Jesaja 31:4 - O Debleskro Lab 2024 (Sinte-Manouche)

⁴ Kava hi, hoy rakras o baro Devel ap mande: I levo – nay vell i phouro, nay vell i terno – hoy i firhes tapras, moukell pes gar lestar krik te tradell. Yob dell gole oun darell gar kolendar, kay ap i firhende yak dan, oun kanna khetne kharedo van, oun bari gole ap leste denn. Ninna te hi kolla boud, trashell lo lendar gar. Yaake vau me, o baro Devel, ko ray pral o bolepen oun i phoub, tele ap i berga Sion, te kourap man mire menshenge.

O Debleskro Drom 2021 (Sinte)

⁴ Kawa hi, hoi rakras o baro Dewel ap mande: I lewo – nai well i phuro, nai well i terno – hoi i vieches tapras, mukell pes gar lestar krik te tradell. Job dell gole un darell gar kolendar, kai ap i viechende jak dan, un kanna khetne kharedo wan, un bari gole ap leste denn. Ninna te hi kolla bud, trashell lo lendar gar. Jaake wau me, o baro Dewel, ko rai pral o bolepen un i phub, tele ap i berga Zion, te kurap man mire menshenge.

Jesaja 31:4 ပူးပေါင်းရင်းမြစ်များ

2. Familjakro liil 20:15

Oun o Yaziel penas: “Shounenn mishto, menshale dran o them Youda oun dran o foro Yerusalem, oun tou, baro ray Yosafat! Kava penell o baro Devel t'menge: Ma darenn, oun denn gar tiknes palla glan kol boud lourdende, kolen t'mer dikenna! Kava kourepen hi gar t'maro kourepen, o Debleskro kourepen hi.

2. Mose 14:14

O baro Devel kourell pes t'menge. T'mer hounte krenn či.”

2. Mose 14:25

Lengre vourdya ačan an i čik yaake te van le phares glan. Oun i Egiptarya penan: “O baro Devel kourell pes lenge oun hi ap lengri rig. Djas menge katar!”

Jesaja 10:16

Doleske bičrell o baro Devel, ko ray pral o bolepen oun i phoub, i nasslepen ap i pesse menshende an o them Assour, hoy rhal len pre. Oun i yag rhačrell lengro bravlepen pre.

Jesaja 12:6

Givenn oun denn gole i barhtyatar, t'mer, kay djivenn an o foro Sion. O Israeleskro Devel hi bares mashkral t'mende.

Jesaja 30:30

Palle moukell o baro Devel peskri bari zoreli gole te shounell, oun i menshe dikenna, har leskri moussi tele dell an i rholi. Kote hi yag, hoy troul peste rhal, oun baro zorelo brishin, oun i zorelo phourdepen oun brishineskre barra.

Jesaja 30:32

Oun pash haki dap, hoy o baro Devel ko kashteha ap lende tele dell, dell bashepen ap i tikne pauke oun harfe. Yaake dell lo len trad oun kourell pes lentsa an o kourepen.

Jesaja 42:13

O baro Devel djal vin an o kourepen har i zorelo morsh; oun kourell pes har i kourepaskro, koleskro dji pherdo hi, te djal lo an o marepen. Zoreles dell lo o kourepaskri gole, oun kek daryah djal lo vin ap kolende, kay kourenn pen leha.

Jeremia 50:44

Har i levo vin vell dran i bourra pash o pani Yordan, vau me oun tradau i Babilonaryen sik dran lengro them, oun čivau koles pral o them, kones me vin rodom. Kek hi har me! Kek hounte penell mange, hoy te krap! oun kek ray hi zorleder har me!

Hosea 11:10

Palle djan le o baro Debleske palla, oun yob dell gole har i levo, ava, yob dell gole har i levo, oun leskre čave venn trisslepah pash leste foun kotar, kay o kham tele djal.

Amos 3:8

O levo dell gole – kones hi kek daar? O baro Devel, maro ray, rakrell, koon nay rikrell man pale, te penap leskre laba doureder?

Zakarie 12:8

An ko tsiro rikrell o baro Devel peskre vasta pral i menshende an o foro Yerusalem. Oun i menshe kote sikrenn pen yaake zorelo, te hi i bango yaake zorelo har o David his. Oun i menshe dran o Davideskro kheer djan glan lende, har te djals o Debleskro bolepaskro glan lende.

Zakarie 14:3

Palle djal o baro Devel vin, te kourell yob pes yaake kol lourdentsa dran i vavar themma, har kouras lo pes peskre menshenge an i phoure tsirya.

Zakarie 2:5

An i vavar dikepen dikom i terno morshes i doryah an peskro vast, te dikell lo pal, har baro čomone hi.

Zakarie 9:15

O baro Devel, ko ray pral o bolepen oun i phoub, rikrell peskre vasta pral peskre menshende. Yon venn i zorleder oun stakrenn i barra tele, hoy ap lende vitsedo van. Yon piyenn oun denn gole har te vans le mato i molyatar. Yon venn yaake pherdo rat, har i čaro pherdo firhengro rat hi, hoy vell vin čoredo o Debleske ap leskri rhačepaskri, oun hoy nashell pral i rigya tele.

Zakarie 9:8

“Me kokres dau garda ap miro them, te venn kek lourde dran vavar themma dren. Kek baro ray i vavar themestar nay rikrell mire menshen tele. Mire yakentsa dikau kanna koy pre.”

Debleskro tsiro 10:3

Oun yob das zoreles gole, har i bari divyi margodja zoreles gole della. Oun har yob gole das, shounom efta zorele golya dran o bolepen.

Debleskro tsiro 5:5

Oun yek kol čačepangre phourendar penas ap mande: “Ma rob! Dik, yek las i zoor o Deblestar pral o čilačepen oun o merepen, oun hi moldo, te krell lo ko liil pre, te dikell lo dren. Yob hi kova, kay kharenn le levo, kay vell dran o them Youda. Yob hi o Davideskro čavo.”