Jesaja 66:12 - O Debleskro Lab 2024 (Sinte-Manouche)

¹² Kava penell o baro Devel ap o foro Yerusalem: Dik, me moukau boud lačepen pral toute te vell har i lengsto pani. Oun o bravlepen dran vavar themma nashell an toute har i divyo pani. Me dau garda ap toute har i day ap peskro ternepen, hoy hidjrell li ap i vasta, oun čivell les ap peskre herya oun khelell leha.

O Debleskro Drom 2021 (Sinte)

¹² Kawa penell o baro Dewel ap o foro Jerusalem: Dik, me mukau bud latchepen pral tute te well har i lengsto pani. Un o brawlepen dran wawar themma nashell an tute har i diwjo pani. Me dau garda ap tute har i dai ap peskro ternepen, hoi hidjrell li ap i wasta, un tchiwell les ap peskre herja un khelell leha.

Jesaja 66:12 ပူးပေါင်းရင်းမြစ်များ

Jesaja 14:2

Oun menshe dran vavar themma anenn i Israelitaryen an ko them pale, hoy o baro Devel len das. Oun kol vi-themarya, morsha oun djouvya, venn lengre boudepangre. Oun kolla, kay i Israelitaryen pandles krik lan, kolen lenn yon pandles, oun venn i raya pral kolende, kay rikran len tele.

Jesaja 26:3

Baro Devel, tou rikreh tire vasta pral kolende, kay moukenn pen gar toutar krik te tserdell, oun deh len shoukapen an o dji. Ap toute rikrenn le pen.

Jesaja 33:21

Kote hi o baro Devel zoreles pash mende. Yob hi maro čačepaskro ray, oun kova, kay menge glan djal, ava, maro baro ray, kay men dran o merepen vin lell. Oun o foro hi čiddo pash bourhle lengste panya. Oun kek bero oulerell ap lende. Oun kek kourepaskro shiffo oulerell ap lende trouyel.

Jesaja 45:14

Kava penell o baro Devel: O bravlepen dran o them Egiptia, oun kova, hoy i menshe dran Etiopia dren lan, vell pash toute, te vell lo tiro. Oun kol bare zorele morsha dran Seba venn tire boudepangre. Pandles shellentsa venn le pash toute, oun vitsrenn pen glan toute ap i phoub, oun penenn: Kokres pash toute hi o Devel, oun dell kek vavar devel.

Jesaja 48:18

Kamaus, te shounals tou ap mire laba. Palle vals yaake boud lačepen an tiro djipen, har pani an i lengsto pani hi. Oun pale te pale vals barht ap toute, yaake har o baro pani pale te pale ap o them nashell.

Jesaja 54:13

O baro Devel sikrell peskro drom tire tsele čavende, oun lenge djal mishto.

Jesaja 54:3

Tiri familya vell bareder oun bareder oun len hounte vell boudeder platsa ap i čači rig oun ap i servi rig. Oun tire čave tradenn vavar menshen vin, oun djivenn pale an kol forya, hoy paash dino van.

Jesaja 59:19

Palle taprell i daar i menshen ap i tseli phoub glan o baro Debleste oun leskro raylepen. Yob vella har i divyo zorelo pani hoy nashella, koles o dourho o baro Deblestar glan peste phourdell.

Jesaja 60:16

Tou leh o bravlepen i menshendar dran vavar themma oun kouč koova lengre rayendar. Palle hayveh, te hom me, o baro Devel, kova, kay las tout vin dran o pandepen, te hom me, o Israeleskro zorelo Devel, kova, kay touke playsras.

Jesaja 61:6

T'mer venn rashaya o baro Deblestar, oun venn kharedo maro Debleskre boudepangre. Oun ko bravlepen dran vavar themma, koleha moukenn les t'mer t'menge mishto te djal, oun koleha sharenn t'men.

Jesaja 66:11

Kanna nay venn t'mer čalo leskro bravlepastar, yaake har piyell pes i ternepen čalo pash peskri date, oun piyell barhteles yaake boud thoud har nay piyell lo.

Jesaja 9:6

I rayeskri zoor, hoy les hi, vell baro oun bareder. Oun an kek tsiro dell čingepen. Yob vell beshdo ap o Davideskri beshepaskri, oun hi i ray, kay krell o čačepen yaake vin, har o Devel kamell oun mishto hi kanna oun hako tsireske. O baro Devel, ko ray pral o bolepen oun i phoub, krell kova lauter. Yaake las lo pes kova zoreles glan.

Jesaja 9:7

O baro Devel rakras o čačepen vin pral o kheer Yakob. Oun leskri rholi peras ap i Israelende.

Jeremia 33:6

Kanna shoun, me kamau kava foro pale zoreles te krell, oun leskro doukepen sasto te krell, te djal leskre menshenge mishto, oun te nay djivenn le kek daryah.

Haggai 2:9

Kava kheer te vell shoukeder har miro ersto kheer his. Oun me kamau t'men barht te dell an kava foro, penell o baro Devel, ko ray pral o bolepen oun i phoub.