Jesaja 54:17 - O Debleskro Lab 2024 (Sinte-Manouche)

¹⁷ Kek rharo, hoy kerdo vas, te dell lo tout moulo, nay doukrell tout. Oun hako kopo, kay yek čomone ap toute pre anell, nay sikreh tou, kay yob rhorhras. Kova krau kolenge, kay mange boudrenn. Oun me sikrau, te hi yon an o čačepen, penell o baro Devel.

O Debleskro Drom 2021 (Sinte)

¹⁷ Kek charo, hoi kerdo was, te dell lo tut mulo, nai dukrell tut. Un hako kopo, kai jek tchomone ap tute pre anell, nai sikreh tu, kai job chochras. Kowa krau kolenge, kai mange budrenn. Un me sikrau, te hi jon an o tchatchepen, penell o baro Dewel.

Jesaja 54:17 ပူးပေါင်းရင်းမြစ်များ

Hiob 1:11

Hoy hi, te leh tou lestar krik, hoy leskro hi? Čačepah palle praasell lo tout!”

Hiob 2:5

Hade tiro vast oun tape leskre kokale oun leskro mass an! Palle dikeh, te praasell lo tout glan hake menshende!”

Hiob 42:7

Oun har o baro Devel kol laba rakras o Hiobeha, penas yob ap o Elifas dran Teman: “Kova hoy o Hiob, koles miro čačo vast hi, pral mande rakras, hi čačo. Kova, hoy tou oun tire douy mala mandar rakran, hi gar čačo. Doleske hom rhoyedo ap t'mende.

Debleskri gili 32:6

Doleske mangenn tout lauter kolla an, kay tiro hi, an ko tsiro, kay taprell len i daar. Palle, te venn i bare panya, nay taprenn le len gar.

Debleskri gili 61:5

Mouk man an tiro kheer te djivell hako tsiro, tel tire moussya man te khatrell, har i tikno čirklo khatrell pes tel peskri dakre moussya.

Debleskri gili 71:16

Me vau oun rakrau pral o zorelo koova, hoy tou kral, miro ray, baro Devel, oun sharau či vavar har tiro čačepen.

Debleskri gili 71:19

Miro Devel, tiro čačepen djal bis pash o bolepen. Tou, kay kreh baro koova, koon hi yaake har tou, miro Devel?

Jesaja 17:12

Shounenn, boud boud lourde venna dran boud themma, oun lengri gole hi baro oun divyo har o baro pani. Zorele natsyone hadan pen oun venna har zorele divye panya.

Jesaja 26:2

Krenn o foreskre bare voudya pre, te djan kolla dren, kay an o čačepen tardo hi, oun rikrenn ap pengro Debleste.

Jesaja 29:8

Yek, kay bokella, dell souni, te rhal lo. Oun te krell lo peskre yaka pre, hi les gomme bok. Oun yek, kay troushella, dell souni, te piyell lo. Oun te krell lo peskre yaka pre, hi les troush, oun leskro mouy hi trouk. Yaake djal kol menshenge dran i tsele themma, kay djan an o kourepen i bergah Sion.

Jesaja 3:10

I barht vell ap kolende, kay an o čačepen tardo hi! Oun lauter djal lenge mishto. Ko lačo koova, hoy le kran, vell ap lende pale.

Jesaja 40:2

“Rakrenn i menshenge an Yerusalem an o dji, oun penenn lenge: Ko tsiro hi trouyel, kay hounte boudran tel douka oun dava. T'mari tseli doosh hi playsedo. O baro Devel das t'men i phagi, hoy his yaake baro, har te lans douy kope i phagi t'maro tselo čilačepaske.”

Jesaja 41:11

Dik, ladj vell ap lauterende, kay hi rhoyedo touha, oun yon venn sapaske i vavarenge. Oun kolla, kay kourenn pen touha, hi sik bouder gar koy. Či ačell lendar.

Jesaja 46:13

Me anau t'menge miro čačepen. Kova hi gar dour t'mendar krik. Sik lau t'men dran i bibarht vin. An o foro Sion krau i menshen barhteles. oun i Israelende sikrau miro raylepen.

Jesaja 50:8

O Devel hi pash mande oun dell man miro čačepen. Koon kamell mantsa an o čingepen te djal? Mou vell lo, te stakras mer khetne glan o čačepaskro ray! Koon hi kova, kay anell čomone pre ap mande? Kova stakrell glan, te dikap les.

Jesaja 50:9

Dikenn, o baro Devel, miro ray, hi ap miri rig. Koon hi palle, kay penell, te hi man i doosh? Lauter kolla, kay kamenn čomone ap mande pre te anell, perenn khetne har i phouro ripen, hoy an kotya perell, te rhan les i kirme pre.

Jesaja 51:5

O tsiro, kay miro čačepen vell, hi gar dour. Oun ko dives vell sik, kay lau t'men vin dran o čilačepen. Oun me vau o čačepaskro ray pral i vavar themma. I menshe, kay djivenn pash o baro pani, dikenn ap mande, te lap o kourepen krik.

