Jesaja 63:17 - O Debleskro Lab 2024 (Sinte-Manouche)

¹⁷ Hoske, baro Devel, moukeh tou men tire dromendar tele te djal, te kram mare djia har bar, yaake te djivam bouder gar touha? Ab pale pash mende! Ma biste tire boudepangre! Mer ham tire menshe.

O Debleskro Drom 2021 (Sinte)

¹⁷ Hoske, baro Dewel, mukeh tu men tire dromendar tele te djal, te kram mare djia har bar, jaake te djiwam buder gar tuha? Ab pale pash mende! Ma biste tire budepangre! Mer ham tire menshe.

Jesaja 63:17 ပူးပေါင်းရင်းမြစ်များ

Debleskri gili 119:10

Miro tselo djiyeha rodau tout. Ma mouk man te moukap tire laba.

Debleskri gili 119:36

Kre te dikap ap tire laba, hoy mange sikrenn, har te djivap, oun dikap gar ap o bravlepen!

Debleskri gili 141:4

Mouk miro dji gar o čilačepen palla te dell, te krap gar midjak koova khetne i čilačentsa. Mouk man gar te rhap lengro shoukar rhapen!

Debleskri gili 80:14

I divye bale rhan les pre, oun divye firhe moukenn či pral.

Debleskri gili 90:13

Baro Devel, har rah kameh te rhoyreh tout ap mende? Dik pale lačes ap mende, tire boudepangre!

2. Mose 11:10

Oun o Mose oun o Aron kran ko tselo baro koova an o Debleskri zoor glan o Farao. Oun o baro Devel pandas leskro dji, te moukas lo i Israelitaryen gar dran peskro them te djal.

2. Mose 4:21

Oun o baro Devel rakras ap o Moseste: “Te hal an o them Egiptia, palle kre ko tselo baro koova, hoy me tout an tiro vast dom, glan o Farao! Oun me kamau leskro dji har i bar te krell, te moukell yob gar tire menshen dran i Egiptia vin.

Jesaja 19:25

O baro Devel, ko ray pral o bolepen oun i phoub, čivell peskri barht ap lende oun penell: Barhtelo hal tou Egiptia. T'mer han mire menshe. Barhtelo hal tou Assour. T'men krom me mire vastentsa. Barhtelo hal tou Israel. T'men rodom me mange vin, te venn mire menshe.

Jesaja 29:13

O baro Devel, maro ray, penas: Kal menshe sharenn man labentsa. Lengre čipya hadenn man. Lengre djia hi dour krik mandar. Te mangenn le man an, rakrenn le palla, hoy lenge glan penlo vas.

Jesaja 29:14

Doleske krau kal menshentsa pale savo koova, hoy le gar hayvenn, oun hoy vin dikell, har te vals kova gar mandar, yaake te ačell lenge o rakepen krik. Lengre goseve menshe hi palle bouder gar gosevo. Oun kolla, kay boud hayvan, hayvenn bouder či.

Jesaja 30:28

Oun leskro dourho hi yaake zorelo har i pani, hoy zoryah nashell, oun hoy i mensheske bis pash i meen djala. Yob lell i natsyone oun vitsrell len trouyel, oun trissell len, bis te gar boud lendar pral ačenn. Oun yob čivell saster an lengre mouya, har te vans le graya, oun tradell len koleha kate te kote.

Jesaja 6:10

Rake lentsa, ninna te pandenn le pengre djia, oun krenn pengre kanda kashteno, oun pengre yaka pandlo. Te dikans le pengre yakentsa, oun shounans pengre kandentsa, oun hayvans pengre djiyentsa, moukans le pengro čilačo drom oun vans pash mande, oun me kroms len sasto.

Ropaskre gilja 3:9

Ap miro drom čivas lo bare barra. Kay me ninna djau, vau gar doureder.

Ezekiel 20:26

Oun har moukan le pengre phoureder morsh čaven i rhorhene deblenge te rhačrell, rakrom pral lende vin: “T'mer han mange pale-čiddo.” Yaake kamom len bari daar te krell, te hayvenn le, te hom me o baro Devel.

Zakarie 1:12

Koy penas o bolepaskro: “Baro Devel, tou ray pral o bolepen oun i phoub, har rah kameh tou gar tiro dji pre te krell i menshenge an Yerusalem oun an i vavar forya an o them Youda? 70 (efta-deesh) bersha hal rhoyedo pral lende.”

4. Mose 10:36

Oun te čivan yon ko morhton tele, penas yob: “Am pale, baro Devel, pash kol boud zerya menshende an Israel!”

Johanni 12:40

O Devel kras, kay dikenn yon nay gar. Oun lengro dji kras yob pandlo. Kova kras yob, te dikenn yon nay či pengre yakentsa, oun te djal či dren an lengro dji. Te nay moukenn le gar pengro čilačo drom oun venn pash o Debleste, te krell lo len sasto.

5. Mose 2:30

O Sihon, ko baro ray an Heshbon, kamas men gar vergel leskro themestar te djal. T'maro baro Devel moukas leskro dji har bar te vell, yaake te dikas lo či dren. Yaake das o baro Devel les oun leskro them an t'mare vasta. Oun kova his gomme kava dives yaake.

Josua 11:20

O baro Deblestar vas, te kran kol menshe pengre djia har bar, yaake te djan le an o kourepen khatar o Israel, oun van halauter lendar maredo. I Israelitarya hounte van lenge gar lačes. Na-a, yon hounte dan len halauteren moulo, yaake har o baro Devel kova ap o Mose penas.