Jesaja 44:26 - O Debleskro Lab 2024 (Sinte-Manouche)

²⁶ Me krau, te venn kol laba čačo, hoy miro boudepaskro rakras. Oun kova, hoy mire bičepangre glan-vi penan, moukau yaake te djal, har le les penan. Me hom kova, kay ap o foro Yerusalem penell: “Mou djivenn menshe an toute!” Oun pral i forya an o them Youda penau: “Yon venn pale pre tardo.” Lauter hoy khetne phagedo hi, čivau me pale pre tardo!

O Debleskro Drom 2021 (Sinte)

²⁶ Me krau, te wenn kol laba tchatcho, hoi miro budepaskro rakras. Un kowa, hoi mire bitchepangre glan-wi penan, mukau jaake te djal, har le les penan. Me hom kowa, kai ap o foro Jerusalem penell: “Mu djiwenn menshe an tute!” Un pral i forja an o them Juda penau: “Jon wenn pale pre tardo.” Lauter hoi khetne phagedo hi, tchiwau me pale pre tardo!

Jesaja 44:26 ပူးပေါင်းရင်းမြစ်များ

2. Rajengro liil 7:16

djan kol menshe dran o foro ap i platsa, kay i Syrarya his, oun čoran lendar lauter krik. Oun lauter vas yaake har o baro Devel penas: Yek bari piri yarro vas yek roupeni bema, oun douy pirya djob ninna yek roupeni bema.

2. Rajengro liil 7:18

Oun kova vas lauter yaake har o Debleskro morsh o baro rayeske penas. Yob penas: “Taysar an kava tsiro venn douy pirya djob yek roupeni bema oun yek piri yarro vell yek roupeni bema an o foro Samaria.”

2. Rajengro liil 7:20

Yaake vas kova pral leste: Kol menshe stakran les khetne pash ko baro voudar yaake, kay meras lo.

Esra 2:70

Oun mank lende, kay an o foro Yerusalem djivan, his i rashaya, oun i Levitarya. I gipangre oun kolla, kay yak dan ap o foreskre voudya, ninna kolla, kay boudran an o Debleskro kheer, yon djan an penge forya oun djivan kote. Ninna kol tsele vavar Israelitarya djivan hakeno an peskro foro.

Nehemia 1:3

Oun yon penan mange: “Kol menshe an o them Youda, kay van gar pandles krik anlo, djivenn an bari bibarht oun ladj. Oun i massouri troul Yerusalem hi tele phagedo, oun i bare voudya hi pre-rhačedo.”

Nehemia 2:3

Oun me penom ap o rayeste: “Baro ray, te djivess hako tsireske! Har nay vell mange gar ropaske? Ko foro, kay mire phoure paskedo hi, hi paash kerdo. Oun leskre bare voudya hi pre rhačedo.”

Debleskri gili 102:17

O baro Devel čivell o foro Sion pale pre, oun moukell pes te dikell an peskro raylepen.

Debleskri gili 147:2

O baro Devel čivella Yerusalem pale pre, oun lauteren, kay krik tradedo van, anell yob pale khetne.

Debleskri gili 69:35

O bolepen oun i phoub sharenn les! Ninna i bare panya oun halauter, hoy dren djivell.

Debleskri gili 69:36

O Devel vell o foreske Sion ap i rig, oun krell i forya an o them Youda pale neves. Leskre menshe djivenn kote, oun o them hi lengro.

Sikepaskro 3:3

Dell yek tsiro, kay vell maredo, oun yek tsiro, kay vell o doukepen sasto; yek tsiro, kay vell o kheer tele phagedo, oun yek tsiro, kay vell o kheer pre-čiddo.

Jesaja 40:9

Tou, koy berga Sion, hal har i čay, kay anell i lačo lab. Tou, o foro Yerusalem, hal bičedo te aness barht. Dja pre ap i bari berga! De zoryah gole, oun ma dare! Dja pre ap i bari berga! Pen ap i forya an o them Youda: “Ake, t'maro Devel!”

Jesaja 42:19

Kek hi yaake korelo har tou, miro boudepaskro Israel, kek yaake kashteno har tou, miro bičepaskro, oun kek yaake korelo har tou, miro vi-rodedo boudepaskro, kay mange koy hounte vals.

