Jesaja 49:25 - O Debleskro Lab 2024 (Sinte-Manouche)

²⁵ Kava hi kova, hoy vell, penell o baro Devel: Ninna ko zorelo morsheske venn leskre pandlen krik lino. Oun kolen, hoy ko zorelo ray randas, venn leske krik tserdedo. Kolla, kay kourenn pen touha, kolentsa kourau me man, oun tire čaven lau dran lengre vasta vin.

O Debleskro Drom 2021 (Sinte)

²⁵ Kawa hi kowa, hoi well, penell o baro Dewel: Ninna ko sorelo mursheske wenn leskre pandlen krik lino. Un kolen, hoi ko sorelo rai randas, wenn leske krik tserdedo. Kolla, kai kurenn pen tuha, kolentsa kurau me man, un tire tchawen lau dran lengre wasta win.

Jesaja 49:25 ပူးပေါင်းရင်းမြစ်များ

1. Mose 12:3

Kolla kay penenna, te vell tout boud barht, ap kolende čivau miri barht. Oun kolla, kay penenna, te vell tout bibarht, ap kolende anau ninna bibarht. Koy barht, hoy me tout dau, djal doureder ap i tsele menshende, kay ap i phoub hi.”

Debleskri gili 35:1

I gili o Davidestar. Baro Devel, le miro koova an tiro vast oun činge kolentsa, kay mantsa čingrenna! Koure tout kolentsa, kay kourenn pen mantsa!

Jesaja 10:27

Ap ko dives lau t'men vin dran i vasta kolendar dran o them Assour, te nay rikrenn le t'men bouder gar tele. Palle han bouder gar lengre pandle boudepangre. I lourde dran o them Assour djan pre an Rimmon,

Jesaja 10:6

Me bičrom len pash kol menshende, kay kamenn mandar či te djinell, oun ap kolende rhoyedo hom, te djan le ap lende pre, oun randenn len vin oun čorenn len vin, oun stakrenn len khetne har i čik ap o drom.

Jesaja 14:1

O baro Devel krell peskro dji peskre menshenge pre. Oun pale rodell lo peske i Israelitaryen vin, oun moukell len an pengro them te djivell. Oun vi-themarya venna oun djivenna khetne lentsa.

Jesaja 14:2

Oun menshe dran vavar themma anenn i Israelitaryen an ko them pale, hoy o baro Devel len das. Oun kol vi-themarya, morsha oun djouvya, venn lengre boudepangre. Oun kolla, kay i Israelitaryen pandles krik lan, kolen lenn yon pandles, oun venn i raya pral kolende, kay rikran len tele.

Jesaja 19:20

Ko bar sikrella, te hi o baro Devel ninna an o them Egiptia, yob, kay hi o ray pral o bolepen oun i phoub. Oun te denn le ap o baro Debleste gole, te lell lo len vin dran i vasta kolendar, kay rikrenn len tele, palle bičrell lo lenge yekes, kay lell lengro koova an o vast, oun lell len vin dran lengre vasta.

Jesaja 25:4

Čačepah, tou val o čorveleske har i zorelo kheer, kay yob pes nay khatrell. Te krenn le leske o djipen phares, nay vell lo pash toute. Tou hal har i kheer, kay nay khatrell yek pes, te dell baro brishin, oun te rhačell o kham tele. Kol pralstoune, kay zoryah ap mende djan, hi har i baro phourdepen, hoy phourdell an o vend,

Jesaja 25:9

Ap ko dives penell hakeno: Dik, kova hi maro Devel! Ap koleste rikram men, te vell lo ap mari rig. Yob hi maro baro Devel, ap koleste men rikram! Givas i barhtyatar: Yob las men vin dran o merepen.

Jesaja 35:4

Penenn ap kolende, kolen i dareno dji hi: Avenn zorelo! Oun ma darenn! Dikenn, kote hi t'maro Devel! Yob vell, te dell lo t'men t'maro čačepen oun i phagi kolende, kay kran t'menge čilačepen. Yob vell oun lell t'men dran lengre vasta vin.