Jesaja 54:15

Dik, ninna te djan le ap toute pre, vell kova gar mandar. Koon kourell pes touha, kova vell dino oun perell.

Jesaja 54:16

Dik, me kokres krom koles, kay o saster boudrell, oun i yag tato krell, te krell lo i rharo dran o saster. Oun me kokres krom ko kourepaskres, kay marell ko rhareha.

Jesaja 58:14

palle hatseh čači barht an o baro Debleste. Oun me, o baro Devel, hadau tout pral i pralstoune berge. Oun dau tout ko them, hoy dom tiro phouro dadeste, o Yakobeste. Kava hi, hoy o baro Devel penas.

Jesaja 60:21

Tire menshe hi halauter an o čačepen tardo. Oun kava them hi lenge hako tsireske. Yon hi har i tikne rouka, hoy čivom an i phoub, oun hoy bares van. Mire vastentsa krom len, te sikrap miro raylepen.

Jesaja 61:10

Me hom barhtelo pral o baro Debleste, oun miro dji givell miro Debleske. Yob hi troul mende har i ripen, te vell kek čilačepen ap mende, oun čivas čačepen ap mende har i plaashka, yaake har hidjrell i biyabeskro i shoukar stadi, oun leskri pirni shoukar verklia oun goustria.

Jeremia 23:6

An leskro tsiro vell o Youda vin lino dran i čilače vasta, oun o Israel nay djivell kek daryah. Oun i menshe denn les o lab o baro Devel krell men čačo.

Daniel 3:26

Oun o Neboukadnezar djas pash ko voudar ko bobestar oun das gole: “Shadrak, Meshak oun Abed-Nego, t'mer boudepangre o pralstouno Deblestar, avenn koy vin, oun venn pash mande!” Oun o Shadrak, o Meshak oun o Abed-Nego djan vin dran i yag.

Daniel 6:20

Sik taysarlakro, har o kham gar pre djas, stas o baro ray pre, oun djas sik pash i grouba, kay i leve hi.

Mateo 16:18

Doleske penau touke: Tiro lab hi kanna Petro. Kova, hoy tou kate penal, hi har i zorelo bar, ap koleste čivau miro kheer. Oun miro kheer hi kolla, kay patsenn ap mande. Oun kek nashte lell len dran mire vasta vin, ninna kek merepen.

Remarja 10:4

Yob bičras o Yezous Kristes. Koon ap leste patsella, kova hi čačo glan o Debleste. O Moseskre laba hi bouder gar o drom pash o Debleste.

Remarja 8:1

Yaake djal kek nashedo, kay djivell o Yezous Kristeha khetne.

1. Korintarja 1:30

O Devel kras, te van t'mer ap o Yezous Kristeskro drom. Kanna djinah, hoy čačepah gosvepen hi. O Yezous Kristo kras men čačo glan o Debleste. Yob rodas men vin, te vas leske koy, oun las mari doosh mendar krik.

2. Korintarja 5:21

O Devel čivas mari tseli doosh ap maro rayeste, o Yezous Kristeste, kay yob kek čilačepen kras, te vas mer čačo oun erligo glan o Debleskre yaka.

Filiparja 3:9

Leske kamau te djivell. Har djivom pal o Moseskre lila kras man kova gar čačo glan o Debleste. Na-a, miro patsepen ap o Yezous Kristeste kras man čačo glan o Debleste. Koon patsell ap o Yezous Kristeste, koles čivell o Devel an o čačepen.

Josua 24:10

Me kamom gar te krell, hoy o Bileam mandar kamas. Oun yob hounte rakras barht pral t'mende vin. Yaake lom me t'men dran o vast o rayestar Balak vin.

2. Petro 1:1

Me, o Simon Petro, činau kava liil. Me boudrau o Yezous Kristeske oun hom leskro bičepaskro. Me činau ap lauterende, kay lan ninna ko patsepen har mer. Ko kouč patsepen, kay čivas men an o čačepen glan o Debleste, das men maro Devel oun o Yezous Kristo, kay las men dran o čilačepen vin.

Debleskro tsiro 12:10

Oun me shounom i zorelo rakepen an o bolepen, hoy penas: Kanna las men maro Devel dran o bengeskro vast vin. Maro Devel sikras peskri zoor, oun vas o ray pral i tsele menshende ap i phoub. Oun yob das peskri tseli zoor koles, kay yob vin rodas, te vell lo o baro ray pral halauter. Tele vitsedo hi ko phoukepaskro, kay anas i doosh ap mare phralende glan o Debleste o dives oun i rati.

1. Samuel 23:17

Oun o Yonatan penas ap o David: “Ma dare, miro dadeskro vast nay hatsell tout gar. Tou veh o baro ray pral o Israel. Oun me vau o douyto pal toute. Oun ninna miro dad, o Saul, djinell kova mishto.”