Jesaja 42:9

Kova, hoy glan i rah tsiro penom, kova vas. Kanna penau nevo koova glan-vi. Glan o tsiro, kay kova vella, moukau me les t'men te shounell.

Jesaja 49:8

Kava penell o baro Devel: Har his o tsiro mishto, shounom ab tiri gole. Har vas ko dives, kay lom tout vin dran i bibarht, vom ap tiri rig. Oun me dom yak ap toute. Me lom tout: – te vess i drom, kay nay venn i menshe dran hake themma pash mande, – te čivess pale o them pre tardo, – te dess tou lende kol kotya them, hoy lenge hi, oun kanna mouklo hi,

Jesaja 52:9

Givenn khetne i barhtyatar, t'mer dran o khetne phagedo foro Yerusalem! O baro Devel las pes peskre menshenge an, oun krell o foro Yerusalem neves.

Jesaja 54:3

Tiri familya vell bareder oun bareder oun len hounte vell boudeder platsa ap i čači rig oun ap i servi rig. Oun tire čave tradenn vavar menshen vin, oun djivenn pale an kol forya, hoy paash dino van.

Jesaja 55:11

Yaake hi kol laba, hoy dran miro mouy vin djan. Yon venn čačo, oun kova, hoy penom, vell yaake har me kamau. Oun kova, hoy mange glan lom, vell yaake kerdo.

Jesaja 58:12

Oun tire menshe čivenn pale kol phoure forya pre, hoy boud bersha paash dino koy čiddo his. Ava, yon krenn kol phoure massourya neves, kolen tire phoure menshe koy čivan glan i rah tsiro. Oun tou veh kharedo: Kova, kay phagede massourya pale pre tardo čivell, oun kova, kay i dromma kote pale tseles krell, kay i menshe djivenn.

Jesaja 60:10

Oun i vi-themarya čivenn tire massourya pale pre, oun lengre bare raya venn touke pash o vast. An miri rholi dom me tout, an miro lačepen lau tout pale pre.

Jesaja 61:4

Kol phoure forya, hoy yaake rah tele phagedo oun paash dino koy čiddo hi, čivenn yon pale pre. Kal forya, kay boud bersha bouder kek djivell, venn pale neves kerdo.

Jeremia 1:10

Dik kay! Me dau tout kay dives penepaske pral boud menshende oun themma, te tradess len vin, phagess len khetne, dess len tele oun kress len paash, oun moukess len pale bares te vell, oun kress len zoreles.

Jeremia 28:9

I rakepaskro, kay penell barht glan-vi, kolestar djinenn le gar, hi lo bičedo o baro Deblestar oder gar. Kova vell diklo, te vell kova čačo, hoy lo glan-vi penas.”

Jeremia 30:18

Kova penell o baro Devel: Me anau mire menshen pale khere an pengro them, oun krau miro dji haki familyake pre. Oun o foro Yerusalem vell pale pre-čiddo ap peskre berge, oun o baro rayeskro zorelo kheer kote, kay lo tardo his.

Jeremia 31:4

Israel, miri pirni! Me krau tout pale baro. Toutar vell pale i natsyona. Tou kress tout pale shoukar, bashress oun djas vin ap o khelepen.

Jeremia 32:15

O baro Devel, ko ray pral o bolepen oun i phoub, kay o Israeleskro Devel hi, penell: O tsiro vell, kay venn pale khera ginlo an kava them, ninna harhetikri phoub oun drakengro them.

Jeremia 32:44

Ava, kotya them venn ginlo, oun ginepaskre lila venn činlo. Kal lila venn pandlo oun i sikepen pre-čiddo, oun morsha hi kote pashel, te vell lauter čačes kerdo. Kova lauter vell yaake kerdo an o them Benyamin, an i gaba troul o foro Yerusalem, an vavar forya an o them Youda, ninna an i forya ap i bare oun tikne berge, oun an i forya an o them Negev. Me krau, te vell pale lauter mishto mire menshenge, penell o baro Devel.

Jeremia 33:7

Ava, me krau te vell pale lauter mishto i menshenge Youda oun Israel, oun krau kal themma pale yaake zorelo, har his le glan kova.