Jesaja 40:2

“Rakrenn i menshenge an Yerusalem an o dji, oun penenn lenge: Ko tsiro hi trouyel, kay hounte boudran tel douka oun dava. T'mari tseli doosh hi playsedo. O baro Devel das t'men i phagi, hoy his yaake baro, har te lans douy kope i phagi t'maro tselo čilačepaske.”

Jesaja 5:29

Lengri gole hi har koya, hoy i levo dell, ava, yaake har dell i terno levo gole, hoy vell dour dran leskri meen. Oun palle stell lo pre oun taprell ko firhes, hoy lo rhapaske kamell, oun hidjrell les kote, kay kek nay lell les leske krik.

Jesaja 51:14

Kolla, kay tele rikede hi, venn sik vin dran o pandepen. Yon merenn gar an lengro stilepen, oun len vell doha rhapen.

Jesaja 51:22

Kava penell o baro Devel, kay tiro ray oun tiro Devel hi, kova, kay lell o koova leskre menshendar an peskro vast: Dik, me lau ko khoro, hoy tout mates kras, dran tiro vast vin. Tou hounte piyess bouder gar dran o khoro, hoy pherdi miri rholi his.

Jesaja 54:13

O baro Devel sikrell peskro drom tire tsele čavende, oun lenge djal mishto.

Jeremia 15:21

ava, dran i vasta kolendar, kay čilačo ap toute hi, oun kay djan zoryah ap toute pre.

Jeremia 29:10

Kova penell o baro Devel: Ap ko tsiro, kay hi i Babilonarya efta-deesh bersha i raya pral t'mende, dikau me pale ap t'mende, te rikrap miro lačo lab oun anau t'men pale khere.

Jeremia 31:11

O baro Devel lell o Yakobeskre čaven vin dran o vast o zorelestar.

3. Mose 25:54

Nay ginell kek les vin, hounte vell yob peskre čaventsa vin mouklo an ko bersh, kay i tseli siyaan mouklo vell.

Nahum 2:13

O levo randas oun tapras yaake boud firhen, te van leskre čave oun leskre romya čalo. Leskro khatepen kras lo pherdo koleha, hoy lo randas oun maras.

Zakarie 14:12

Oun kova hi ko pharo nasslepen, hoy o baro Devel ap kolende čivell, kay djan an o kourepen o foreha Yerusalem: Lengro mass merell tele, har le gomme ap lengre pire tardo hi, lengre yaka an o shero oun lengri čip an o mouy merenn tele oun perenn vin.

Zakarie 14:3

Palle djal o baro Devel vin, te kourell yob pes yaake kol lourdentsa dran i vavar themma, har kouras lo pes peskre menshenge an i phoure tsirya.

Zakarie 9:11

Shounenn, penell o baro Devel, me anau t'mare pandlen vin dran o stilepen, vin dran o them, hoy hi har i brounna, kay kek pani dren hi. Kova vell yaake čačo har koy sovel, hoy t'mentsa dren djom, oun hoy rateha čačo vas.

Markus 3:27

Kek nay djal an i kheer, kay i zorelo morsh djivella, oun čorell leskro koova. Yob hounte pandell ko zorelo morshes. Palle nay randell lo leskro tselo bravlepen.

Galatarja 4:26

Hi ninna i foro Yerusalem an o bolepen. Ko Yerusalem hi har i rayetsa, i Sara. Lakre čave hi gar pandlo ap o Moseskre laba. Yoy hi mari day.

1. Johanni 3:8

Kolla, kay djivenn an o čilačepen, kolla hi o bengestar. O beng krella o čilačepen yaake rah, har yob koy hi. Doleske vas o Debleskro čavo ap kay phoub, te phagell lo o bengeskri zoor.

Debleskro tsiro 18:20

Avenn barhtelo, t'mer, kay djivenn an o bolepen! O baro foro hi paash! Avenn barhtelo, t'mer Debleskre menshe! Avenn barhtelo t'mer, kay han o Yezouseskre bičepangre, ninna t'mer, kay han o Debleskre rakepangre! Kova, hoy o foro čilačes kras ap t'mende, das o Devel ko fores pale.