, te dikenn t'mare djiyeskre yakentsa, har baro oun shoukar kova hi, hoy yob i patslende della ap ko tsiro, kay venn le pash leste an o bolepen khetne. Yob das t'men gole, te lenn kova lauter.

Efesarja 3:17

Me mangau lestar ninna, te djivell o Yezous Kristo an t'mende dran t'maro patsepen, oun te kamenn t'mer o Debles oun ninna yek o vavares o djiyestar. Palle han t'mer har i rouk, koleskre draba djan dour an i phoub. Oun t'mer han har i kheer, hoy zoreles tardo hi.

Efesarja 4:16

Yob rikrell len khetne yaake, te vell yek patslo i vavareha khetne anlo. Oun yek patslo hidjrell o vavares yaake, har les i zoor hi. Mer te ham yaake kamlo, ko yek ap o vavareste, palle vell o Debleskri familya baro oun zorelo.

5. Mose 2:25

Kava divesseha krau te darenn t'mendar i menshe an hake themma. Koon t'mendar shounella, trashell oun trissell i daryatar.”

5. Mose 4:19

Te hadenn t'mare yaka pre pash o bolepen oun dikenn o kham oun o moonto oun i tsele bolepangre momlia, ma moukenn t'men kolendar krik te tserdenn, te čivenn t'men tele glan lende oun mangenn len an. T'maro baro Devel das len i menshenge an i vavar themma ap i phoub.

Kolossarja 1:25

Lengro boudepaskro vom me. O Devel das man koy boudi, te penap t'menge o tselo Debleskro lab.

Kolossarja 2:7

te vell t'maro patsepen yaake zorelo har i rouk, hoy zoreles an i phoub tardo hi! Ma moukenn ko čačo drom, hoy t'mende siklo vas! Bistrenn vitar gar, te parkrenn t'men boud pash o Debleste!

1. Tessalonikarja 3:3

te moukell kek t'mendar peskro patsepen, ninna te vell lo palla lino. Djinenn, kava pharo drom hi o Debleskro drom menge, oun mer vah palla lino.

1. Tessalonikarja 3:5

Doleske rikrom kova bouder gar vin, oun bičrom o Timotes pash t'mende, te nay penell lo mange, har han tardo an t'maro patsepen. Man his traash, te anals t'men o beng o Debleskro dromestar tele. Palle vals mari boudi pash t'mende čičeske.

1. Tessalonikarja 5:8

Mer djivah ap o dives. Doleske das yak, har te djivas! Yaake har i kourepaskro rivell i sasterno gad ap peste, te nay doukrell les kek, yaake rivas mer o patsepen oun o kamlepen ap mende har i ripen. I kourepaskro čivell ninna i sasterni stadi ap peskro shero, te doukrell les kek ap leskro shero. Yaake nay doukrell men kek, te dikah mer ap o Yezous Kristeste, oun djinah zoreles, te lell men o Yezous Kristo dran o čilačepen oun o merepen vin.

2. Tessalonikarja 2:16

O Devel hi maro dad oun kamell men o djiyestar. Yob hi menge lačo, oun penell menge an o dji, te kras lo lauter menge mishto, oun te lell lo men pash peste hako tsireske. Lestar mangah oun maro rayestar, o Yezous Kristestar,

1. Timoteo 1:12

Me parkrau man pash maro rayeste, o Yezous Kristeste, kay das man i zoor, te boudrap leske. Yob patsas ap mande, oun čivas man an koy boudi, te vap leske koy.

1. Timoteo 2:7

Doleske bičras man o Devel pash kolende, kay kek bibolde hi, te penap lenge o lačo lab o Yezous Kristestar, oun te sikrap lende o čačo patsepen. Man hi o Yezouseskro vast. Kova hi o čačepen. Me rhorhau gar.

1. Timoteo 3:16

Čačepah, an maro patsepen hi i baro čačepen: O Debleskro čavo vas i mensho. Hoy yob kras, hi čačo. Ko sikras men o Debleskro Dourho. I bolepangre dikan ap leste. An i tsele themma rakran le lestar. Ap i tseli phoub patsan le ap leste. An o bolepen las les o Devel pash peste.

Tito 3:7

Yaake čivas men o Yezous Kristo an o čačepen dran lauter lačepen, te dell lo men ko djipen, hoy gar pre-herella. Oun mer djinah, kay lah ko djipen an ko tsiro, hoy vella.

Hebrearja 3:14

Te rikrah zoreles ap maro patsepen ap o Yezous Kristeste yaake rah, har djivah, palle ham čačepah leskre.

Hebrearja 3:6

O Yezous Kristo hi o Debleskro čavo. Oun an leskre vasta hi o Debleskre menshe, ap kolende yob mishto garda della. Kolla ham mer, te čivah maro tselo patsepen ap leste, oun dah gar pre bis te lah o raylo djipen pash leste.

Hebrearja 4:14

Men hi i baro rashay. Kova hi o Yezous, o Debleskro čavo. Yob djas pash o Debleste an o bolepen, te mangell lo les menge. Doleske moukas mer gar tele, te rikras zoreles ap maro patsepen.

Hebrearja 6:19

Kava patsepen rikrell maro djipen, yaake har rikrell i zorelo saster i shiffo, te djal lo gar ap o pani nashedo. Oun kova, ap koleste patsah oun dikah, kova hi o Yezous. Yob djas glan mende pash o Debleste an o bolepen, yaake har djas o baro rashay an o phouro tsiro an o Debleskro kheer. Oun yaake vas o Yezous hako tsireske savo baro rashay, har glan i rah tsiro o Melkisedek his.

1. Petro 1:3

Mer sharah o Debles, ko dades maro rayestar, o Yezous Kristestar. O Devel kamas men yaake boud, te vas yob maro dad oun das men o nevo djipen. Oun an mare djia djinah zoreles, yaake har yob o Yezous Kristes i moulendar djido kras,

1. Petro 1:5

kay patsenn ap leste. O Devel rikrell t'men an peskro zorelo vast, bis te vell ko dives, kay lell t'men o Yezous Kristo dran i tseli bibarht vin. Palle dikenn t'mer har shoukar kova hi, hoy les t'menge hi.

1. Johanni 2:27

O Yezous Kristo das t'men o Debleskro Dourho. Kova ačell an t'mende. Doleske hounte vell t'men kek vavar sikepaskro. O Debleskro Dourho sikrell t'mende o tselo Debleskro drom. Oun lauter, hoy yob t'mende sikrell, kova hi čačo oun kek rhorhepen. Krenn kova, hoy o Debleskro Dourho t'mende sikrella! Yaake ačenn t'mer o Yezous Kristeha khetne.

Debleskro tsiro 2:10

Ma darenn kol douka, hoy ap t'mende venna! O beng moukell menshen t'mendar an o stilepen te vitsrell, te vell diklo, har zorelo t'maro patsepen ap mande hi. Oun t'mer venn deesh divessa palla lino. Ačenn zoreles an t'maro patsepen ap mande, ninna te marenn le t'men! Palle dau t'men o djipen, hoy ačella. Yaake baro hi t'maro playsepen!