Ezekiel 36:10

Oun me krau, te venn i menshe boud, kay djivenn ap t'mende. O tselo kheer Israel, halauter lendar, djivenn kote. Palle djivenn le pale an lenge forya. Oun kol tele-phagede forya venn pale neves kerdo.

Ezekiel 38:17

Kava penell o baro Devel, maro ray, ap toute: Tou hal ko morsh, kolestar moukom mire rakepangren glan i rah tsiro te rakrell, kolla, kay kran, hoy lenge penom. An lengro tsiro penan le i Israelenge glan-vi, te moukau tout pral lende te vell.

Daniel 9:12

Oun tou rikral tiro lab oun anal kova, hoy penal, pral mende oun pral mare čačepangre morshende, hoy menge o čačepen vin krenn. Koy bibarht, hoy moukal pral mende te vell, his yaake baro, te vas tel o tselo bolepen sau koova gar diklo har kova, hoy an o foro Yerusalem djas.

Daniel 9:25

Kanna dikess oun hayvess: Har ko lab penlo vas, te vell o Yerusalem pale neves kerdo bis pash ko tsiro, kay vell i ray o Deblestar bičedo, djan efta kope efta bersha trouyel. Oun pal efta kope 62 (shob-deesh-te-douy) bersha hi lo pale neves kerdo peskre dromentsa oun zorele kherentsa, ninna te hi kova an i pharo tsiro boud kourepah.

Amos 9:14

Me anau mire menshen Israel pale an lengro them. Oun yon krenn i tele-phagede forya pale neves, oun djivenn koy dren, oun čivenn drakengre rouka an i phoub, oun piyenn lengri mool, čivenn rouka an i phoub oun rhan lengre roukengre.

Haggai 1:13

Kote penas o Debleskro rakepaskro, o Haggay, koles o baro Devel bičras, te anell lo kol laba o baro Deblestar i menshenge an o tselo them: Me hom t'mentsa, penell o baro Devel.

Zakarie 1:17

De pale gole: Kova penell o baro Devel, ko ray pral o bolepen oun i phoub: “An mire forya vell pale boudeder har doha lačepen. Oun o baro Devel rakrell pale lače laba ap i menshende ap i berga Sion. Oun o foro Yerusalem vell pale leskro vi-rodedo foro.”

Zakarie 1:6

Kol laba, hoy yon, mire boudepangre, t'mare phourenge penan, tapran len. Koy moukan le pengro čilačo drom, oun penan: Kova, hoy o baro Devel, ko ray pral o bolepen oun i phoub, mentsa kras, hi i phagi maro čilačo djipaske oun ko čilačo koova, hoy kram, yaake har penas lo.

Zakarie 12:6

An ko tsiro krau, te venn i pralstoune an Youda har i yagakro čaro mashkral an o veesh, oun har i yag mank o phouss, hoy rhačell ap haki rig. Oun yon rhan kol tsele natsyone trouyel pre. O foro Yerusalem ačell kay lo hi.”

Zakarie 2:4

Koy poučom lestar: “Hoy kamenn le te krell?” Yob penas: “Yon van, te denn le kol shinga tele. Kal natsyone djan ap i menshende an o them Youda pre oun tradan len krik. Oun kal star van, te krenn le lenge bari daar oun lenn lenge lengri zoor krik.”

Mateo 26:56

Kava lauter hounte djas, te vell čačo, hoy o Debleskre rakepangre glan i rah tsiro an pengre lila činan.” Har peskre mala kova shounan, nashan le penge lauter lestar.

Mateo 5:18

Čačepah, me penau t'menge: Yaake rah har o bolepen oun i phoub ačenna, yaake rah vell či krik lino kol labendar, hoy o Mose oun kol Debleskre rakepangre penan. Vitar gar o tikneder lab vell krik lino yaake rah, bis te vell lauter čačo, hoy glan i rah tsiro penlo vas.

Louka 24:44

Oun yob penas: “Har me pash t'mende homs, penom me ap t'mende: Halauter hounte vell čačo, hoy o Mose činas, oun hoy o Debleskre rakepangre pral mande penan, oun hoy an o Debleskre gilya činlo hi.”