Jesaja 43:10 - O Debleskro Lab 2024 (Sinte-Manouche)

¹⁰ O baro Devel penell: Mire menshe, t'mer han kolla, kay djinenn, hoy me krom; oun t'mer han kolla, kay mange vi-rodom, te venn mange koy. Kanna djinenn t'mer oun patsenn oun hayvenn, te hom me o čačo Devel. Glan mande vas kek vavar devel, oun pal mande vell vitar kek vavar devel.

O Debleskro Drom 2021 (Sinte)

¹⁰ O baro Dewel penell: Mire menshe, tumer han kolla, kai djinenn, hoi me krom; un tumer han kolla, kai mange wi-rodom, te wenn mange koi. Kanna djinenn tumer un patsenn un haiwenn, te hom me o tchatcho Dewel. Glan mande was kek wawar dewel, un pal mande well witar kek wawar dewel.

Jesaja 43:10 ပူးပေါင်းရင်းမြစ်များ

Debleskri gili 102:27

Yon ačenna gar. Tou hal kova, kay ačella. Yon venn phouro oun djan paash har i ripen. Tou čiveh len ap i rig har phoure ripya oun leh touke neve. I phoure hounte djan penge.

2. Mose 8:6

Oun yob penas: “Taysar.” Oun o Mose penas: “Yaake har tou penal, yaake te dikess oun hayvess, te hi kek vavar yaake, har maro baro Devel.

Jesaja 41:20

Kova vell yaake, te dikenn i menshe oun hayvenn, oun dikenn dren oun djinenn: Dran i zoor o baro Deblestar vas kova yaake. Ava, o Israeleskro čačo Devel kras kava halauter.

Jesaja 41:4

Koon hi kova, kay kras kova lauter? Koon dell i menshen gole oun penell, hoy lentsa djala? Me hom kova, o baro Devel; glan hake tsirya homs koy, oun hom gomme koy, te venn i palstoune divessa.

Jesaja 41:8

Tou, Israel, hal miro boudepaskro, tou hal o Yakob, koles mange vin rodom, tou veh o Abrahamestar, kay miro maal hi.

Jesaja 42:1

O baro Devel penell: Ake, miro boudepaskro; les hi miro vast. Me rikrau les, oun rodom les mange vin, oun hom barhtelo pral leste. Miro dourho čivom ap leste, te anell lo miro čačepen pash i menshende an i tsele themma.

Jesaja 43:12

Me penom glan-vi, hoy kroms; me lom t'men vin dran o pandepen, yaake har penom. Kek vavar devel mank t'mende kras kova. Kova nay penenn t'mer i vavarenge. Kova penell o baro Devel. Me hom o Devel.

Jesaja 45:5

Me hom o baro Devel oun dell kek vavar. Me kokres hom o Devel. Me dom tout bari zoor, ninna te prindjral man gar,

Jesaja 45:6

te hayvenn le ap i tseli phoub, te dell kek vavar devel har man. Me hom o baro Devel. Oun dell kek vavar.

Jesaja 48:12

Shoun ap mande, Yakob, tou, kay kharedo veh Israel! Tou hal kova, koles gole dom! Me kokres hom o Devel, oun ačau kova, kay homs oun hom.

Jesaja 49:23

Oun bare raya venn touke koy oun lengre romya denn yak ap tire tikne čavende. Oun bare raya vitsrenn pen glan toute ap i phoub, oun čoumrenn i čik tire pirendar. Kote hayveh tou palle, te hom me o baro Devel. Oun kolla, kay dikenn ap mande, te vap ap lengri rig, dikenn gar čičeske ap mande.

Jesaja 55:4

Dikenn, me krom les, te vell lo ray oun pralstouno pral vavar themma, te sikrell yob lende, koon me hom.

Haggai 2:23

O baro Devel, ko ray pral o bolepen oun i phoub penell: Ap ko dives dau me tout, Zorobabel, miro čačo vast. Tou hal miro bičepaskro. Tou hal mange yaake kouč har i goustri, koleha miro lab ap i liil čivau. Tout rodom vin, te boudress mange. Kova penell o baro Devel, ko ray pral o bolepen oun i phoub.

Johanni 15:27

Ninna t'mer, kay hans o tselo tsiro pash mande, penenn i menshenge mandar, hoy t'mer dikan oun shounan.”

Johanni 20:31

Kava vas činlo, te patsenn t'mer, kay o Yezous ko baro ray hi, kolestar o Devel penas, te vell yob. Yob hi o Debleskro čavo. Oun te patsenn ap leste, lenn t'mer o čačo djipen lestar.

Bičepangre 1:8

Ap t'mende vell o Debleskro Dourho oun dell t'men i bari zoor. Palle rakrenn t'mer mandar an o foro Yerusalem, oun an o tselo them Youdea, oun an o them Samaria, oun ap i tseli phoub.”

1. Korintarja 15:15

Palle nay penans le mendar, te ham mer rhorhene. Mer penam, kay kras o Devel o Yezous Kristes i moulendar djido. Te vals kova gar čačo, te krell o Devel i moulen djido, palle nashte kras yob o Yezous Kristes vitar gar djido.

5. Mose 32:39

Dikenn kanna dren, te hom me kokres o Devel, dell kek vavar Devel har man! Me marau oun me krau djido, me doukrau oun me krau sasto, oun dell kek, kay yekes dran miro vast nay vin lell.

5. Mose 4:35

T'men moukas lo kova te dikell, te djinenn, te hi o baro Devel o čačo Devel, oun te dell kek vavar debles har les kokres.

5. Mose 4:39

Yaake hounte djinenn kava dives oun bistrenn kova gar: Dell kek vavar Devel har o baro Devel kokres. Kek vavar devel hi an o bolepen oun vitar gar ap i phoub.

Filiparja 2:7

Yob das kova lauter pre, oun vas i mensho, oun djivas har i menshe. Yob vas i boudepaskro o Debleske,

Kolossarja 1:7

Kava lab penas t'menge maro kamlo phraal, o Epafras. Kova boudrella o Yezous Kristeske har mer. Yob krell peskri boudi mishto pash t'mende.

Debleskro tsiro 1:2

oun činom kova, hoy o Yezous Kristo mande sikras, an kava liil. Kol laba venna o Deblestar. Lauter, hoy dikom, činom pre.

Debleskro tsiro 1:5

Lačepen oun barht t'menge! Kova dell t'men o Yezous Kristo! Yob sikrell i menshende o čačo drom pash o Debleste. Oun yob hi o glanstouno lauterendar, kay stenn i moulendar pre oun venn djido. Oun yob hi ninna o ray pral i tsele raya ap kay phoub! Yob kamell men o tselo djiyestar, oun las men dran mari doosh vin, oun playsras menge peskro rateha.

Debleskro tsiro 3:14

“Čin kava liil ap o Debleskro boudepaskro, kay dell yak ap i patslende an o foro Laodicea: Kava penell kova, kay kharell Amen, oun penell hako tsiro o čačepen, oun sikrell i menshende o čačo drom pash o Debleste. Yob his koy pashel, har o Devel lauter kras.